অনথকপা খেলতাম আহাৎ উবা ইয়া - ৫

হাবিয়ৌ ইতিহাসবিদ হাবিয়ৌ ভাষাবিদ
কবি ব্রজেন্দ্র কুমার সিংহর য়ারি আহান নিংশিং অউরি। য়ারি অহান সংক্ষেপে এসাদে, বিষ্ণুপ্রিয়া মণিপুরী আগই কিউবান আগই রাশিয়ান আগই বারো আমেরিকান আগই ট্রেইনে যিতারাগাতা। আমেরিকান অগর লগে তাঙর দেশর উকিল আগউ লগ দরিসে। রাশিয়ান অগই সাম্যবাদর গপ, আমেরিকান অগই গনতন্ত্রর গপ - এসাদে হাবিয়ে নিজর নিজর দেশর গপ দেনা অকরলা। য়্যারি তর্কাতর্কিলো মত্ত ইসি অহাৎ কিউবান অগই খাংদা সিগার বাক্স আহান দুয়ারহানদে বেলাদিয়া মাতের- ‘বাই আমার দেশে সিগার এতা নিয়াম আকয়া!’ খানি থায়া রাশিয়ান অগই ভদকা বোতল আহান দুয়ারহানদে বেলাদিল- ‘বাই আমার দেশে ভদকা এতারেউ আকতা বুলিয়া না নিঙকররাঙ।’ খানি থায়া আমেরিকান অগই লগর উকিল অগরে দুয়ারহানদে উদাদিয়া মাতের- ‘আমার দেশে বাই উকিল এতা বপ আক‘পড়িয়া!’ লমিতেগা তিনগিয়ে বিষ্ণুপ্রিয়া মণিপুরী অগর অহানদে অলিলা- ‘তিতে?’ ‘- হাই মি বিষ্ণুপ্রিয়া মণিপুরীগ।’ ‘- অ। অহান ইলেতে তি ভাষাতাত্ত্বিক আগনাই।’ ‘না, না, মি ভাষাতাত্ত্বিকগ নাগই, ভাষাতাত্ত্বিকগ নাগই।’ ‘- মিছা মাতরতা! অহান ইলেতে তিতে বিষ্ণুপ্রিয়া মণিপুরীগ নাগই’ বুলিয়া পিসেকার ষ্টেশনে তারে গারগৎ দরিয়া লামাদিলা। যেতাউ অক, বি¯তারিত য়্যারিহাত নাযিয়ারগা। ‘ভাষাতত্ত্ব’, ‘ইতিহাস’ এতা ডাঙর ডাঙর ওয়াহি। আমিতে ভাষাবিদউ নাগই, ইতিহাসবিদউ নাগই গতিকে যেবাকা হুনরাং আমারতা ভাষাবিদ বারো ইতিহাসবিদর অভাব নেই অহাততে কালাক না‘পেলুয়িয়া নাররাং। থায়া থায়া যেবাকা হুনরাং অমুকে ইতিহাস আহান নিকালাসে, তমুকে ইতিহাস আহান লেংকরেসে অহাত মনহান চামর । চাম নাইতইতা কিদিয়া, ইতিহাস বুলিন এহান কম কথাহানথাঙ। হানতে ধনেশ্বর গিরকর অসাদে মিয়ৌ কতমারি আগে ইতিহাস ইকরেকুরা গিরক আগরাঙ গেসিলুগাতা মহাভারতঅহান ইতিহাসহান না কিহান, ইতিহাসহান ইয়া থাইলেতে কিয়া আমার শৌসুমারার ইতিহাসলেরিকে নেইতা, কিয়া পরীাত হুদ্দা পলাশির যুদ্ধর কারণ ও ফলাফল আহেরতা, কিয়া অর্জ্জুন-বভ্রবাহনর যুদ্ধর কারণ ও ফলাফল নাহেরতা ইত্যদি এসাদে আপাংপা প্রশ্ন কতহানলো। গিরকে ধমকআহান দিয়া মাতের ‘কুরাঙকার মুর্খগো! বেকগ্রাউন্ড অব আসামীজ কালচার, কালাছাই, হাডসন, গ্রিয়ার্সন, ডালটন এতা হুনিহতগো?’ মিতে নাহুনেসু হানতে ডরপিয়া কুনোমতে অহাত্ত পলিয়া লিতুইলু বারো অদিন হারপিলু ইতিহাস বুলিন এহান কমহান নাইসে। এমতাগা আমার গাঙর কানামাষ্টরেউ জবরদস ইতিহাস আহান লেংকরের বুলিয়া পৌ পেইলাং; মানুয়ে মাততারা- ‘এমতাগাতে খা‘য় লমিলাহান, জুতকরে দেসেগো!’। সমাজকল্যানএহান ইতিহাসবিদ ভাষাবিদে গে গে করতারা বুলিয়া হুনরাং; কতহান আগে সমাজকল্যানর মিটিং আহাত রেজুলেশন দিয়া ড: কালীপ্রসাদরে নিন্দা জানানি অসিল কারণহান গিরকে কিয়া মহাভারত-মণিপুর-শৌরসেনী থিওরিমতে না চলেরগো। হুনিয়া আমিয়ৌ যৎপরোনাস্তি কালাকপেলুইলাং; হায়হান নাই, গিরকে থিসিস করানির আগে আমার এতাপারা ভাষাবিদ বয়াআসি এতারাং আকমাউ কিতা আঙকরিসিলগো? ভগবানে দিয়া বারো বিষ্ণুর বরে আমার বিষ্ণুপ্রিয়া মণিপুরী এতা হাবিয়ৌ ইতিহাসবিদ আকৈগো নাইলে ভাষাবিদ আকৈগো। দু:খর য়ারিহানতে এহান, এতাহাবি ইতিহাসবেত্তা বারো ভাষাতাত্ত্বিক থাইতে মৈতৈর লগে লাগিসি একাডেমিক বিতর্কউহাত এবাকাউ লামআহান পিছে পড়িয়া থাইলাঙ। আসাম, ত্রিপুরা, বাংলাদেশ, যেহাতউ যিকগা- য়ারিহানতে হৌ আকহান। নাইলে কাস ফাইভর সমাজ লেরিকহাত মণিপুরী নিয়া নাগই-নাগইতা ইকরেসি অতা কিয়া এবাকাউ চুমকরে নার’রাঙতা, সংখ্যাগরিষ্ঠ অয়াউ কিয়া শৌসুমারার লেরিকে আমার মানুর নাঙসাত পেয়া নাপেয়ারতা, জাতীয় বিশ্বকোষ বুলিয়া নিকালাসি ‘বাংলাপিডিয়া’ত কিয়া বিষ্ণুপ্রিয়া মণিপুরীর কুনো উল্লেখ নেইতা - এতা আচানক ইয়া নিয়ানে আত দিয়া খালকরিন মাটিক য়ারি।


