আমার মাতহান ফুতিসিল এরে ঘরে...

... আমার মাতহান ফুতিসিল এরে ঘরে। তিকতিকা বেলিতিকে চক্থা গারিগরে আর€ম দেসিল এরে ঘর এগয়। এর ঘর এগর দেয়ালগর মাটির চাকা আকিগৎ লুকিয়া আছে আমার লিশিং মারির ইতিহাস আকিহান। ...


(চরিত্রঃ সুত্রদারিগ, অরুণ বার মারুপ তিনগ। সিপাই দুগ। মারুপ তিনগির বিতরে জেলা আগ থানা থক। হাবিয়ে সাতগ মানু। মঞ্চগর বিতরে চরিত্র অতা বহানির ফালু আহান থাইতয়।)

সমুদ্রহার বুকগদে নৌনো যিতারাগা এসাদে ভাব আহান্ন হাবিগি হমিলাগা। তাঙি এলা আহানৌ দিতারা-
এলাহানঃ হেইয়া হো হেইয়া হো
পাড় মাঙসে পানির হতে যিতাঙাইগারে
আমি কতগ নুয়া মাঝি বৈঠা দরিসি শক্ত আতেরে
পাড় মাঙসে পানির হতে যিতাঙাইগারে।
(এলাহান লমানির লগে লগে তাঙি ফালুহাৎ বহিলাগা। এগদে সুত্রদারিগ তার ফালুহাও আহিয়া মঞ্চগর খানি পিসেদে আছে ঘর অগরে চেয়া মাত্তয়-

সুত্রদারিঃ এগ অরুন আসির ঘরগ। ঘর এগৎ যেন তাঙি সাতহান সমুদ্র ফাড়ি দিয়া আহিলা। তাঙর আহানির পথে কতি র€দ, কতি বরন, কতি উথাল-পাথাল হৎ তাঙরে থারানি চাসিল। কিন্তু তাঙি না থামিসি। কিসারে থামতা?-
থাচির আহিজিমা আধারে ঘর এগয় তাঙরে দেসিল দেহানির লেম আগ। হাওনর বৌ-বরনে ঘর এগয় তাঙরে করিসিল আর€ম। ঘর এগয় তাঙর পাঙ্কাল, ঘর এগয় তাঙর হাবি হপন। যে ঘরগরে নিয়া তাঙর হাবি হপন, ঔ হপনহান বাগতে বপ দিল নাইল। কিয়া বুল্লে আকদিন উড়াদারা ইয়া পৌ আহান্ন আহিল অরুন।
(অরুন মঞ্চগৎ কাহিল। খানি পিসে তার মারুপগি হমিতায়।)
অরুনঃ বুলু, মায়া, সেনা, তুমি কুরাং গেলায়গাতা? এরে চেই, চেহাৎ কিহান লিখিসিতা?
হাবি মারুপঃ কিতা ইয়েথাং অরুন?
অরুনঃ এরে ঘর এগ আমারতা বেলিয়া যানা লাগতয় বুলি। লিশিং লিশিং মারি দরিয়া ঐতিহ্যর নানহান্ন ঘর এগয় আমারে বাদিয়া থসিল। এহাৎ বহিতায় বুলি শাসকর কারখানা।
মারুপ হাবিঃ না, না, না অহান অনা নাদবাং।
মারুপ১ঃ আমার জরম ইসিল এরে ঘরে।
ঠারহান হিকিসিলাং এরে ঘরে।
মারুপ ২ ঃ তিকতিকা বেলিতিকে চকথা গারিগরে আর€ম দেসিল এরে ঘর এগয়।
মারুপ ৩ ঃ ঘর এগর দেয়ালগর মাটির চাকা আকিগৎ লুকিয়া আছে আমার লিশিং মারির ইতিহাস আকিহান।
হাবিঃ না, না, না আমি ঘর এগ বাগানি নাদবাং। (হাবিগি ফালুহাৎ গিয়া বহিলাগা)।
সুত্রদারি ঃ এরে ঘর এগরে নিয়া অরুন আসির হাবি হপন বার তার হপনর লীগ মাগ, যেগরে তার এরে ঘরর ঘরনিগ করানি চার। যেগরে খালকরলে তার আহিগির পাতাৎ নিকুলতারা গপি। আকদিন লহঙর কথা খালকরতে খালকরতে তা দেখল-
(অরুন বার মাগ ফালুহাত্ত মঞ্চগৎ আহিলা। অরুনর মারুপ অতার জেলা চরিত্র অগ “মাগ“ অনা একরের।)
মাগ ঃ অরুন, মরে কু¤žাগা তর ঘরে নিতেয় গাগ মাৎ?
অরুন ঃ নিতৌগা নিতৌগা। আরাক কতদিন বাহা। ঘর এগ আগে ঠিক করে বেলাং।
মাগ ঃ ঠিক কর তি তর ঘরগ। মি গেলুগা। (মাগ ফালুহাৎ গিয়া বাহিলিগা। অরুনে ঘরগর বারাদে চেয়া থাইল, যেন তা কল্পনা করের।)

সুত্রদারি ঃ অরুনর হাবি হপন বাগানিৎ পড়িল। ঐতিহ্যর নানহান্ন বাদিয়া থসিলা ঘরগৌ বাগানি পড়িল। আকদিন শাসকর সিপায় দুগ আহিয়া তাঙরে দমকিয়া মাতলা-
সিপাই ১ ঃ তুমি এরে ঘর অগ বেলিয়া যেইগা। এহাত শাসকর কারখানা বহানি ইতয়। আজিত এহাৎ রেড এলার্ট দেনা ইল।
সিপাই ২ ঃ আজিত বেলিটিকর পিসে এহাৎ যেগরে দেখতাঙায় তাঙর গজে গুলি করানি ইতয়। (তাঙি ফালুহাৎ বহিলাগা)
অরুন ঃ না, না, না আমার ঘরগ আমি না এরাদিবাং। (ফালুহাৎ বহিলগা)

