বিষ্ণুপ্রিয়া বা মণিপুরী যেহানউ মাতিক আমার জাতর ইতিহাস বারো অরিজিন নিয়া নংসাঙ দিন অইল বিতর্ক আহান চলিয়া আহের। বৃটিশ আমলেত্ত ধরিয়া এবাকা পেয়া চলিয়া আহের ঔ বিতর্কর কোন অবসান নাইসে। নানান সময়ে ইউরোপিয়ান তথা ভারতীয় ঐতিহাসিক ভাষাতাত্তিক গিরিগিথানীয়ে জাতএহার উৎপত্তিলো সিদ্ধান্ত আহাত লেপ’নারিয়া বিচ্ছিন্নভাবে মন্তব্য আকেইহান করিয়া গেসিগা। কুনো কুনো ইতিহাসবিদে জাত এহানরে ‘ময়াং’ বুলেসি, কুনোগোই বারো ‘খালাচায়া’, কততাই বারো ‘কালিশা’, ‘লৈমনায়’, ‘নিংথৌনায়’ ইত্যদি নানান নাঙ দিয়া গেসিগা। সামঞ্জস্যহীন বারো পরস্পরবিরোধী মত এতা হাবিরে পাজালিয়া সঠিক ফাম আহান থুঙনার কাজে নিরন্তর চেষ্টা করিয়া যিতারাগা আমার লেখক, ইতিহাসবিদ বারো ভাষাবিদ গিরকলকেয়ে।
আজিকার আলোচনাহান ইতিহাস বা ভাষা নিয়া নাগই, আমার লোকবিশ্বাস, লোকধর্ম বারো লোকাচার যেতা প্রাতিষ্ঠানিক ধর্মবিশ্বাস বা নিয়মমাফিক শিার গন্ডীগোর বারেত্ত হঙর। জাত আহার ফোক বা লোকবিশ্বাস অহান আইডেন্টিটির ডাঙর অংশআহান। কুনো জাতআহার এথনোসোস্যাল অর্গানিজম (ই.এস.ও.) হারপেইতে ঔ জাতর প্রাচীন লোকবিশ্বাস যেতা প্রজন্ম পরম্পরাত চর্চ্চিত ইয়া আহের উতার স্টাডি করানির বিকল্প নেই, কিয়াবুল্লে ঔতার লগে থারতা জাত আহার মানুর লিশিং বছরর জিনার য়ারি, ঐতিহ্য, চিন্তাচেতনা বারো সাংস্কৃতিক পরিচয় । বিষ্ণুপ্রিয়া মণিপুরীর লৌকিক ধর্ম নিয়া বৃহৎ পরিসরে কোন গবেষনাকর্ম নাইসে। এনথ্রপলজির নিয়াম গুরুত্বপুর্ণ বিষয় এতালো আমার ঠারে পয়লা আলোচনা করেসেগো ড. কালিপ্রসাদ সিংহ গিরকে প্রবন্ধমালা তৃতীয় খন্ডত। গিরকর গবেষনাত য়ৌওসেতা দৌ দুকে বিশ্বাস, নুয়ারা, নুয়ারার চিকিৎসা, রহস্যবিদ্যা, প্রাকৃতিক তত্ত, করানি-থক রীতি, গমনেই রীতি ইত্যদি বিষয়। দ্বিক্কুড়ি বছর আগে শিলচরেত্ত শাতইল পাঞ্চজন্য অর্জ্জুনি পত্রিকাত আপোকপা হমাদেনা নিয়া খুমল মহিদেব সিংহ গিরকর ইকরা আহান নিকুলেসিল। বাংলাদেশে অধ্যাপক রনজিৎ সিংহ গিরকে লোকসংস্কৃতির গজে যে দুহান আহান প্রবন্ধ ইকরেসে উতাত লৌকিক ধর্মবিশ্বাসর য়ারি নাহেসে। আশা থয়ার ভবিষ্যতে আমার জ্ঞানীগুণী লেখক গবেষক গিরিগিথানীরাংতো দিক এহানলো তথ্যসমৃদ্ধ ইকরা পেইতাঙায়। আলোচ্য প্রবন্ধত আমার মানুর লৌকিক বিশ্বাস, লোকাচার, দৌ-দুকে বিশ্বাস ইত্যাদিলো সংপ্তি আলোচনার লগে লগে প্রাচীন মণিপুরর লৌকিক ধর্ম যেহান দর্শনগত দিকেত্ত প্রাতিষ্ঠানিক হিন্দুধর্ম, খ্রীষ্টান বা ইসলামধর্মর অসাদে পুর্নাঙ্গ ধর্ম আহান হিসাবে মর্যাদা পানার দাবী থর, ঔহার বারাদেউ মিল্লেঙআহান দিতাঙায়।