আহিতাং না কাদতাং?
বিষ্ণুপ্রিয়া মণিপুরীর ইতিহাসচর্চ্চার ধারাত হাবিত্ত জনপ্রিয় হাইপোথিসিসহান এসাদে - বিষ্ণুর ভক্ত বুলিয়া আমার জাতহার নাঙহান বিষ্ণুপ্রিয়া। আমি মহাভারতর বীর অর্জ্জুনর পুতক বভ্রবাহনর বংশধর বারো আর্য্যবংশীয় ত্রিয়। মণিপুর এহান প্রাচীনকালেত্ত আমার মানুয়ে রাজত্ব করিয়া আসিলা, পিসে অনার্য্য মঙ্গোলয়েড গ্রুপর মানু (মৈতৈ) আহিয়া আমার মানুরে মণিপুরেত্ত তালকরলা বারো মণিপুরহান দখল করলা। মৈতৈয়ে আমার জাতর ইতিহাস হাব্বি ধ্বংস করিয়া পারিলমাহি নুয়া নুয়া ইতিহাস ইকরলা। এসাদে আমার মানু রাজ্যহারা ইয়া মণিপুর বেলিয়া নানান জাগাত ছিতারলা। চেইতে হুনতে য়ারি এতা যেসাদে নুঙেই বারো আবেগর হৎআগো আনের, যুক্তিলো বিচার করাত বহিলে অসাদে আশাব্যঞ্জক নার। প্রথমত: দিহৌ য়াঙ্ঘেই বছর আগে মণিপুর বেলিয়া আমার আপাবপায় আসাম, ত্রিপুরা বারো বাংলাদেশে লামপাতেসিলাতা মৈতৈ’র ডরে নাগই, রাজনৈতিক অস্থিতিশীলতা বারো বার্মার লগে মণিপুরর যুদ্ধর কারণে। দ্বিতীয়ত: আমার মানুর লগে ঔ সমেয়ত মৈতৈ’য়ৌ মণিপুর বেলিয়া দাবদেসিলা। উহানেতে মৈতৈ বারো আমার মানুর বসতির লয়া এতাউ কাদাকাদি অসে। গতিকে আমারে তালকরিয়া বারো আমার লগে লগে আয়া বসবাস করানি এহান যুক্তিত লাক্করানি নার। তৃতীয়ত: বিষ্ণুর ভক্ত ইলেই জাতহান বিষ্ণুপ্রিয়া অনা লাগতই এসাদে কোন কথা নেই। ভারতবর্ষর আরতাউ বহু জাতি বিষ্ণুর ভক্ত, তানুরে কিয়া ‘বিষ্ণুপ্রিয়া’ নাবুিলয়ারতা? হুত্তুমে আমিতে বিষ্ণুর পুজা নাউ করিয়ার, করিয়ারতা কৃষ্ণর আরাধনা। চতুর্থত: মহাভারতর বর্ণনামতে বভ্রবাহন রাজপুরুষগ’, হেকঠেলাহানলো সমগ্র বিষ্ণুপ্রিয়া মণিপুরী জাতহানরে রাজপরিবারর বংশধর বুলতে গিয়া মণিপুরর বাকী প্রজাহাবিরে গননাৎ না ধরলাং; অর্জ্জুন আহানির আগে মণিপুরে কিতা টেইপাঙ মানু নেয়সিলাহান? পঞ্চমত: ইতিহাস ধ্বংসর যে ঘটনাহান আমার ইতিহাসবিদে মাততারা উহান অসেতা রাজা গরীবনেওয়াজ পামহৈবার(১৭০৯-১৯৪৮) আমলে যেবাকা শ্রীহট্টত্ত শান্তিদাস গোস্বামী গিরক মণিপুরে গেসিলগা হিন্দুধর্ম প্রচারর কাজে। রাজা পামহৈবা নিজে রামান্দি বৈষ্ণবধর্মে দীা নেসিলগা বারো প্রজাউতারেউ বাধ্য করেসিল; এপেই শান্তিদাস বা পামহৈবার উদ্দেশ্যহান আসিলতা হিন্দুধর্ম প্রচার, এহানলো কুনগরতাউ দ্বিমত নেই। প্রশ্নহান অইলতা হিন্দুধর্ম প্রচার উদ্দেশ্যহান থাইলেতে কিয়া প্রাচীন হিন্দু আর্য্য সভ্যতার ইতিহাস, সাহিত্য, দলিলপত্র মাঙকরানি ইতইতা? বকলমেউ হারপিতাই হিন্দুধর্ম প্রচারক আগই আর্য্য-ইতিহাস ধ্বংস নাকরবো বা ধ্বংস করানির কাজে থৌতাল নাদবো। হুত্তুমে পামহৈবায় ধ্বংস করেসিলতা মুলত মনিপুরর লৌকিক ধর্মর প্রাচীন পুরাণ যেতারে বৈষ্ণবধর্ম চল করানির মুঙে বাধা বুলিয়া নিংকরিসিল।
আরাক দু:খজনক প্রবনতা আহান মৈতৈরাংতো আমারাং হাচুরাসে অহান ইলতা অনার্য্য ওয়াহি রে মনগড়া ফনেটিক মডিফিকেশন দিয়া আর্য্যশব্দ হংকরানি। আতম্বাপু, ইবুংহাল, য়ুমজাউ, খেলেচন্দ্র, ঝালজিৎগাসির লগে ফাংনা দিতে গিয়া আমার ঠারর লামসাম চাইরলিশিং অনার্য্য-শব্দরে অস্বীকার করতেউ আমারতা বিবেকে নাবাদের। গন্ধর্ব্বত্ত ‘ময়াং’, সোমরসেত্ত ‘সেলকম’, ‘মুকুরা’ত্ত মেঙসেল, মহীরঙ্গ দানবেত্ত ‘মৈরাঙ’- এসাদে ক্রিয়েটিভ চিন্তা দেখলে পাণিণি গিরকেউ নুমপাঙ ইতই। কিন্তুমান ‘বিষ্ণু’রাংতো ’পাখাংবা’- এহানতে কিয়ান? বিষ্ণুয়ে কুমপাগা পাখা সাৎকরেসিলতা হারনাপেইলাঙ, লেমতলগ’লো বিসারিয়াউ বিষ্ণুরতা পাখা আসে বুলিয়া কোন বৈদিক গ্রন্থত নাপেয়ার। আমার কিতাপারা ভাষাবিদ গিরক আগই মাতেসেতা বিষ্ণুপ্রিয়া মণিপুরী ঠার এহান ভারতবর্ষর যত আর্য্যভাষার হাবির আগে হঙসেহান- হিন্দী, বাংলা, অসমীয়াতাউ আরো আগে উনি। কততাই বারো কাকেই দুহান আগুয়িয়া আমার ঠারর লগে চর্যাপদর হুবহু মিল বিসারিয়া পেইতারা। উগ্র হিন্দুবাদী মানসিকতা বারো মহাভারতর মিথলো হাবিতা ব্যাখ্যা করতেগা গ্রহনযোগ্যতা বুলিয়া কথা আহান আসে অহান পাহুরানি ঠিকনেই। হংকরা আবেগলো এসাদে বাবুয়ানি দেথলে আহিতাং না কাদতাং উপনারিয়া আমিতে দিমনদিশা অরাং। তথ্যপ্রযুক্তির যুগ এহাত মানুরে আগেতার দেকি বিবুলা করানি হিন, ঠুলনেই হুকানা যুক্তিলো নাপাল করানির দিন এবাকা নেইল।


