বিষ্ণুপ্রিয়া মণিপুরীর লৌকিক বিশ্বাস বারো মণিপুরর লোকধর্ম - ৪

কালঠাকুর
কালঠাকুর ওয়াহি এগোর লেপ্পা অরিজিন হারপানি চিলইসে কিয়াবুল্লে কোন প্রামাণ্য লেইরিক লেইসুত কালঠাকুরর উল্লেখ নাপেয়ার। পুল্লাপ অনিষ্টকারী দৌগো কালঠাকুরর গিরকরে লয়া য়ারিপারির সীমাসংখ্যা নেই। কালঠাকুর গিরকরে কুনো কুনোগই মহাদেবর রূপহান বুলিয়া নিঙকরতারা, কিন্তু মহাদেবর এসাদে পুল্লাপ নেগেটিভ স্পিরিটর পরিচয় কুরাঙৌ নাপারাঙ। তান্ত্রিক দর্শনর কালীমাই বুলতারা গিথানক অগর পুরুষাকারহান নিঙকরিয়া গিরকএগোরে কালগিরক বুলিয়াউ মাততারা। যেতাউ অক, কালঠাকুর ওয়াহি এগোর লগে কালারঙর সম্পর্ক আহান আসে এপেই কোন সন্দই নেই। য়ারিপারি বারো লোকবিশ্বাসর ধরনেত্ব মণিপুর মিথলজির কালাদৌ ওয়াঙবেরেনর লগে মান্নাপাআহান বিসারিয়া পেয়ার। কালঠাকুরর কুুসুহাত্ত চিংকরিয়া ফিজেৎকিতা হাবিতা কালা। গিরকএগো কুনোসমেইৎ কালা মানুগো বারো কুনোসমেইৎ কালা মোষগোর রূপহান দরিয়া নির্জন জাগাঅতাৎ বিশেষকরিয়া পহুরির পাড়ে, গাটরপাড়ে, বাহারসপার হাদিৎ, লপুকে, উরুমফামে লুকিয়া থার। বারোবাজিৎ, সেন্ধ্যাৎ বা রাতিনঙেই সিকসিক বরন দিলে গিরকএগো নিকুলিয়া আহের বারো মানু আখুলাআখুলি থাইলে উগোরে ধরের। গিরকে ধরলে মানু নিংসা দিফিয়া, থতাদে কলপুক নিকালিয়া মরতারা। গিরকএগোই শৌ সুমারারে পানিত বুরাদিয়াউ মারের বুলিয়া মাততারা। কালা রঙর মাছ বাজারেত্ত লয়া আনলে পথেত্ত গিরকএগোই থাবিয়া নেরগা বুলিয়া অধিকাংশ বিষ্ণুপ্রিয়া মণিপুরীয়ে বাজারেত্ত কালা মাছ নালইতারা। চাপাল দিয়া কালগিরকরে হারৌ করানি লাগের, ঔহানে নাইলে হারপাকুরা মেইপা দরিয়া ‘কাম’ করুয়ানি লাগের।

পাথরপুজা
আগে আমার মানুয়ে হিল বা পাথর দৌজ্ঞানে পুজা করেসি অহার প্রমান আমার সংস্কৃতিত এবাকাউ পেয়ার। কুনো কুনো লকেইর মানুয়ে হিলউতা মাটির কলআগৎ বরিয়া বারনগৎ বিতরে থইতারা বারো বছরহার লেহে আপোকপা হমাদেনির সমেইত ঔ হিলউতা নিকালিয়া সেলকমনো হিনাদিতারা। বারনগৎ নুয়া ধান বরানির আগে ধানর লগে হিল আকেইগো য়ৌকরানি লাগের। নুয়া ধান রইদগৎ হুকানির সমেইতৌ হিল উগো না বেলাদিতারা। এতাবাদে পহুরির পাড়ে, উঠানহাত তুলসীপুঙগৎ, গরর বিতরে উপুগর তলেউ হিল থনার চল দেহিয়ার। প্রাচীর মণিপুরর হিল উপাসনা কালচার নিয়া কলনেল জে. শেক্সপিয়ার বারো জে.সি. হিগিন্স গিরকে গবেষণা করেসি। মণিপুরর পুরাণ উতাত মৈরাঙর রাজপুরুষ য়াউসুরাকপা মরানির আগে হিলগোৎ সিলোসিল বুলিয়া মাতেসি। খাম্বা-থৈবীর য়ারিত যুদ্ধত সালনার আগে খাম্বাই খা-পিছবারার দৌ থাঙজিঙর নিঙে হিলআগর মুঙে দলামোষ আগো কাৎকরেসিল বুলিয়া উল্লেখ পেয়ার[২৬]।