সুত্রদারি ঃ অরুন আসি তাঙর ঘরগ না বেল্লা। এগদে শাসকর দাপাউ তাঙর কারখানাহান বহানির কা উবা ইসি। অহান্ন বেলিতিকর পিসে গুলি করলা তাঙর গজে।
(হাবি উড়াদাড়া ইয়া দাপদা দাপদি করানি অকরলা। এগদে অরুনরাং গুলি লাগিয়া মরিল। হাবিয়ে লাশগ দেখিয়া দরপিয়া লুকিলাগা।)

সুত্রদারি ঃ নিজর ঘরগর কাজে থৈ দিল অরুন। তার লাশগ তাঙর ঘরর উঠানহাৎ পড়িয়া আছে। ঘরে আর যেগি আসিলা তাঙি রকত দেহিয়া, সিপায় দেহিয়া দরপিয়া লুকিলা। মানুর নিংশানো যে ঘরগ এচুদিন মেল মেল ইসিল আজি তার মাঙ্কল, ঘরগর বিতর হাবিদে খা খা করের। ঘর অগয় যেন চিকারি দিয়া কাদে কাদে মাতের, তুমি মরে বেলিয়া কুরাং গেলাইগাতা? তুমি আহেই।

সুত্রদারি ঃ লাশগ পড়িয়া থার ঘরগর উঠানহাৎ। শাসকর পালাইল মানু অতায় লাশ অগ পাহারা দিতারা লোহা বার বারুদর গৎনো। এগদে জীবনর সাংনেই নিংশা অতা খানি খানি করিয়া বদি ইয়া আহের, অর রাতি। জুলাকগ কাহের হাগেদে, পৃথিবী গুমার ইংচিক চিলয়া। ইং বৌ যেন শ শ করিয়া সিৎকরের অরুনর রৌগ। না, না, গুমর মেরাকে- সেরাকে অরুনর মারুপগিয়ে দেখতারা হপন আহান।
(হাবি গুমিয়া থাইতারা মঞ্চগৎ। অরুনর লাশগ উঠে আহিল।)
অরুন ঃ বুলু, মায়া, সেনা, তুমি কুরাং গেলায়গাতা। রড বার বারুদর গৎ হুনিয়া তুমি দরপাবেল্লায়। আমার ঘরগ বেলিয়া তুমি পরব ভিটাৎ গুমারায়। তুমি পাহুরে বেল্লায়-
*আমার মাতহান ফুতিসিল এরে ঘরে।
*তিকতিকা বেলিতিকে চক্থা গারিগরে আর€ম দেসিল এরে ঘর এগয়।
*এর ঘর এগর দেয়ালগর মাটির চাকা আকিগৎ লুকিয়া আছে আমার লিশিং মারির ইতিহাস আকিহান।
*আহ আহ, তুমি ঘরে আহ।
(তা ফালুহাৎ বহিলগা)

সুত্রদারি ঃ (মায়া আসি গুমিয়া থাইতারা)
আরতা গুমানি নুয়ারলা মায়া আসি। রাতিহান ফুয়ানির আগেই ফুইল তাঙর কেং।
মারুপ ১ ঃ কুঙ্গ? কুঙ্গয় আমারে দাখেরগ।
মারুপ ২ ঃ অরুনে আমারে দাহের।
মারুপ ৩ ঃ আমি কুরাং গুমাসিতা। আমার ঘরগৈ আমারে দাহের।
হাবি ঃ অরুন অরুন, আমি আহরাং।
(ফালুহাৎ বহিলাগা)

সুত্রদারি ঃ এগদে অরুন আসির ঘরগ বাগিয়া শাসকর দাপায় কারখানাহান বহানির কা হতœা ইসি। সিপাই দিয়গি হারৌহানে মজিসি।
সিপাই-১ ঃ পেইলাং পেইলাং হাবি পেইলাং। হুনা পেইলাং র€পা পেইলাং, বেং পেইলাং, বাং পেইলাং। বারন পেইলাং, চেম্বু পেইলাং, ঘর পেইলাং বিটা পেইলাং.......
সিপাই-২ ঃ বাহা, গিরক বাহা। ঔ দুরিহার পথহান্দে ইয়া মিশিল দিয়া মানু দাপা আহান এগদে আহিতারা পারা। কি তেজহান তাঙর নারে কি ঙালহান তাঙর দেউতিৎ।
সিপাই-১ ঃ দর করেরগা গিরক দর করের গা। তাঙি যেন নারে আমারে মারানির রৌগ তুলিসি।
সিপাই দগি ঃ যিক্গা গিরক, যিক্গা। এহাৎ আরতা থানা নাইল। (তাঙি ফালুহাৎ বহিলা।)

সুত্রদারি ঃ মায়া, বুলু আসি আহিলা তাঙর ঘরে। পড়িয়া আছে অরুনর লাশগরে চেয়া তাঙি মাতানি অকরলা-
মারুপ-১ ঃ অরুন, আমি আমার ঘরে আহিলাং।
মারুপ-২ ঃ কেঙনার যে রৌ আগ আমি হাবিয়ে তুল্লাং অগ হুনিয়া তাঙি দরপিলা।
মারুপ-৩ ঃ আমার দেউতির ঙালহাৎ তাঙি উবা অনি নুয়ারলা। তাঙি লুকিলা অরুন, তাঙি লুকিলা।
(অরুনর লাশগ তুলিয়া তাঙি বেদিগর বারাদে সালুইলা।)



নাট্যকারঃ অঞ্জন সিংহ