‘চহা হেইনৌ ঠুমতা বুলিয়া কয়দিন বেসানি’
যুক্তির মাতুং ইলয়া ইতিহাস বিচার করানি লাগের, আবেগলো নাগই। দু:খর কথাহান বিষ্ণুপ্রিয়া মণিপুরীর ইতিহাসচর্চ্চার ধারাত যুক্তির ফাম নেই, বারো যেতা এসাদে ইথৌ করতারা তানুরে হাবিয়ে আসুলিয়া তলে বেলাদিতারা, কততাই বারো আমারতাতে খুটিআগো লাগেরনাই বুলিয়া অন্ধআবেগরাং বুদ্ধিলৌশিং কাতকরতারা। জাতহানরে গজকাকরতে গিয়া গারিগৎ দাবদের আপাবপার পাঙকালপা রকত অস্বীকার করানির সমান পাপ আরতা নেই। আমার পূর্বপুরুষ বৈদিক আর্য্য ইলেউ হবা, অনার্য্য ইলেউ হবা, ডুমচারাল ইলেউ তিনেই, মচিয়া-নাফেৎ-জাংদকুরা ইলেউ উহানলো আমি গর্বিত। সত্যঅহান সত্যহান, সত্যঅহানরে মুৎকরানির পাঙকাল কারতাউ নেই। বালির গজে লরক-খরক গরগ হংকরলে আজিকালি বুলিয়া কতদিন আহান চালানি অকরতই, কিন্তুমান বৌবুলন আহিলে হাবিতা বাগিয়া নিতইগা। ইতিহাসর গতিত, সময়র ইথাকে, কালর বিচারে কারতাউ হুরিৎ নেই।
রাজমোহন নাথ গিরকর 'দি ব্যাকগ্রাউন্ড অব আসামীজ কালচার' লেইরিক এহান আমার বিষ্ণুপ্রিয়া মণিপুরীরাং জনপ্রিয় কিয়াবুল্লে বিষ্ণুপ্রিয়া সম্পর্কে গিরক ঔগই নুঙসি নুঙসি কথা মাতেসে; গিরকে কালাছাই শব্দ এগরতাউ মধুর ব্যাথ্যা আহান দেসে। আমার মহাভারতি ইতিহাসবিদ, ভাষাবিদ, গবেষক গিরকলকেয়ে লেইরিক এহানরে বেদহার দেহি নিংকরতারা। তলে ব্যাকগ্রাউন্ড অব আসামীজ কালচারেত্ত পারেঙ কতহান হুবহু তুলেদিলু -
“it is very clear that the kingdom of Manipur where the father of Chitrangada reigned was somewhere in the south-western part of India... The father of Ulupi reigned definitely near about present Haradwar in the United provinces.” (The Background of Assamese Culture/R.M. Nath, 2nd Edn, 1978, page -85)



