Thursday, April 24, 2008

লেজ টুপ্পা য়ারি দুহান

(১)

লেইরা বাপক মালকর জিপুত দুগ। জেঠা অগর নাংহান বেঙ, খুলা অগর নাংহান করবেঙ। দ্বগিয়ই লেরিক তামকরতারা। ঘরে টেবিল আগ আছে, চিয়ার নেই। লেইরাপা বাপক হিন-দুকর মাজেউ চেয়ার আহান লুয়া আনল। কম দামে লুয়াসে চিয়ারহান পাং সুবিধাউ নাইসে। আনানির পরে কুংগ চিয়ারহাত বহানি এহান্ন পিতক দ্বগিয়ে ফক্করা ফক্করি দেনা অকরলা। চেয়ারহান্ন উসুলা উসুলি করতেগা পায়া চাইরোগি তুপিয়া গেলগা। মালকে দারৌর অভাব থানায় বাগা পায়াগি লেইরাঙে বরিয়া ভাতগি ফুতকরলি। আরাক আহান লনার আগে বাপকে লুয়াসিল চিয়ারহান হরিবল করে বেল্লা বেঙে করবেঙে। চিয়ারহান সুমসি করানিয়ে বেঙ করবেঙ দ্বগিয়েই আগের অসারে মাটিহাত বয়া লেরিক চানা অকরলা। চিয়ারহান নেই থাংতে চিয়ারম্যান অনার কাজে দ্বিয়ো বেইবুনির মারামারিয়ৌ নেই। চিয়ারহান পেয়া তি না মি বহানি বুলতে পাসিলা চিয়ারহানৌ হরিবল ইল। পাংকাল নেই বাপক আকসাদে আরতা দুহান চিয়ার লুয়া নুয়ারলো। বেঙ করবেঙর লেজ টুপ্পা য়ারিহান এহাতই লমিল।



(২)

আরাক লেজ টুপ্পা য়ারি আহানর অকরানি এসাদে। খাংদা আকদিন ফোন করল আনন্দদাই। মাতল, তোর লগে ডাঙর কাম আহান আছে। অতার পরে পদ্মাসন কাকায়ৌ ফোন করল। মাতল, ভানুগাছে যানা লাগতই। দ্বগিয়ই বয়সে জেঠ বার সমাজর নেতাগি হানতে না নাবুল্লু। পদ্মাসন কাকার গাড়িহান্ন পয়লাকা নগরে বার পিছে ভানুবিলে গেলাংগা। আনন্দদার লগে নগরেত আবীর কাকাউ গাড়িহাত কাহিল। গাড়িহাত কাহিলেউ কিতা ইবো তাম্ফাগোর মন্ত্রণালয়ত ফৌকরে নুয়ারলগা। অরগর মাহিয়ে থেতকরিয়া ভানুবিলে গাড়িহানরে যানা নাতলা। পিসে গাড়িহান থয়া দ্বিগল দ্বিগল কাকেই কারিয়া তাম্ফাগোর মন্ত্রণালয়ত কাহিলাংগা।
এহান বাক্কা কত বছর আগর য়ারিহান। পদ্মাসন কাকা সমাজ কল্যাণে পয়লা কিস্তি সভাপতিগো অনার কতদিন পরে।
ঔবাকা তাম্ফাগ কাকাই মোরে জবর বাহানা পেইল, এলাউ করল। পিসেদে করলু কার্যকলাপে এবাকা বাহানা পারনা আল্লিপার মাতে নারলু। তাম্ফাগ কাকার ঘরে ফৌয়ানিয়ে কাকিয়ে জামির সিরিয়া আনলগা। চিনিয়ে, নুনে পানিত লেইকরিয়া শরবত দিল শিউলিয়ে। শরবত পিয়া চুমিয়া গেলাংগা খা লেকির রন বিনিরাং। অহাত্ত বার আহিলাং তাম্ফাগ কাকার ঘরে। এহাত বহিয়া দূত দিয়াবেথিয়া ডাখানি ইল বাবুসেনা বিনিরে। পদ্মাসন, আনন্দ, তাম্ফাগরে সম্মান করের বাবুসেনা বার মি হালাকগ বুলিয়া আলাদা অধিকার থয়া চলুরি। অহানেতে তা অদিন জবর দিগল ইয়া নুয়ারল। হাবিয়ে জাতাপিতা করিয়া য়ারিহান বাট্টি করলাং। কাদার কৃষ্ণ কুমার কাকায়ৌ অদিনকার য়ারিহান হুনল।
পাকরেকুরা গিরি গিথানি, কিহান ইসিলহান অদিন। কিয়া আটলাংগা দিগল পথ ভানুবিলর মাটিত ? উদ্দেশ্যহান আকহান, আমার বিতরর য়ারৌ, কৌলি বাগানি। আমারতাই আমি না লাগানি। দীননাথ গিরকে হংকরিয়া গিয়াসেগা সমাজকল্যানর চিয়ারহানল সমাজহান দ্বিকরত নানি। চিয়ারহানর চিয়ারম্যান অনা মনেইতে চিয়ারহানৌ সুমসি নানি। পদ্মাসন সভাপতিগ অনাই ভানুবিলেত প্রতিবাদ দিয়াছিলা উপজেলা প্রশাসনে। পিসে ঔ প্রতিবাদ অহান তুলিয়া আনানিয়ে জিগ না লাগিল। ঔ পুরানা বিষয় অহান এমতাগাউ নুয়া করে ঘটিল। এমতাগা বাবুসেনায় নাবে, এ্যাড: রামকান্তদাই প্রতিবাদ করিছে। বিষয় এহান্ন আহিব দিনেউ আরাক কুংগয়ৌ প্রতিবাদ করতেউ পারে। রামকান্তদা ডালুয়ার মানুগ, মিয়ৌ ডালুয়ারগ। আত্মীয়তা বিসারলে আমার সাকেইগ। নগরর দয়াময় সিংহর বংশহানর মারি আকেইহাস। অতায়া কুংগৌ কার শত্র“ নাবে। পদ্মাসন-রামকান্তই বিষয় এহান্ন লাগিসি সময় অহাত সমাজর কতগই দ্বিয়গিরে ইথৌ দিয়া যিতারাগা। বুকগত পাথারি নায়া যন্ন জি ঠেলিতারা। এহানে তাঙি দ্বগিরতা লাভ অরনা কিতা কিগই জানে। কিন্তুমান সমাজ কল্যাণরতা লাভ নাইব। সমাজরতাউ লাভ নাইব। চিয়ারহান আসে করে উসুলা উসুলি কররাং, নেইলেতে ?
যেগউ যেতাউ করিয়া থাই। ঘরে ঘরে সভাপতি ইলেউ অই। হুদ্দা স্বর্গীয় দীননাথে থয়া গিয়াসেগা চিয়ারহান না বাগেদিও। চিয়ারহান্ন সমস্যা ইলে বেঙ করবেঙর সাদে মাটিহাত বহিয়া লেরিক চেই। কৌলি লাগানি মনেইলে চিয়ারহান এরাদিয়া ফক্করা ফক্কারি দেই, Ñ সাজারাঙে হমাদিয়া মাতুরি।


লেখক : সংগ্রাম সিংহ, সম্পাদক, ইথাক।

1 comment:

Sujit Kumar Singha said...

জবরে হবা লাগিল। থাকাত কাকা।