পুঙনিঙর আপাবপার হিনলাংরার য়ারি
জাতিসত্তা বা জন (Ethnos) হঙনির স্তর যেমন গোত্র, কৌম, উত্তর-কৌম জাতিকল্প হাবিতা লালয়া আজি বিষ্ণুপ্রিয়া মণিপুরী জাতিসত্তা আহার স্তুরে আয়া ফৌয়িলাংগা। কপাল থিয়নিয়ে আমারতা নিজর বুলিয়া ভূখন্ড আহান নেইল। হুদ্দা এরে দিকএহান বেল্লে পুর্ণাঙ্গ জাতিসত্তা আহান বুলতে যে যে বৈশিষ্ঠ্য থানি থকর বিষ্ণুপ্রিয়াতা উতা হাবি আসে। এহানলো অবশ্য দু:খ করিলতা কিত্তাউ নেই, তামিল জাতি তানুর স্বরাজ্য তামিলনাড়–ত্ত জিঙে প্রতিবেশী অন্ধ্র, কর্ণাটক, কেরালা বারো শ্রীলংকা, মালয়েশিয়া, সিঙ্গাপুরেউ থাইতারা। বিভিন্ন ভূখন্ডত সিতারিয়া থায়াউ তানুর বিতরে নিজর জাতহান সম্বন্ধে সচেতনতা বারো একাত্ততা নামাঙইসে। ইতিহাসবিদ ভাষাতাত্ত্বিকে কিহান লেপকরলা না লেপকরলা ঔ বিতর্কর কাদাবারাদে নাগিয়াউ আমি মাতানি পারিয়ার স্মরনাতীত কালেত্ত মণিপুরর হাগমাটিহার লগে আমার জাত বারো সংস্কৃতিহার অন্তরর সম্পর্কআহান হঙসে। ঔহানলো মণিপুরর বারেদে আয়াউ নিজর পুরানা লামহার মায়া, ঐতিহ্য বা মিঙচেৎ এরাদেনা নাররাংতা। এপেই মণিপুরর আদি জাতহান খায় না বিষ্ণুপ্রিয়া মণিপুরী- এহান নাখালকরলেউ চলের। হুত্তুমে মানুর ক্রমবিকাশর পয়লাকার লগ্নত গোষ্ঠিঅতা আকতাই আকতার লগে কৌলি-খান্নালো থাইলেউ মিয়াম দিন আকতা অয়া থানির ফলে তানুর ঠার, চালচলন, আচার-লিচেৎ, সমাজব্যবস্থা তিলয়া সময় আহাত উপজাত আকেইহার সৃষ্টি অর। সোভিয়েট জনতাত্ত্বিক ব্রামলি গিরকে আন্ত:গোষ্ঠী সংযোগ এহানরে জাতিগঠনর কেইরাকহান বুলিয়া মাতিয়া গেসেগো [১]। প্রাচীন মণিপুরর কৌমঅতার বিতরে আঙম, লুয়াঙ, মৈরাঙ, খুমন, মৈতৈ, খাবা-ঙানবা, চিঙখেই-সারাঙ-লেইশাঙথেম এসাদে বিভাজন আসিল। এতার বিতরে কুঙগি আর্য্য, অনার্য্য বা কিরাত খেইকরানি চিলইসে- তানুর ঠার বারো জনিক উপাদানর পার্থক্যউ আসিল [২]। এবাকা যেতারে মৈতৈ বা বিষ্ণুপ্রিয়া জাতি বুলিয়ার তানু ঔ গোষ্ঠিঅতার আন্ত:জনিক সংমিশ্রনে হঙসিতা বারো এরে ডেভেলপমেন্টর বিতরেই গোষ্ঠী-কৌমঅতার ঠার আহাত্ত আহাত আটিট পিটিট ইয়া মৈতৈ বা বিষ্ণুপ্রিয়ার তঙাল তঙাল ঠারৌ হঙসেতা। অভিন্ন পরিবেশ, ঐতিহ্য বারো সংস্কৃতির বিতরেই ঠার অহানি মান্না ইয়া পালয়া গেলগা। এথনোলজির সুত্রলো দ্বিয় ঠারৌ তিলয়া আকহান ঠার অনি পারলোইস যদি বিষ্ণুপ্রিয়া বারেদে না নিকুলিয়া আজিপেয়াউ মণিপুরে থাইতা।