কলামিস্টঃ রসরাজ শর্মা, বামুনটিলা।

অনথকপা খেলতাম আহাৎ উবা ইয়া -৪

নিজর কপাল নিজে খেইলাঙ
বহির্জগতে মণিপুরী বুলিয়া আমার পরিচয়হান এবাকাউ ঙালকরিয়া থসে আমার রাস রাখুয়াল কীর্ত্তন পুঙচোলম খুবাকিশৈ বাসক এসাদে গভীর বারো উচ্চরসবোধসম্পন্ন সংস্কৃতি এহানিয়ে। মাততে গেলেগা আমি দুনিয়াএহার লগে উনাউনি অসিতা আমার সংস্কৃতির এরে মারৈ এহানিলো। আমার ভাষাসাহিত্যরতা গর্ব করেপারিল অতীত নেই, ভবিষ্যৎহানউ অন্ধকার। লোকসাহিত্য বুলিয়া নাপাল কররাঙ ঔতাউ চারি’পাচহৌ বছর আগেকার বরন ডাহানির এলা, মাদই সরালেল এলা বারো বুড়াবুড়ির য়ারি কতহান। আমার সংস্কৃতির হাবিত্ত দৃর্বল দিকহান লোকনৃত্য লোকগীত বুলিয়া কিত্তাউ নেই আমারতা। আমার মৈতৈ বেইবুনিয়ে হুদ্দা লোকনৃত্যলো মাহাআকেইহান অনুষ্ঠান করিয়া যিতারাগা, আমারতাতে অনুষ্ঠান আহান হাঞ্জেইলে বারহানটা পিদিয়া খুপাঙলো ‘খিতা-খিত-জাং’ বুলিয়া আগে নিকুলানি লাগের। সভ্যতা শিল্প সংস্কৃতির লীলাভুমি মণিপুরর মাটিত যুগ যুগ থায়াউ কিয়া আমার লৌকিক সংস্কৃতির ভান্ডারএগো আলথকপী নিঙলর বারনগর সাদে হুদালা অয়া থাইলতা এহান আচানকর য়ারিহান।
চারিপাচবছর আগে ইথাক পত্রিকাত রাজকান্ত সিংহ গিরকে রাসর নাছাত মুদ্রার অপপ্রয়োগ বারো বিকৃতি নিয়া নিয়াম গুরুত্বপুর্ন লেখা আহান ইকরেসিল। রবীন্দ্রভারতী বারো ছায়ানটর নৃত্যসমঝদার উতায় আমার রাসঅহান বিকৃত এলার লগে ভুল নাছার জিয়ানাহান বুলিয়া মাতিয়া গেসিগা উহানউ গিরকে দু:খ পেয়া মাতেসে। রাসর তত্ত্ব-মাহাত্ম্য-দর্শন কিত্তাউ হারনাপেয়া আকদিন তামকরিয়া রাখুয়াল বা দ্বি’দিন তামকরিয়া রাস আকেইহান করেবেলিঙ বুলিয়ারথাংতে কিহান করানি। বারর মানুর মুঙে নাছাআহান চুমকরে দিঙবুল্লেতে নাছাঅহার রীতি, মুদ্রা, লয়, তাল, ভঙ্গিউতা আয়ত্ত করানি লাগের, জকজকা বার-মেইখুম্বী পিদিয়া আতজাঙ লারিলেই নাছাহান নার। নাছা আকেইহার কম্পোজিশন আগেকার গুরুয়ে পুল্লাপকরে লেপকরিয়া থদেসি; তাল-মূদ্রা না হিকলাং বালা, গুরু পরম্পরায় পারাঙ অনুকরন-বিদ্যা এহানউ আমার রাসধারিয়ে ফাৎকরে দরিয়া থনা নারতারা। মণিপুরর লৌকিক নৃত্যধারা যেমন মাইবী জগোই, লাইবৌ জগোই, পান্থইবী জগোই এতার তাল মুদ্রারে বাগিয়া যে রাসনৃত্যহান লিঙখাত অসে অহান বপদিন আগর কথাহান নাগই। আমার মানুর হাবিত্ত ডাঙর ভুলহান মণিপুরর মুলধারার সংস্কৃতিউতা তানু সেচেয়া বেলিয়া ঙক্করেসিতা যত আরোপিত বারো অপোকৃত আধুনিক ফর্মউতা, যেতা হুদ্দা বৈষ্ণব ধারার লগে সম্পর্কিত। আঙম-মৈরাঙ-খুমল-লুয়াঙ-মাঙাঙ আমার নিজর লাম ইয়া থাইলেতে আপাবপার ঐতিহ্য, চিন্তা, জিনার য়ারি, লালফাম, অভিজ্ঞতার য়ারিপরিলো মূর্ত্তিপালসে মণিপুরর লৌকিক সংস্কৃতির পাঙকালপা বারনঅগো আমারগউ, হুদ্দা মৈতৈ’রগো নাগই। আর্য্যত্বর আবেগে বিভুলা ইয়া আমার মানু বপাবপেইর সভ্যতা-সংস্কৃতি-সংগ্রামর ইতিহাস পাহুরিয়া নিজর লগে লাহুলে বঞ্চনা করেসি, এরে আত্মবঞ্চনা আমারে সাংস্কৃতিক শুন্যতাআহাত নিয়া বেলাসেগা যেহান শিরাপহার সাদে প্রজন্মত্ত প্রজন্মত আমারে হিন লাকলা দিয়া আহের।

নিজর ঠারে রাস রাখুয়াল কীর্ত্তন: এ জনমে না হৌজনমে?
যে রাস রাখুয়াল পালাকীর্ত্তন আমারে ইঙাল ঙালকরিয়া থসে, ঔ রাস-রাখুয়ালর এলা এবাকাউ আমি দিয়ারতা বিজাতীয় ঠারে। ইতিহাসর বারাদে আলথক অইলে দেকতাঙায় অষ্টাদশ শতাব্দীত শ্রীচৈতন্যর ভক্তি আন্দোলন মণিপুরে থুঙিলগা সমেইৎ বাংলাত্ত বঙ্গদেশ পালা (মতান্তরে আরিবা পালা) বুলিয়া কীর্ত্তনভিত্তিক এলা নাছা জাতআহান মণিপুরে হমাসিলগা। ঔতার লগে মণিপুরীর নিজস্ব সুর, তাল, রাগ-রাগিনী (তিনহান তঙাল মাত্রার তা, রি, না) সুমকরিয়া ঢাক, করতাল, মঞ্জিলা, মাঙকাঙ, সেলবঙর, মইপঙর রৌ’লো আনৌবা পালা বুলিয়া মণিপুরী পালার নিজস্ব ফর্ম আহান হঙসিল। বৈষ্ণবধর্মর প্রভাবে চারিয়বেদে জয়দেব, গোবিন্দদাস, জ্ঞানদাস, কৃষ্ণদাস প্রমুখর ইকরা বৈষ্ণবপদাবলীর জয়জয়কার চলিসিল। ঔ সমেইৎ ব্রজবুলি, বাংলা, সংস্কৃত বারো মৈথিলী ঠারে লেংকরা পদাবলী কীর্ত্তনর এলাঅতা মণিপুরর মানুয়ে সুপৌ হারনাপেয়া দিয়া গেলাগা। পিসে পিসেদে মণিপুরর অজালকেয়েউ নিজর ঠারকিতা বেলিয়া ব্রজবুলি, বাংলালো পালা লেংকরানিত গৈ লাগলা। আজি রাস-রাখুয়ালে আমি যে এলা দিয়ার এতা বাঙালী বৈষ্ণবপদকর্তার লেংকরা এলা - বাংলা, ব্রজবুলি নাইলে মৈথিলী ঠারে। আমার দেকি মৈতৈয়ৌ পয়লা পয়লা মিয়াঙর ঠারলো এলা দিয়া গেলেগাউ পিসেদে এলা অতারে তানু নিজর ঠারে অলকরিয়া গাইলা। দিহৌ বসর আগেই তানু ভাগবৎগীতা, ভাগবৎপুরান, চৈতন্যচরিতামৃত, গীতগোবিন্দসহ বাংলাভাষার বৈষ্ণবপদাবলী নিজর ঠারে অনুবাদ করিয়া হদেইলা। নংসাঙ দিন বাদে কাছাড়ে আমার সাহিত্যিক বারো অজা গিরকলকেইরাং চেতনাঅহান আহিল। তানু হারপেইলা, নিজর ঠারহানরে দুরেই করিয়া থয়া মিয়াঙর ঠারলো রাস-কীর্ত্তন করিয়া করিলতা কিত্তা নেই, নিজর ঠারহানরে না য়ৌকরলে জাত বা সংস্কৃতি কুনোহানৌ না পালইতয়, বরং নিজর ঠারহানেই আকদিন নিঙসিঙর অতলে লেইমাঙ অইতই। মৈতৈর দেখাদেখি তানুয়ৌ বাংলাত্ত বিষ্ণুপ্রিয়া মণিপুরী ঠারে অলকরিয়া বা নিজে লেংকরিয়া এলা দেনা অকরলা। কাছাড়ে এবাকা রাস রাখুয়াল পালা কীর্ত্তন হাবি আমার ঠারে অর।
বাংলাদেশর ভানুগাছ লয়া এগো দ্বিতীয় মণিপুর বুলিয়া নাঙ কাহেসেগো। গীতিস্বামী গোকুলানন্দর জন্মস্থান এহাত জরম অসি গুরু নীলেশ্বর মুখার্জ্জী, ভদ্র অজা, রামসিং অজা, অজা হুনারু, অজা ব্রজগোপাল, দীননাথ সিংহ, নবদ্বীপ সিংহ, বলরাম সিংহর অসাদে নাঙপালপা মানু। বিশ্বকবি রবীন্দ্রনাথ ঠাকুর গিরকে শান্তিনিকেতনেত্ত বিশ্বর মুঙে মণিপুরী নাছারে উচপা ফাম দিলোতা মাছিমপুরে আমার নিঙলর রাসলীলা দেহিয়া। বৃটিশ আমেলেত্ব দরিয়া এপেইৎ সাহিত্য-সংস্কৃতির চর্চ্চাউ কমনেই। সংস্কৃতি ঙালকরানি পালকরানির কাজে মণিপুরী ললিতকলা একাডেমী বুলিয়া আগো সরকারে আমারে দিয়া থসে। এতা হাবি থাইতেউ দু:খর কথাহান বাংলাদেশে এবাকাউ কোন রাস বা রাখোয়াল আমার ঠারে নাইল; ললিতকলা একাডেমী, মণিপুরী রাসলীলা উৎযাপন পরিষদ বা আমার অন্য কোন সাংস্বৃতিক সামাজিক সংগঠনে এসাদে কোন থৌরাঙ নাকরেসি বা নাকরতারা। নিজর ঠারে রাস রাখুয়াল কীর্ত্তন আমি কুম্পাগা দেখতাঙাই হারনেই, এ জনমে না হৌজনমে?

