অনথকপা খেলতাম আহাৎ উবা ইয়া - ১

পথগো বিসারতে কুমেইহান লমিল

কনফুসিয়াস চীনদেশর নাঙকরা দার্শনিক আ’গ। চীনদেশর মানু এমনেউ কথা অতারতারাতা কম, কনফুসিয়াস অতারলো আরো কম। জবর সংযত স্বভাবর মানু’গ আসিল কনফুসিয়াস; যেতা মাতানির অতা শিষ্যঅতারাং মাতিয়া গেসেগা, সংপ্তি কথালো। কুনো সংগঠিত ধর্মমত গিরকে প্রচার নাকরেসে, মাতিসে অতা জীবনবোধর কথা। মরানির আগে শিষ্য আগয় গিরকরাং আঙকরিসিল, গিরকে কিহান প্রার্থনা করেরহান। কনফুসিয়াসে মাতিসিল, হারাজীবনহানতে প্রার্থনা করিয়া আহিলু, নুয়াকরে কিতা প্রার্থনা করতু;, নৈতিকভাবে জীবনযাপন করানি অহানেই ডাঙর প্রার্থনাহান। পরকাল সমন্ধে গিরকে কিহান খালকরের আঙকরতে মাতিসিল, জিঙতা ইয়া আসি অতার কাজে কিহান করানি আগে খালকরো, মরপরলাগা অতার কথা পিসে। কনফুসিয়াসর কথাহানি জবর তাৎপর্যপুর্ণ। অর্জ্জুন-বভ্রবাহনর বংশধর বিষ্ণুপ্রিয়া মণিপুরীয়ে খ্রীষ্টপুর্ব ষষ্ঠ শতাব্দীর এরে অনার্য্য মংগোলীয় গিরকএগর কথাহানি ইকরতাই এসারে কথা হপনে খালকরানিয়ৌ চুমনেই, জড়বাদীগো বুলিয়া থমদিয়া বেলাদেনাই স্বাভাবিক। কিয়াবুল্লে ইহজাগতিকতা বা যৌক্তিক ধারনালো নিজর বিবেকবোধ হংকরানির সাদে বুদ্ধিবৃত্তিক স্তরে আমি এবাকাউ থুঙো নারেসি। গতিকে আমার ইতিহাসচর্চ্চা বারো নিজর মারাহাছ বিসারানির ধারা এহানৌ যৌক্তিক ধারালো পরিচালিত নাসে। বিংশ শতকর তিরিশর দশকর পরেত্ত আমার নিজরে বিসারানির যে থৌরাঙ আহান শ্রীমহেন্দ্রকুমার সিংহ গিরকআসিয়ে অকরেসিলা, লমিতেগা অহান বংশ-পরিচয়লো নিজরে ডাঙর করানির হৎনাহাত লেপুইলগা। মহাসভা-সাহিত্যসভা-সমাজকল্যান চিংকরিয়া মেয়েক দেহেসি-নাদেহেসি শৌ-বুজন হাবিহান মহাভারতহাত উবুরি ইলা, উদ্দেশ্যহান যেন-তেন প্রকারে নিজরে অর্জ্জুন-বভ্রবাহনর লগে যুক্ত করানি, নিজরে আর্য্য সভ্যতার কান্ডারীগো প্রমান করানি বারো আমার ইতিহাস, সংস্কৃতি, ভাষাতত্ত্ব, ধর্ম হাবিতা মহাভারতর মিথলো ব্যাখ্যা দেনা। অমতাহান এহান ইলৈ আমি জিংতা ইয়া থাইলাঙ নাইলে যেমন লমিলাঙ। আর্য্যঅতা হবাতা বারো অনার্য্য মঙ্গোলয়েড অতা মিত্তলতা - এসাদে ইম্যাচ্যুরড চিন্তা’ল সভ্য জগতর আর কুনো জাতি পরিয়া আছিতানা কিতা হারপাকুরা মানুয়ে মাতে পারতাই। সভ্য জগতর আর কুনো জাতিয়ে নির্দিষ্ট পুরুষ আগর বংশধর বুলিয়া দাবী করতারা এসারে নজীরউ নেই। জাতআহান কিহানলো ডাঙর ইতারা - তানুর কৃষ্টি-সংস্কৃতি-সাহিত্যর ভান্ডারগোলো না বংশ-পরিচয়লো - আধুনিক নৃতত্ত্ব, নৃবিজ্ঞান, ভাষাবিজ্ঞানর খবর থইতারা অতায় হারপিতাই। হুত্তুমে মাত্তে গেলেগা, আমার জাত এহান বৈদিক-আর্য্য ইলেউ ধন্য অনারতা কিত্তাউ নেই, নাইলেউ নুঙেই নাপানিরতা কিত্তা নেই।


মহাভারত নাকরতারা অতা পাপিষ্ঠ?

