জাল বার তার নুয়া সমাচার

এক
জালহার নানহানি পৃথিবীর দশ কোনাত্ত আহিসে। খুইতুগৎ আুলাগয় ইঙ্গ ইয়া বহিয়া আছে আটহান জাঙর দাঙর পক অগ। হাবি বারাদেত হুরু পক অতা এ জাল অহাত আটকা পড়তারা। কিন্তু তাতে আটকা না পড়ের। আর পক অতারে চেইতে তার না হিনর, আর পক অতারে পেইতে তার না হিনর। অথুয়া পক অতাই তারে দেখলেউ তার জালহান নাদেখতারা। দিনহার রঙর ছাগ পড়ের জালহার গজে। দিনহান বার জালহান এক রঙে রাঙা। দিনহান রং বদলার, বদলার জালৌ। অথুয়া পকর আখিৎ কোন জাল নেই।
এহাত আগে নেয়সিল জাল।
কিয়া?
নেয়সিলা জাল বুলানির পক।
কিয়া?
নেয়সিলা ফড়িং।
কিয়া?
না ফুটিসিল ফুল।
কিয়া?
নেয়সিলা মালি।
.. .. .. .. .. .. .. ..
কিয়া কিয়া কিয়া? কিয়ার পিসে কিয়া?
উত্তরর পিসে উত্তর।
এ হিসাব নম নার কোনদিন।

দুই
চাকহাৎ হমানির পথে যে নুয়া জাল আহান ইসে অহাত আটকা পড়লি মধুবেঙন অগ। ছুটানির কাজে জালহাত যতই পাখাহানিনো বারিরি অতই তেইর হুরু পাখাহানি জালহার পেচে পড়িল। খানি খানি করে চকথা ইয়া পড়লে ইঙ্গ ইলি মধুবেঙন অগ। এগদে মাকড় অগ মধুবেঙনগরে পাকদা আহান দিয়া চেইল।মাকড় অগ চড়িলগা মধুবেঙনগর গসহাৎ। জালহান লড়ের; বেয়াপারে বেকায়দায় বেলিয়া থতাহান রসলো উসলিয়া চাবুক দেনার সাদে।
হাদ্দিন দেখুরি কত অথুয়া পক জালহাৎ আয়া আটকা পড়তারা। মাকড় অগই তাঙরে খার। কিন্তু আজি মাকড় অগই মধুবেঙনগরে এরাদিল।
মাকড় অগয় ফুলেত মধু খানার টেকনিক আহান হিকল সাত। না না, মধুবেঙন অগরাঙত মধুহানি খেইল সাত। না না, তেইরে যৌনসঙ্গী করিয়া আলাদা নুঙেই আহান পার সাত। না না, এ হানৌ নাইল সাত। হারপানি আহের। তেব হারপানি চিল।
( পাখিয়ার ফুরদানি দেখিয়া আকিমাউ আফসোস লাগের কিয়া মরতা পাখা নেইতা? কিন্তু মধুবেঙনগরে দেখিয়া মাকরগয় আফসোস নাকরে থাইব “কিয়া মি ফুলেত মধু নেনা নুয়ারৌরিতা”। পর্ণ ছবি চেইতে চেইতে উথাল রকতর নিংসার ফাপে আংলাক আকিহান লুকিয়া থার “কিয়া মরতা যৌন সঙ্গী আগ নেইতা?” কিন্তু মাকড় অগয় এসাদে না খাল্করে থাইব। বুনি দেনার সময় কাকিয়ে তেইর সৌগরে দিগল দিগল চুমা দেইরি। কিন্তু মাকড় অগয় এসাদে চুমা নাদে থাইব। তারতাতে জালহান আছেনায়।)
হারা দিনহান পাকদানির পিসে নিয়মহান করে আটকা পড়ানি অকরল মধুবেঙন অগ। মাকরগয় তেইরে নাখার, হাদ্দিন এরাদের। রাজ কন্যা কঙ্কাবতীর নুয়া য়ারি আহান পারা, তেইর থইগৌ থাইল মাকরগরাং। তেইরাং তা নুয়া প্রভু আগ।

তিন
এগদে তিনদিন পিসে তাপহান আলুইল বেয়াপা মালি অগর। এ তিনো নিদানর দিনে তেইরে আ¹উ আংলাক নাকরিসি। গারিগৎ কেঙহান আহিল মাহি ভাতর বকগই তেইরে জাতা আনল। বাগানে কামে যানা লেপুইলি তেই। দুয়ারহান খুলতে দেখল, তেইর আহির মুঙে ডাঙর জাল আহান।


গণ্পকার: অঞ্জন সিংহ