মি থাইতে মিয়াঙগই কিয়া বকসাহান বয়া হিনপেইতইতা!
কাছাড়ে যেবাকা এলাত আমার ঠারহান চলিল ঔ সময় কততাই আমার ঠারে এলা দিলে রাসÑকীর্ত্তন-পালার ভাব, রস, পবিত্রতা মাঙইতই বুলিয়া প্রচার করলা বারো ইমারঠারে কীর্ত্তন গানা এহান পাত্তলপাহান বুলিয়া ইসালপা-রাসধারীরেউ খামকরলা। তানু বাংলা-সংস্কৃতরে দেবভাষা বুলিয়া নিংকরলা। অথচ বেদ, উপনিষদ, ভাগবৎপুরান কুরাঙউ লেখা নেই বৈষ্ণবকীর্ত্তন বাংলানো বা কুনো লেপ্পা ঠারে দেনা লাগতই। নিজর মাতৃভাষাহানরে নাকানহানদে বেলিয়া থয়া মিয়াঙর ঠারহানেই ডাঙর বুলিয়া মুরগত কাকরিয়া নাছানির মূলে আসিলতা আতলপা দাস-মনোবৃত্তি। আজি একবিংশ শতাব্দী ফৌয়িলগা, ঔ দাস-মনোবৃত্তিত্ত আমি এবাকাউ লিতনি পারলাংতা? তলে কাকেই পত্রিকার ২৩ এপ্রিল, ২০০৬ সংখ্যাত্ত পৌ আহান তুলেদিলু -

বাংলা ভাষা দেব ভাষা - সাহিত্য সভার মতে
শিলচর: শিলচর সাংবাদিক সম্মেলন আহাত বিষ্ণুপ্রিয়া মণিপুরী সাহিত্য সভার সভাপতি মণিকান্ত গিরকে কথা প্রসংগে মাতেসেতা ‘চৈতন্য মহাপ্রভূর মাতৃভাষাহান বাংলা। উহানে বাংলাভাষা এহানরে দেবভাষা বুলিয়া নিংকরিয়ার।’ প্রেসমিট উহানাত সাহিত্য সভার সাধারন সম্পাদক নগেন্দ্র কুমার সিংহ, নীরেশ কুমার সিংহ বারো অডিটর মুক্তা সিংহ বারো ডাঙরিয়া সভাপতি মণিকান্ত সিংহ স্বয়ং...
- সাপ্তাহিক কাকেই, ধরমনগর, ত্রিপুরা। ২১ বর্ষ ১৭ সংখ্যা, ২৩ এপ্রিল ২০০৬

কলামিস্টঃ রসরাস শর্মা, বামুনটিলা।

অনথকপা খেলতাম আহাৎ উবা ইয়া -৩

কালে কালে কালর কথা হাব্বি হুনলেউ বেসেপ
গোকুলানন্দ গীতিস্বামী গিরকে কিতাপারা সময় আহাত মাতে বেলাসিল ‘কালে কালে কালর কথা নাহুনানি নাকরের’। গীতিস্বামী গিরকর কথা এহানি এবাকা ফ্যাশনহান ইসে। সভা সমাবেশ মিটিং পদএগি না তুললে জ্বালাময়ী বক্তৃতাহান পুরা না’র পারা। ‘কালে কালে’তে নানান কথা নুকুলের, আমি কিসারে কথাহান কার কথাহান হুনতাঙাইহান এহানউ চিন্তার বিষয়আহান। গীতিস্বামী গিরকে যে সময়ে পদএগি ইকরেসিল ঔ সময়র লগে, ঔ প্রোপটর লগে এবাকার নিয়াম পার্থক্য। চিন্তার দিকেত্ত মানু রনশীল ইসিলা হায়হান, কিন্তু ঔ সময় এবাকার সাং¯কৃতিক শুন্যতাএহান নেইসিল। সময়অহাত গাঙঅতা নুঙশি-নুঙেই কুমেই, যাত্রা, ফাগি, বাসক, খুবাখুশৈ, পালা, রাস, রাখূয়াল, আরতি, কীর্ত্তনলো মুখরিত ইয়া থাইল। খানার চউল, ডাইল, থৌ, হৌপাতেত্ত অকরিয়া পিদানির ফুতিহান পেয়া নিজে ফলিলা, বুনলা। গাঙগরে ইসালপা, ডাকুলা, রাসধারী, সুত্রধারী, বাসকউলীর অভাব নেইসিল। আজিকালিকার দেকি শিতি-মুর্খঅতাউ নেইসিলা, ডিগ্রীধারী-গর্দভ অতাউ নেইসিলা কিন্তু হারনাপানির বিতরেউ সুসংস্কৃত সমাজ আহান আসিল। ঔ উৎপাদনমুখী সৃজনশীল সংস্কৃত সমাজঅহান এবাকা নেইল। কালর চেপাহাত পড়িয়া হাবি বাগে বাগে গেলগা। কাঙরপালির জয়দেব-খিসুরি, কার্ত্তিকর পালির কাবক, লেরিক হুনানি, গিল্লাখেলা, পাকানা বাহার ককারা লাঠিলো কাংচেই খেলা, লাকাটি সিংনা, বপা-ডাঙ্গর য়্যারি হাবিয়ে পাহুরানি অকরলা। দিন যারগা মাহেই মানু আত্মকেন্দ্রিক বারো ভোগবাদী অ’পরলাগা। বিজাতীয় সংস্কৃতি গোলার হতগর সাদে উরউর হমা আহের। এসাদে অবহেলায় অনাদরে তাপ্প তাপ্প তুম’যারগা যারগা আপাবপার হংকরা রুহিবৃত্তির পাংকালপা বারন অগো।