সভ্য তেইপাঙ মানুর সহজাত প্রবৃত্তিহান পড়িলমরিল নিজর পরম্পরার পুরানা বারো পুর্বপুরুষর ঐতিহ্য জিংতা করিয়া থনার হৎনা করানি। বিষ্ণুপ্রিয়া মণিপুরীয়ৌ ব্যতিক্রম নাগই। বৈষ্ণবধর্মর নৌগত পারাহান দিয়াউ তানু নিজর পুর্বপুরুষর ঐতিহ্য, অভিজ্ঞতা, চিরায়ত বিশ্বাস, ধর্মচিন্তা বারো দর্শনর খৌঅগ চেৎকরে ধরিয়া থনা চেইতারা। মণিপুরে থাইতে মৈতৈ’র হাদিৎ নিজর ঠারহান কালকলিয়া থইতে নানান হিনলাংলা পেয়া গেলাগা, মণিপুরর বারে আয়াউ আসামে, ত্রিপুরাত, বাংলাদেশে সংখ্যাগরিষ্ঠ জনগোষ্ঠীর মুঙে টিকিয়া থানার লালফাম করিয়া যিতারাগা। অহানে মাতিয়ারতা ভারতবর্ষর ইতিহাস বা ভারতর অন্যান্য হিন্দু বা বৈষ্ণবর লগে মণিপুরীর য়ারিহান আকতা করে দেহানি চুমনেই ।
বিষ্ণুপ্রিয়া মণিপুরী সংস্কৃতিত প্রাক-হিন্দু উপাদান
পয়লাকাই চেইক আমার সংস্কৃতিহার লগে ভারতর অন্যান্য হিন্দু বা বৈষ্ণব সম্প্রদায়র মৌলিক পার্থক্যহানি। আমার গাঙগরর মানুর দৈনন্দিন জীবনযাত্রা, চালচলন, রীতিনীতি, সমাজব্যবস্থা, আচার-লিচেৎ বিশ্লেষন করাত বইলে এসাদে অনেক উপাদান পেয়ার যেতা মেইনস্ট্রীম হিন্দুর তুলো মান্না নেই-
১. সনাতন ধর্মর দেবদেবী বাদেউ বিষ্ণুপ্রিয়া মণিপ“রীরতা নিজস্ব দেবদেবী, দৌদুক, আচার-অনুষ্ঠান আসে যেতা তানু প্রজন্ম পরম্পরাত মনিয়া চলতারা।
২. বৈদিক দৌ’র লগে সমান গুরুত্ব দিয়া লৌকিক দৌ’র পুজা কাৎকরানি অর। কুনো কুনো ত্রেত (বিশেষ করিয়া মাদইগাঙে) নিজস্ব দৌদুকেই নিয়াম গুরুত্ব পেইতারা, যেমন নুয়া ফসল বারনগত কাকরানির আগে গরর দৌ হমাদেনা বাধ্যতামুলক। তাছাড়া যেকোন পুজা পার্ব্বনে গর-গিথানী বা গিথানীপুঙে চাকসা হাকরানি লাগের।
৩. প্রাক-হিন্দুযুগর লকেই-সাগেই-শিংলুপ ভিত্তিক সমাজব্যবস্থা এবাকাই আসে, হিন্দুর সাদানে চতুর্বর্ণভিত্তিক নাগই।
৪. জরমেত্ত ইকরিয়া মরানি পেয়া জীবনর (Rites-de-Passage) হাবি কার্ম-আচার-অনুষ্ঠান হিন্দুরাংতো তঙাল।
৫. হিন্দু দেবদেবীর পুজা যেমন দৃর্গাপূজা, লীপূজা, নারায়নপূজা, শিবপূজা ইত্যদি বারো হিন্দু উৎসব যেমন রথযাত্রা (কাঙ), জন্মষ্টমী, ফাগু (লেইশাঙ জন্ম) ইত্যাদি আমি করিয়ারতা প্রাক-হিন্দুযুগর রীতিলো।
