জাতীয় সমস্যা ( ১৯৩৯ খ্রীষ্টাব্দত প্রকাশিত 'মেখলী’' পত্রিকাত্ত)

আমার মণিপুরী জাতর বিতরে মূল্য নেই, অর্থ নেই এসাদে রীতি নীতি অনেক আগেত ঘরে ঘরে চল ইয়া আহের, যেতার কারণে সমাজহান তুপ তুপ ইয়া মাঙনার পথেদে দিয়া যারগা। আজি কালি সমাজর গিরক আকিগয় ঔ বারাদে মিল্লেং দেনা অকরলা। রীতি নীতি অতার অতই মুল্য নেই যে অতারে কোন নাং দেনা নার। ইমে বর্ণনা করে মাতানি ছাড়া আর পথ নেইল।
আয়ুর্বেদ শাস্ত্রই মাতের , অচেনা মানুয়ে দিয়া খানা-পিনা ঠিক নেই। তাঙর লগে খানা-পিনা, গুমানি বা আরি আগৎ হজক পিনা নাকরের। কিয়া বুল্লে অচেনা মানুর গারিৎ নুয়ারা পানি লুকিয়া থাইতে পারে; অগর লগে খেইলে, গুমিলে তার বা ঔ ঘরর মানুরতা তি ইতে পারে। বিষয় আহান বদলিয়া আমার জাতর বিতরে এমন রূপ আহান নিয়াসে বুল্লে ঔ প্রথা অহান মানানিই আমার জাত নিমুৎ অনার কারণ আহান ইসে।

আমার সমাজে এহান প্রথাহান ইয়া উবা ইল যে কোন মানু আগর জাতকুল, আচার-ব্যবহার, রীতি-নীতি,গারিগর গঠন- গাঠন হাবি হারপিলেও তার লগে লহং করিয়া সাকমাই না বাদিসি পেয়া তার আতর চা, পানি পিনা বা তার লগে আরিগ আগৎ হজক পিনা নাকরের। কিন্তু একেবারে অচেনা আগরে লহং করিয়া তার লগে খানা-পিনা গুমানি একরের। আবার আকিগ আছি লহং করিয়া সাকমাই বাদিয়া আড়ি আগৎ হজক পিতারা কিন্তু অগই সকলে নাখেইতারা। এসাদে আরাক হাস্যকর প্রথা আহার চল আছে যে Ñ গাঙরতায় ঘর আকিগরে কোন কোন সভাত পানা পেয়া নাদায়তারা কিন্তু খানার সময় লাইনহার মুঙহাত বহিলেউ আপত্তি নাথইতারা। নানা পরবে একলগে সকাসকি করিয়া খেইলে কোন দোষ নেই কিন্তু নিজর ঘরে সকাসকি দিয়া খেইলে খানাহান মাঙ অর। এসাদে প্রথার পিসে শাস্ত্রীয় বা যুক্তিসঙ্গত কোন কারণ আছেথাং? সমাজর গিরি-গিথানিয়ে এসাদে প্রথার হবা হবানেই দিক আলোচনা করানি না থকিসিলতা ? সেংমাং না মানতারা আর জাতর মানুয়ে হঙ্করতারা মিষ্টান্ন খেইতে কোন আপত্তি নেই, কিন্তু স্বধর্মী, স্বজাতি আগর হঙ্করা খাওন খানা নাকরের। এসাদে যুক্তি নেই রীতি নীতির চল সমাজর যে কতি তি করের অতা মাতিয়া লম নার। এসাদে হুর্কা চিন্তা ভাবনা অতা সমাজে এক নানির কা কাম করের। এসাদে যুক্তি নেই আচার ব্যবহারর কারণে আজি আগই আগরে জাতে তলপা নিঙ্করতারা। নিজরগ বুলিয়া মানিয়া নে নুয়ারতারা। আজি মৈতৈ সম্প্রদায় বিষ্ণুপ্রিয়া সম্প্রদায়রে, বিষ্ণুপ্রিয়া সম্প্রদায় মৈতৈ সম্প্রদায়রে, রাজার গাঙে মাদয় গাঙরে, মাদয় গাঙে রাজার গাঙরে, জাতে তল বুলিয়া নিঙ্করতারা। কোন সম্প্রদায়র হবা বংশর নিঙল আগরে অন্য সম্প্র্রদায়রাং লহং দেনা লাসহান নিঙ্করতারা। কিন্তু অহাত্ত হবা নেই নিজর সম্প্রদায়র কন্যা আনিয়া নিজরে মুক্তি দেনা চেইতারা।
সমাজর হে দাঙরিয়া গিরি গিথানি, কানার সাদে তাপ্প তাপ্প সালনির সময় আরতা নেই। নিজরে খাল্করানি, ভুল শুদরানির দিন আহিল। আপনা আসি হজাক অই। এসাদে যুক্তি নেই, ভিত্তি নেই আচার-ব্যবহার, প্রথার সংস্কার করানির কাজে মন দেই। এরে যুগ অহাৎ বিশ্বর লগে তালমিলিয়া চলে নুয়ারলে মণিপুরী জাতি এহান ভারত ইতিহাসর পাতাত্ত মাঙো যিতইগা। এহাত কোন সন্দেহ নেই। আপনা আসির কারণে আমার জাতর মন মন্দিরেত এসাদে হুর্কা চিন্তা ভাবনা যতই থেইতে থাইতই, সমাজে এক অনার ভাব অহান অতই বপিতে থাইতই। সমাজহান রাহুর দশাহাত্ত উন্নতির মিঙালনো মুক্তি পেইতই।

আপনা আসিয়ে হারপাস, বর্তমান যুগে এক ইলেই পাংকাল। যদি মৈতৈ বার বিষ্ণুপ্রিয়া সম্প্রদায় দ্বিয়হানি এক অনা পাররাং অতাইলে কাছাড়র লোকেল বোর্ডে বা আসাম পরিষদে আগর বেশি প্রতিনিধি থনা জানেউ হিন নাপেইবাং বার তাঙর পাংলাকন জাতীয় দাবি দাওয়া আদায় করতে ব্যর্থ নাইবাং। আশা থউরি দ্বিয় সম্প্রদায়র ডাঙরিয়া গিরি গিথানিয়ে এরে বিষয় অহান খালকরতাই। এহান ইলে মুঙেদে যে নির্বাচন ইতই অতার কাজে এপাগাত কাম করতে দ্বিধা নাকরিয়।



* ইকরা লেখা অহান আজিত্ব ৭০ বছর আগে ‘মেখলী’ পত্রিকাত (বসন্ত, গ্রীস্ম ও বর্ষা, ১৩৪৬-৪৭ বাংলা, ১৯৩৯ খ্রীঃ ) প্রকাশ পাসিল। মুল বাংলাত্ত বি.ম. ঠারে রূপান্তর: অঞ্জন সিংহ