নুয়া করে চিনুরি মেয়েক

তি নিজে আমার গরে আয়া পাতা পারে দিয়ে যাগা
অ-মোর হমাজি, মোর বনক, প্রেমিকা... হাবিতা তি
বান্দারা খানার কাজে কুম্বাকা‘ত বাসিয়া মি আছু
আহিৎ পড়িল চেমা, নিভে যারগা রোদ, নিরাই করতালে
ঘুম, হুদ্দা ঘুম, মিতে প্রসাদ আহানৌ কই আজি
ভোগ করে নুয়ারলু, মিহুলেদে নপুর বাজের
রকতে আরতি শ্লোক বাগে বাগে যানার খেলতামে
তোরে আজি আকমু চিনং, তি হে মোর বনক, হমাজি
তি মোর ইত্তাউ, মোর প্রাণসই.. হাবিয়ে হারপাকা
বিতরে বাজের যদি ঠই নুয়া তালে, হাবি এক
চিনানির তঙাল তঙাল নাঙ নেই, অয়া লীন
একান্ত পরাণ মোর, মাটিৎ পারেদে পাতাহান
হাবিপদ অমৃতর নিজে আজি করং গ্রহণ।



কবি: শুভাশিস সমীর