অর্জ্জুনর বংশধর না ডুম-চেরাল ?
ঠেইপঙর কসর সাদে আমার চরিত্রত নাপুইসে আরাক মনোবৃত্তি আহান ইলতা দাস মনোবৃত্তি, ইংরেজীলো যেহানরে স্লেভারি (ঝষধাবৎু) বুলতারা। নিজরতালো লাসপানি, মানুরতালো ডাঙরসানি এহান ঔ দাস মনোবৃত্তি’র ফলহান।

নিজর ঠার বা মাতৃভাষালো অতারতে গর্ববোধ করানি এহান সভ্যজগতর চলহান, আমারতা উল্টাহান ইসে। টাউনবন্দরে দ্বিদিন-আকদিন থা’পড়লেগাই আমিতে নিজর ঠারহান পাহুরেবেলারাং। ‘আমার সৌ’তে মানুরথার হবাকরে হারনাপেইতারা’ বুলিয়া আমার মালকনকেয়ে লাসপানিতে দুরেইৎ থাক, বরং ডাঙর ইতারা। আমার শিতি ফ্যামিলি যেতা টাউনে অথবা গাংগরে থায়াউ সৌ-শুমারারে হুরকাং কালেত্ত মিয়াঙর ঠার হিকাদিয়া ডাঙর করতারা, তাঙি অহানরে স্ট্যান্ডার্ড জীবনযাত্রার অংশআহান নিংকরতারা এবাকাউ। নিজরতা তলকরিয়া মানুরতালো ডাঙর অনার হৎনা এহান তাঙর মূর্খতা বা বুদ্ধিবৃত্তিক শূন্যতাহান’রেই শা শা করে দেখাদের। তর্ককরেকুরায় যদি এসাদে লেপা দেনা চেইতারা, বাংলা অতারলে তোরতা কিহান ইলথাং, উহান ব্যক্তিগত ব্যাপারহান, এহাত মোর কথাহানি পরিষ্কার- ঠার এহান ব্যক্তিগত ব্যাপারহান নাবে, এহান ইলতায় স্পেসিফিক মাধ্যম আহান যে মাধ্যমহানলো কোনগই মোর লগে কমিউনিকেট করতারা। মোরতা নিজর কোন ঠার নেইলে কথা নেইসিল, কিন্তুমান মোর জাতরগ’ ইয়া মোর লগে মোর ঠারহানলো না অতারলেতে মি অপমানবোধ করুরি, আত্মসম্মানে লাগের। মোর ঠার এহান লেইরা ইলেউ, মোর ঠার এহান মানুরাং সাক্তি ইলেউ মোরাঙতে হুনার তা¤ফাগ’।

লহঙে কাবক বেলিয়া জিলাপী-রসগোল্লা খাওয়ানি চলহান ইয়াপলগা। হরাহার গজে চিনি-অতা কাবক, মুড়ির লারৌ, থুইদিঙর লারৌ, মাংগারা, থাম্বৌর চিলাহার অপার সৌন্দর্য্য দেহানির উপায় নেই। বাজারর জিলাপী রসগোল্লা মিষ্টিলো কাম চালিতে চালিতে এবাকা এহানই বেদ’হান। ওয়ারৌপথ এহান বৈষ্ণব সেবাহান, বৈষ্ণবসেবার প্রসাদ শাস্ত্রসম্মত বারো সাত্ত্বিক অনা লাগের; মিয়াঙর হঙকরা মিষ্টি কিসাদে বৈষ্ণবসেবাত প্রসাদর মর্যাদা পারতা খালকরানির মানু নেই। লহঙর খরচ বাড়িল, ফ্রীজ-মটরসাইকেল-কালারটিভি নাইলে নিঙলর লহঙ নার। মিয়াঙর দেখাদেখি এবাকা গায়ে হলুদ, চতুর্থ-মঙ্গল, মদ্যপানর আসর ইত্যাদির চল নিকুিলল। পুজাপার্ব্বন, সামাজিক অনুষ্ঠান এতাউ এবাকা মিয়াঙর আদলে করানি চেইতারা। বেয়াপা শাড়ী পিদানি হাদাপেইতারা, কিয়াবুল্লে লাহিং-চাকসাবী শাড়ীর অসাদে কমফরটেবল নার। গরর খইতুগ’ বুলতারা ফুংগাহান কারো গরে বিসারিয়া নাপেয়ার। গিথানিপুঙগর জাগাহান বাজারে'ত ল’সি দুর্গা-মাহাদেবর ফটোগয় কালকরলো। এমাটিক রুচিসম্পন্ন সংস্কৃত সমাজ আহার এসাদে তললামানি দেহিয়া দূ:খ লাগের। পিদানির ফুতিহাত্ত ধরিয়া খানার মাথেল, শিল্প, কলা, সংস্কৃতি, বিজ্ঞান... আমার আপাবপায় কিতা নাকরিয়া গেসিগাতা আমার কাজে? আমিতে আমার ভবিষ্যৎ প্রজন্মর কাজে কিত্তাউ করে নারলাং, আপাবপায় আমারাং সিলকরিয়া গেসিগা কালচার অতাউ তাঙরাং সিলকরে নারলাং -এহাত্ত জিঙিন হীন বারো লাসর কথা আরতা নেই।