হুনতে নুঙেইনাইলেউ সেত্যহান, এপাকা আমার মানুয়ে যেহাত গাম সয়ুছি, আমার মৈতৈ বেইবুনিয়ে অতা করতে করতে আলিইয়া বেলাসিলা একশ বছর আগে। মৈতৈ পন্ডিত আতম্বাপু শর্মা বিদ্যারতœ , ইবুঙোহাল সিংহ, য়ুমজাউ সিংহত্ব দরিয়া এবাকার খেলচন্দ্র সিংহ, ঝালজিৎ সিংহ প্রমুখ গিরকগাছিয়ে মৈতৈ ইতিহাস, সংস্কৃতি, ধর্ম হাবিতা বৈদিক সভ্যতাত্ব , মৈতৈ এতা মিথিলাত্ত উৎপত্তি ইসিতা বুলিয়া উঠিয়া পড়িয়া লাগিসিলা। আতম্বাপু শর্মায় মৈতৈ ঠার এহান সংস্কৃতেত্ব বারো মৈতৈ ব্যাকরনর ভিত্তি সংস্কৃত এসারে তত্ত্ব প্রমান করানির কাজে ডাঙর ডাঙর লেরিক ইকরিয়া গেসেগা। এপাগা তাঙি অজাত চিন্তা নাকরতারা। আমার মহাভারতপন্থী ইতিহাস লেখক অতায় এসুদিন মুলত আতম্বাপু-ইবুঙোহাল-য়ুমজাউ-খেলচন্দ্র-ঝালজিৎ’র মসালা এগদে-উগদে করিয়া আহিতারাহান। য়াঙ্ঘেই বসর ইল, এপাকাউ কোন রিমার্কেবল মৌলিক কামতে নাদেখলাঙ। এহাত্ব হারপারাঙ আমার ইতিহাস-ভাষাতত্ত্বর চর্চ্চা কোন পর্যায়ে আছে। একমাত্র ড.কালিপ্রসাদ সিংহ গিরকর গবেষনাকর্মত খানিআহান বৈজ্ঞানিক ধারা, হাইপোথিসিস ভিত্তিক যৌক্তিক চিন্তার গৎগো পারাঙ। গিরকর গবেষনাকর্মআহান যাদবপুর বিশ্ববিদ্যালয়’ত্ত স্বীকৃতি পাসে। বাকীঅতার কাম বেশীর ভাগই ধর্মীয় আবেগনির্ভর, ন্যুনতম মান আহার মধ্যে নাপরের। ইন্ডিয়ার মোর মারুপ আগরাঙতো হুনিসিলু অনেকগই ‘রিসার্চ’ করানির কাজে বিশ্ববিদ্যালয় অতাত দাব্দাদাব্দি করিসিলা বুলিয়া, কিন্তু মাষ্টারডিগ্রী কুনোমতে পাসইসি থাঙতে গাইড অতায় আলকরে দেসি। যোগ্যতাসম্পন্ন অতায় বারো রিসার্চর পটা ড. কালিপ্রসাদরে সমালোচনা করিয়া খানিআহান সস্তা জনপ্রিয়তা কামানিত গৈ লাগিছি। ‘রিসার্চ’র নাঙে শিলচরর পত্র-পত্রিকাত এপাগা চলেরতা মুলত কালিপ্রসাদ চুম না লাল, সৌরশেনী না মাগধী, ছ-বর্ণ না স-বর্ণ এতালো উসুলা-পাসুলি। আমার সামাজিক সংগঠন অতাই বারো আরতাউ আগুইয়া নৃতত্ত্ব ভাষাতত্ত্র অসারে হাইলি-একাডেমিক বিষয়রে সামাজিক বিতর্কর বিষয়হাত আনিয়া বেলাদিলাগা।


জুহান লেং লেং, কামে বগার ঠেং

সাহিত্যচর্চ্চার ইতিহাসহানৌ আমারে হারৌ নাকরের। ঠারহানলো মরিক বুলিয়া মাতলেউ সাহিত্যর খবর লকুরা মানু নেই, লেখেকুরা নেই, চাকুরা নেই, পাকরেকুরা নেই। লাখ লাখ রূপা মাঙকরিয়া মহামেল, সাহিত্য সম্মেলন, সেমিনার হান্জারাং, করপেখ ইয়া আসে আমার সাহিত্য ছাপানির রূপা নাপারাঙ। গীতিস্বামী, সেনারূপ, অশ্বিনীকুমার, মাধব গিরকআছির রচনাসমগ্র এপাগাউ না নিকুলিল। আমার সাহিত্যর সমালোচক আকিগই মাতিসি, বিংশ শতাব্দীর তৃতীয় দশকেত্ত আমারতা সাহিত্যর কাকেই। খালকরিয়া চেইক ঔ সময় অহাত বাংলা সাহিত্য মিথ, উপনিষেদীয় মঙ্গলচেতনা, রোমান্টিসিজম, সিম্বলিজমর ধারা লালুয়া পোস্টমডার্ন যুগে হমাসিলগা। এরে চারিকুরি বছরে আমার সাহিত্যরে আমি তৃতীয় দশকর বাংলা সাহিত্যর সমপর্যায়েউ নেনা নারিসি। উঠেই-জাগেই, এক ইক, যুদ্ধ করিকগা - এসারে জাগরনী কবিতা পাকরতে পাকরতে, বর্গ-কবিতা, চৌপদী কবিতা - এসাদে নোয়াখালি নিরীা চেইতে চেইতে, সুবলর মালকে সুবলর কথা খালকরিয়া আহির পানি বেলিরি - টাইপর অপরিণত গল্প পাকরতে পাকরতে আমি যবরে চকথা।


কলামিস্টঃ রসরাস শর্মা, বামুনটিলা।