৬. বিষ্ণুপ্রিয়া মণিপুরী ঠারর প্রাচীনতম নিদর্শন বরন ডাহানির এলা বা মাদই সরালেল এলাত হিন্দুধর্মর কোন গতবাস নেই, আরেতা প্রাক-হিন্দুযুগর মণিপুরর সরালেল, পাহাংপার য়ারি।
৭. আমার লোকসাহিত্য যেমন মিথলজি, পৌরেই-প্রবচন, লোকগাথা, আপাঙর য়ারিপরিত হিন্দুধর্মর প্রভাব নেই বুল্লেউ য়াকরের।
সংেেপ বিষ্ণুপ্রিয়া মণিপরী সংস্কৃতিত প্রাক-হিন্দু উপাদানই বপিয়া আসে। আমার গর-দুয়ারর নমুনা, খাদ্যাভ্যাস, উরনপিদনর ফুতিফানিত এহান প্রতিফলিত অর। আমার মানুর দৈহিক গঠন অবিমিশ্র আর্য্য নাগই বরং মিশ্র ভোটব্রহ্মী। এপেই আমার ঠারহার কথাহানৌ উসুলে পারিয়ার যেহাত চারিলিশিঙর গজে অনার্য্য ওয়াহি আসে।
আপোকপা
বিষ্ণুপ্রিয়া মণিপুরীর বিতরে আপোকপা হমাদেনার চলহান আদ্যিকালেত্ত। গোষ্ঠি আকেইহানে বসররমা আকমাউ অইলেউ আপোকপা হমাদিতারা। আপোকপা হমাদেনা মণিপুরর প্রাচীন সংস্কৃতির অংশ আহান। আপোকপা ওয়াহি এগো মৈতৈ ঠারর ‘পোকপা’ শব্দত্ত আহেসে যেহার অর্থহান ‘যেগই জরম দেসে’ বা ‘যেগরাঙতো উজ্জেসি’ [৪]। আগেকার মানুয়ে পিতৃপুরুষরে দৌ নিঙকরিয়া হমাদিলা, আপোকপা হমাদেনা অহান উহার নিদর্শনহান বুলিয়া মাতে পারিয়ার। পিতৃপুরুষরে দৌ জ্ঞানে পুজা করানিএহান (Ancestor Worship) পৃথিবীর অন্যান্য জাতর মধ্যেউ প্রচলিত সংস্কৃতিঅহান । বিষুর দিনে আড়াঙে আড়াঙে আপাবপার নিংশিঙে হৌবাতর লুক দেনার চলউহার মুলে আসেতা আপোকপা সংস্কৃতি। মেরার পিতৃপর পালি দেনার লগে আপোকপা কালচারর যোগসুত্র আসে বুলিয়া নিঙকরিয়ার। মণিপুরী পুরাণ উতাত তিন জাতর আপোকপার উল্লেখ পেয়ার [৫]-
১. ইমুঙপোকপা (Famaily Ancestros): গরর আপোকপা। দৌ অসি পুর্ব্বতন তিন পুরুষরে গরর দৌ বা গরর আপোকপা বুলিয়া ধরতারা। নুয়া ধান বরানির পিসে গরর দৌ হমাদেনা এহান বিষ্ণুপ্রিয়া মণিপুরীর আবশ্যিক কর্মহান।
২. সাগেইপোকপা (Group Ancestors): লকেইর আপোকপা। লকেই বা গোষ্ঠি আকেইহার পুর্বপুরুষরে লকেইর আপোকপা বুলতারা। গোষ্ঠিহার লগে আপোকপা তঙাল। উহানলো গোষ্ঠিআকেইহানে আপোকপা হমাদিলে অন্য গোষ্ঠির মানু য়ৌওনি নাকরের।
৩. য়েকপোকপা (Clan Ancestors): গোত্রর আপকপা। মুল বা আদিম কৌমউতার তঙাল তঙাল আপোকপা আসি, যেমন আঙমর আপোকপাগো পুরেইরঙবা, লুয়াঙর আপোকপাগর নাঙহান পৈরৈতন, খুমনরতা থাঙগরেন ইত্যাদি [৬]।