কাকাড়া বিসারতে হরপ!
অর্জ্জুন-বভ্রুর আর্য্য বংশধররাং এসাদে দাস মনোবৃত্তি কিসাদে হাচুরলো অহার বৃত্তান্তহান হারপানি চিল। কোন আধুনিক প্রমাণিক ইতিহাসগ্রন্থে আমার জাতর নাংসাৎ পেয়া নাপারাং; দুহান আহান বিদেশীর ইকরা লেইরিকে হেইরাপ উল্লেখ পারাঙ, অহানউ ডুম-চেরালর বংশ বুলিয়া। এহান কুপকরে খালকরিল বিষয়হান ইসে। এবাকা হুদ্দা ঠারহান, নিঙলর লাহিং-চাকসাবি বারো গাঙগরে লেইরাপা অনুষ্ঠান কতহানালো জাতহান বুলিয়া টিকিয়া আছিহান।

নিজর সংস্কৃতিহান বেলিয়া আরাক সংস্কৃতি আহান নিজরহান বুলিয়া গ্রহন করানির মধ্যে, নিজর মাতৃভাষাহান বেলিয়া আরাক ঠার আহান মাতৃভাষাহান বুলিয়া গ্রহন করানির মধ্যে কিহান স্ট্যান্ডার্ডহান, কিহান জাতে-কাহানিহান বারো এহার ফলে কিহান সুবিধা পারাঙ, অতীতে কিহান কানাহান ইসিল, ইসে বা ভবিষ্যতে ইতয় এতালো গবেষনা করিলতা আসে। ঔ গবেষনা অতাত না’গিয়া মৈতৈ লেখক আগয় বিষ্ণুপ্রিয়া এতা মণিপুরী নাবে এহান প্রমান করতেগা আমার এরে দাস মনোবৃত্তির কথা এহান যেসাদে ইন্টারপ্রিট করিসে (page 20-21, A Clarification on the Bishnupriyas in relation to Manipuris by Ch. Manihar Singh, Manipuri Sahitya Parishad, Imphal, 1987), তলে হুবহু তুলেদিলু -

“…Socially they are now closer to the Bengali way of life as the women folk don Saris in place of traditional Manipuri skirt ‘Phanek’ and as the members of each family speak Bengali in their mutual communication. …They are not Manipuris nor their language has anything to do with Manipuri. They may be either Assamese Bishnupriyas or Bengali Bishnupriyas…”

অর্থ্যাৎ, সামজিকভাবে তাঙর জীবনধারা বাঙ্গালীর তুলো মিল। তাঙর বেয়াপায় মণিপুরর ঐতিহ্যবাহী লাহিঙর পরিবর্তে শাড়ী পিদিয়া আততারা। গরেউ তাঙি আগই আগর লগে অতারতে বাংলাভাষাহান ব্যবহার করতারা।... তাঙি মণিপুরী নাগই, তাঙর ঠারহার লগে মণিপুরী ঠারর কুনো সম্পর্ক নেই। তাঙরে বড়জোর ‘আসামী বিষ্ণুপ্রিয়া’ বা ‘বাঙ্গালী বিষ্ণুপ্রিয়া’ বুলানি য়াকরের।

গিরকরে চাংঅহান দোষ দেনা একরতইতা?


কলামিস্টঃ রসরাস শর্মা, বামুনটিলা।

অনথকপা খেলতাম আহাৎ উবা ইয়া - ২

বৈষ্ণব অনার নুয়া লাইয়ো
আমার মানুর গাঙ কত’হার গাবুরাপুয়া-ইমাইন্দল-সৌ-বুজন এমতাগা ইসকনর “হরেকৃষ্ণ” আন্দোলনলো বিভুলা-কালভুলা আহান ইসি। কোন আত্মজিজ্ঞাসা বা আত্মোপলব্ধিত্ত না মানুর দেখাদেখি মিকুপর জনস্রোত আগৎ বাহিয়া এরে বাহুল অনাহান বিজ্ঞমানুয়ে মাতে পারতাই। আমার মানুরাঙ এচুদিন চলিয়া আহের, আমার আপাবপায় পালন করিয়া আহিতারা বৈষ্ণব ধারা অহান তাঙরাং মনমত নার; বিয়ান-মাদান ডাক-করতাল বারিয়া হরিবোল-হরিবোল নাকরলে যেমন বৈষ্ণব অনা না’র। গাঙে-গাঙে লেকিৎ-লেকিৎ গরে-গরে হরিনামর জোয়ারহান দেখিয়া অনেকগই খাঙ লাগিয়া আঙকরতারা, খাংদা এহান কিহান ইলহান, কলির জগাই-মাধাই নদীয়াত্ত তাল খেয়া এগদে আহ’পড়লাগাহান না কিহান? এচুদিন কিহান আমি নাবে বৈষ্ণব ইয়া আসিলাংহান? আমি এচুদিন যে বৈষ্ণব ধর্মহান পালন করিয়া আহরাং এহান অসম্পূর্ণ বৈষ্ণব ধর্মহান? মোর নব্য-ইসকনি মারুপ দুগ-আগ’র জীবনধারা বা চালচলন দেহিয়া বারো তাঙ’রাঙতো সৎসঙ্গ, সদাচার, সাত্ত্বিকাহার, ষড়বেগ-দমন, ১৬-মালা জপ এসাদে ব্যাপক তত্ত্বকথা হুনিয়া নুঙপাং অনা লাগের। ইসকনি বৈষ্ণব অতায় তেইপাঙ মানুয়ে হিজিতারা বাত নাখেইতারা বুলি, অনেকগই নিজর মালক্লকিয়ে-বনক্লকিয়ে বাত-হিজিয়াউ না’খেইতারা বুলিয়া হুন’রাং, বারো হুনিয়া আমি খুয়াকনা ইয়া খালকররাঙ, এসাদে জবরদস্ বৈষ্ণবউ আমারতা নুকুল’পড়লাগাহান? ইসকনে যেবাকা মাততারা ‘হরেকৃষ্ণ’ ওয়াহিএগো সলকরলেই হাবিতা লমর, অহাৎতে আমি উঙরাং - আমার ডাকুলা, ইসালপা, দোহার, রাসধারী, সূত্রধারী, বাসকউলির ভবিষ্যৎ খালকরিয়া। ‘হরেকৃষ্ণ’ ওয়াহিগই হাবিতা লমিলেতে আমার রাস, রাখুয়াল, পালা, বাসক, খুবাখুশৈ, হোলি, আরতির কাজে তাঙরে আর দরকার নাপড়তই। মিয়াঙর লগে নৌগ’ আগৎ কাহিতে গিয়া আপাবপার হাকতাকেত্ব পাসি আমার পাংকালপা রুহিবৃত্তি, কৃষ্টি বারো অসাম্প্রদায়িক ঐতিহ্যরে আজি মিমুত অনার পথে নিয়া যারাংগাহান না কিহান খালকরানি থক।