রুকরসপা হমাদেনির কালচার বারো সংশ্লিষ্ট লোকাচার
দৌ নিঙকরিয়া রুকরসপা হমাদেনির কালচার অহান প্রাচীন নানান জাতির মধ্যেউ প্রচলিত কালচারহান। ৩৬৪ হান বৈশিষ্ঠপূর্ন গাছরজার (Scred Groves) মণিপুরে পেয়ার যেতা কুনো না কুনোভাবে দৌদুকর লগে সংশ্লিষ্ট। কুনো কুনো গাছজার দৌ থাইতারা লেইফাম বুলিয়া বারো কুনো কুনো গাছজাররে দৌ আকেইগর সমান মর্যাদা দিয়া পুজা কাৎকরানি অর। উঠানহার কোণগৎ তুলসীসপারে এবাকা যেসাদে পুজা কাৎকরানি অর অসাদে গাছজার উতারে আগেকার মানুয়ে পুজা কাৎকরলা। কুনো কুনো গাছজারে জাঙর পারা পড়লে হমাদেনা লাগের। ডাঙর গাছ আকজার সেদানির আগে ‘অমুকপারা দিনে তরে সেদানি অইতই’ বুলিয়া দিনহান লনা লাগের বারো সেদানির সমেইত তিনমাউ হমাদিয়া সেৎহান বেলানি লাগের। চেইলেই যেকুনো সমেইত যেকুনো গাছর জার সেদানির নিয়ম নেই, উতার কাজে লেপকরা দিন বা সমেয় থার। যেমন [২৮]-



গাছজার হমাদেনির কালচারর লগে সংশ্লিষ্ট লোকাচারউতা প্রকৃতি বারো প্রাকৃতিক রহস্যর বারে আমার পুর্বপুরুষর চিন্তাচেতনার পরিচয় আকেইহান। পৃথিবীর নানান আদিম জাতির বিতরেউ বৃপুজার চল দেহিয়ার। আগেকার মানুয়ে রুকরসপা আহানর বিতরেউ অলৌকিক মতাসম্পন্ন আত্মাআগোর অস্তিত্ত খালকরলা। আরাক বিশ্বাস আহান অইলতা পৃথিবীর হাবি বস্তু কুনো না কুনোভাবে দৌ-দুকে নিয়ন্ত্রন করতারা। মুলত দৌদুকরে হারৌ করানি, বরনবাদল, বজ্রপাত, দাবানল ইত্যাদি প্রাকৃতিক বিপর্যয়েত্ত বারো নুয়ারাপানিত্ত বাচানির সালে, কুনো কুনো ত্রেত শৌসুমারা পানার সালেউ মানুয়ে রুকরসবাত পুজা কাৎকরলা [২৮]। পাশ্চাত্যর পন্ডিত গবেষকে যেহানরে Animism বা সর্বপ্রাণবাদ বুলতারা ঔহার গৎআগো এহানাৎ পেয়ার। সর্বপ্রাণবাদর মুলে আসেতা রুকরসবা, গাছজার, পাথর, মাটি, বেলী, জুনাক ইত্যাদির বিতরে দৌর অস্তিত্ত খালকরিয়া ঔতার সক্রিয় উপাসনা।



তথ্যনির্দেশ:
26. Higgins, J.C., Notes on Manipuri beliefs and customs, London, MS 95069, pp 28
২৭. ইকোলজি বিভাগ, আসাম বিশ্ববিদ্যালয়র শ্রীজিতেন্দ্র সিংহ, শ্রীবিরাজ সিংহ বারো শ্রীঅভিক গুপ্ত গিরক গাছির 'Environmental Ethics in the Culture of Manipuris from North East India’ (2003)নাঙর রিসার্চ পেপারেত্ত খমকরেসু তথ্যহানি
২৮. K. Ashalata Devi, Sacred groves in Manipur, Dept of Forestry/NERIST, Nirjuli, 2005

লেখক : অসীমকুমার সিংহ