গরর আপোকপাগো বা গররদৌ হমাদিতে চিনিঅতা কাবক, মুড়ির লারৌ, তিলর লারৌ, কলা, মাংগারা, থাম্বৌ, ওয়াতাপি, ঠেইপঙর কুশ ইত্যাদি ব্যবহার করতারা। তিনগো আপোকপার কাজে তঙাল করে তিনহান লুক হাকরানি লাগের। লকেইর আপোকপা হমাদিতে কুনোতাই হৌবাত, কুনোতাই বারো জিঙতা মাছ (যেমন চেঙ, পরম, বোয়াল ইত্যাদি), বারো কুনো কুনোতাই ধলামোষর মাংস (বৈষ্ণবধর্ম লনার আগে প্রচলিত আসিল) কাৎকরতারা। আপোকপা হমাদিতে আরতাউ লাগেরতা ফুল, ধূপ, থুইদিঙ, চন, চনর গুড়া, গুয়া, পানার পাতা, মাটির কলআ’গ, খুত্তেই আহান, তামার পয়সা আহান ইত্যাদি [৭]। এপেই ল্যনীয় আপোকপা হমাদিতে -
- বামুন না লাগের
- সংস্কৃত মন্ত্র সলকরানি না লাগের
- আরতি করানি না লাগের
- ডাক করতাল বারানি না লাগের
- এলা দেনা না লাগের
- লেইরিক থিকরানি না লাগের
আপোকপা হমাদেনার মূল উদ্দেশ্যহান হুদ্দা আপাবপারে নিংশিঙ অনাহান নিংকরলে চুম নাইতই। এহানাত্ত মণিপুরীর লোকবিশ্বাসর ডাঙর ফিলসফিক্যাল দিকআহার পরিচয় পেয়ার। এহানাত্ত হারপেয়ার আদ্যিকালেত্ত মণিপুরীয়ে আত্মার অমরতাত বিশ্ব্াস করিয়া আইতারা। মণিপুরীয়ে নিংকরতারা করতারা মানু দৌ ইলে দেহাগো হুদ্দা মরের, আত্মাগো না মরের। তানু বিশ্বাস করতারা মরানির বাদেউ আপাবপাই কাদাৎ থায়া আগেকার দেকি শৌসুমারারে চেয়া খেয়া তালাবি করিয়া থাইতারা। দৌ-জ্ঞানে পুজা কাৎকরিয়া তানুরে তুষ্ট করলে গরর হবা-হবানেই হাবিতা ঙাক্করিয়া থইতায়।
তথ্যনির্দেশ:
১. Yu. Bromley, Ethnic Processes, Moscow 1983, page -84
২. Prof. Gangmumei Kabui, History of Manipur- Vol. i, Delhi 1993, page-11
৩. Dr. M. Kirti Singh, Religious Development in Manipur in the 18th and 19th Centuries, Imphal 1980, pp 120-136
৪. Saroj Nalini Parratt, The Religion of Manipur, Calcutta 1980. page- 69
৫. আপোকপা থৌনিরল (এন কুলচন্দ্র সম্পাদিত), ইম্ফাল ১৯৩৭.
৬. T.C. Hudson, The Meitheis, Reprinted Edn 1989, page -100
৭. আমার মানুত আপোকপা হমাদিতারা গোষ্ঠি অতার বুজন গিরিগিথানীরাংতো সরেজমিন অনুসন্ধানে খমকরেসু তথ্যহানি।
৮. ড. কালীপ্রসাদ সিংহ, প্রবন্ধমালা ( ৩য় খন্ড: মহৎ প্রশস্তি বারো সংস্কৃতি) শিলচর, ১৯৮৪, পৃষ্ঠা ১৫
৯. খুমল মহিদেব সিংহ, ‘আপোকপা হমাদেনা বারহ ময়াং নাঙর ব্যুৎপত্তি’, পাঞ্চজন্য অর্জ্জুনি, ৬ষ্ঠ সংকলন, শিলচর, পৃষ্ঠা ৩০
লেখক: অসীম কুমার সিংহ
No comments:
Post a Comment