কিসারে চলের আমার ঠারর ইসকুলগো

ইমার ঠার অহান বিশ্বর হাবি মানুরাং পরম শ্রদ্ধার বিষয়হান। ইমার ঠারর গজে যে কোন কাম্পৎ আহিলে মানুয়ে যে ইম্পানি ইয়া বহিয়া থানা নুয়ারতারা অহার ডাঙর উদাহরণহান ১৯৫২ সালর । ২১ ফেব্রুয়ারী বাংলা ভাষা আন্দোলন। ২১ শে ফেব্রুয়ারী দিন এহান জাতিসংঘর শিক্ষা বারো সংস্কৃতি বিষয়ক সংস্থা UNESCO গেলগা ১৭ নভেম্বও ১৯৯৯ তারিখে আন্তজাতিক মাতৃভাষা দিবস’ বুলিয়া আন্তর্জাতিক স্বীকৃতি দিল। এসারে আন্তর্জাতিক স্বীকৃতি পানার পিছে ২১শে ফেব্রুয়ারি’ অহান এবাকা বিশ্বর হাবি জাতিগোষ্টীর ইমার ঠারর অধিকার বারো মর্যাদা প্রতিষ্ঠার কাজে থৌতাল বারো শক্তির উৎসহান। আসামে বিষ্ণুপ্রিয়া মনিপুরী ঠারর স্বীকৃত বারো ঠার এহান্ন লেরিক তামকরানির সুযোগ দেনার কাজে আন্দোলন করতেগা গিয়া ১৯৯৬ সালর ১৬ র্মাচ তারিখে পুলিশর গুল্লি খেয়া শহীদ ইলি সুদেষ্ণা সিংহ। যে ইমার ঠারর কাজে সুদেষ্ণাই ঠইগো কাৎকরল অরে ইমার ঠারে আজি আমি ইকরানি পাকরানি নুয়াররাং।

প্রাতিষ্ঠানিকভাবে আমার ঠার এহান পঠন পাঠন নার বুলিয়া আমি আমার ঠারে ইকরানি পাকরানি নুয়াররাংতা। অবস্থা এহার পরিবর্তন আনানির কাজে বুলিয়া বাঙলাদেশেউ আমারে ঠারর ইস্কুল আগো লিংখাত করানি ইল। SIL BANGLADESH বুলিয়া বেসরকারী প্রতিষ্ঠান আহানর পাংলাকে মাধবপুরে পইলাকা ‘ বিষ্ণুপ্রিয়া মনিপুরী ঠারর ইস্কুল’ গ হঙিল। গেলগা ২০০৪ সালর ৩০ অক্টোররেৎত ইস্কুলর শিক্ষাদান কার্যক্রম আরাম্ভ ইল। ইস্কুলগর কার্যক্রম চালানির কাজে নৃপেন্দ্রকুমার সিংহরে সভাপতি বারো রমেন্দ্রকুমার চ্যাটার্জীরে সম্পাদকগ’ করিয়া মনিপুরী ঠার উন্নয়ন পরিষদ বুলিয়া কমিটি আহান হংকরানি ইসে। ইস্কুল এগর অন্যতম উদ্যোক্তা রাজমনি সিংহ ইস্কুলগর কাজে জিরননেয়া কাম করে যারগা। ইস্কুলগর শিক্ষার্থীর সংখ্যাহান এবাকা পেয়া ২৫গ। ২গ শিক্ষকে লেরিক বাগাদিতারা। মনিপুরী ললিতকলা একাডেমীর গৎ লেরিক বাগাদেনা অর। ইস্কুলর নিজস্ব ঘর আগ হঙকরারিনর উদ্যোগ চর্লে রাজমনি গিরকে হায়পুয়িল, ঘোড়ামারা, ভানুবিল মাংকেইমাং ডালুয়া নগর বালিগাও সহ হাবি গাঙে ইস্কুল খুলানির পরিকল্পনা নিয়াসিগা।

SIL BANGLADESH হুদ্দা শিক্ষা উপকরন বাবদ সাহায্য খানি দেসি, বাকীউতা মানুরাংত চান্দা করিয়া চালিতারা। আর আর গাঙর মানুরে সচেতন করানির কাজে বুলিয়া গাঙে গাঙে মিটিং বারো প্রচারনা চলের। প্রচারনার অংশ আহান হিসাবে ২০০৫ তারিখে ভানুবিলে ইস্কুলর থৌরাঙে লপুকর বান্দারা আহান হাঞ্জানি ইসিল। বান্দার এহাৎ পরগনার হাবি গাঙর বিশিষ্ট গিরক/ গিথানক লকেই বাদেউ ৩০০ গর চুয়া মানু তিলুইসিলা। আমার ঠারর ইস্কুল এসর কার্যক্রম পাংলাক করানির কাজি বুলিয়া আমার সমাজর হাবি থাকর মানুরাং ইস্কুলর থৌপুরে হেইচা কাতকরতারা।