আমিতে মণিপুরী না হিন্দু ?
নিজর জাতহানলো গর্ববোধ করানি এহান সভ্যজগতর চলহান, আমারতাতে উল্টাহান ইসে। মিয়াঙ মালনার হৎনা করতেগা নিজর জাতহানরে পাতালে লামাদিয়া হিন্দু পরিচয়লো ডাঙর অনার প্রবনতা আহান এবাকা দেখরাং। ধর্মীয় পরিচয় অহানে জাতআহানরে গজে না তুলের বা তলে না’লামাদের। বাঙালী, অসমীয়া, ত্রিপুরাত্ত দরিয়া বাগানর লেবারউ হিন্দু, এহাত ডাঙর অনারতা কিত্তাউ নাদেখরাং। আমিতে ডাঙর অরাংতা আমার পুন্নিংয়ৌপা ঐতিহ্য, ঠার, লোকসাহিত্য, নাঙকাপা নাছা, বস্ত্রশিল্প বারো আমার ইশ্বরতুল্য পুর্বপুরুষর হংকরা সভ্যতা-কৃষ্টি-রুহিবৃত্তির পাংকালপা বারন অগ’লো। আমার কৃষ্টি, সংস্কৃতির কাকেইহার লেহে বৈষ্ণবধর্মর প্রভাব আমি অস্বীকার নাকররাং, বিশেষ করিয়া গৌড়ীয় সহজীয়া বৈষ্ণবধর্ম এহান এবাকা আমার নিংশাগর লগে তিল’পলগা। যে নৃত্যকলা, কীর্তন, রাস, রাখুয়ালনো আমি মুর তুলিয়া উবাইয়া আসি, হাবি কেন্দ্রীভুত ইসেতা বৈষ্ণব ধর্মত। আমি হাবিয়ে নিংকরিয়ারতা বৈষ্ণবধর্ম এহার প্রবক্তাগ’ চৈতন্য মহাপ্রভু। এহান ভুল ধারনাহান কিয়াবুল্লে, গৌড়ীয় ধারা উহান বাদেউ বৈষ্ণবধর্মরতা নানান মার্গ আসে যেমন নিমান্দি, রামান্দি ইত্যাদি। চৈতন্য মহাপ্রভুর জন্মর চারিহৌ বসর আগে নিম্বার্ক ঋষিয়ে নিমান্দি বৈষ্ণবমার্গ এহান লিংখাত করিয়া গেসেগা। কেশব কাশ্মীরি, কবি জয়দেব, চন্ডিদাস, বিদ্যাপতি গিরকগাসিয়ে নিমান্দি মার্গ এগ’ অনুসরন করেসিলা।১ এহান বাদে রাম-সীতারে আরাধনার অনুসারী রামান্দি বা রামাউতি বৈষ্ণবমার্গ আহানউ আসে যেহান শান্তিদাস গোস্বামী গিরকে মণিপুরে নিয়া গেসিলগা। মহাপ্রভু শ্রীচৈতন্যর লগে পঞ্চদশ শতাব্দীর শ্রীশংকরদেব, কবির, বল্লভাচার্য প্রমুখ গিরকগাসিরেউ বৈষ্ণব ধর্মর গুরু হিসাবে উচ্পা ফাম দেনা অর। বঙ্গ-গৌড়-পূন্ড্র-রাঢ় অঞ্চলে বিভিন্ন ধর্মর ক্রমবিবর্তনর ইতিহাস হৎতরলে উপ’না পাররাঙ, গৌড়ীয় বৈষ্ণবধর্ম সৃস্টি অসেতা বাংলার লৌকিক বিশ্বাস, বৌদ্ধ সহজীয়া, বৈষ্ণব সহজীয়া, বারো সুফি দর্শনর উপাদান সুমকরিয়া। শাস্ত্রর কঠোরতারে অগ্রাহ্য করিয়া যে উদারপন্থী বৈপ্লবিক প্রেমধর্ম আহান চৈতন্য মহাপ্রভূয়ে লিংখাত করেসিল, মহাপ্রভূ দৌঅনার পিসেদে নবদ্বীপ, শ্রীখন্ড, বেনারসর ‘এলিট’ বুদ্ধিজীবি শাস্ত্রকারর আতে পড়িয়া ঔহান বারো শাস্ত্রমুখী অ’পড়িসিলগা।২ মণিপুরর বৈষ্ণবধারা অহার লগে ঔ শাস্ত্রমুখী বা এলিট বৈষ্ণবধারার কোন সম্বন্ধ বিসারিয়া নাপারাঙ।
মণিপুরে ষোড়শ শতাব্দীত রাজা খগেম্বার হাক্তাকে, অষ্টাদশ শতাব্দীত গরীবনেওয়াজ পামহৈবার হাক্তাকে বারো এতার পিসে পিসেদে মহারাজ ভাগ্যচন্দ্র-চন্দ্রকীর্ত্তির হাক্তাকে - এসাদে ইতিহাসর নানান সমেইৎ নানান মার্গর ধর্মপ্রচারক হমাসিলাগা। হাদিমেরাকে মণিপুরী এতা বৌদ্ধদর্শনলোউ প্রভাবিত অসিলা যেহার প্রমান পারাঙতা আমার কার্ত্তিকর পালি বা নিয়মসেবাত্ত।৩ আরতাউ পিসেদে চেইলে পঞ্চবিষ্ণুপ্রিয়া আঙম-মৈরাঙ-খুমল-লুয়াঙ-মাঙাঙ’র তঙাল তঙাল লৌকিক আচার বারো ধর্মবিশ্বাসর বিষয়উহানউ মুঙে আয়া পড়েরগা। আঙম, মৈরাঙ, খুমল, লুয়াঙ, মাঙাঙ - এতা আমার আপাবপার লাম ইয়া থাইলেতে হিন্দুধর্মর লগে আমার কোন ঐতিহাসিক যুগসুত্র থানার কথাহান নাবে (মহাভারতে উল্লেখ থাইলেই জাগাআহান আর্য্যভুমি বারো জাগাঅহার মানু হিন্দু অনা লাগতই এমন কোন কথা নেই)। বাস্তব ত্রেতউ আমি দেখরাঙতা, বৈদিক যুগর চতুর্বর্ণভিত্তিক সমাজর লগে আমার গোষ্ঠী-শিংলুপ-লকেই-সাগেই ভিত্তিক সমাজর কোন মিল নেই। আমার আচার, চালচলন, ফুতিফানি, খাদ্যাভ্যাস, দৌ-দুকে বিশ্বাস ইত্যাদি চেইলে মেইনস্ট্রীম হিন্দুর লগে আমার ডাঙর পার্থক্যআহান আহিত পড়ের। বৈষ্ণবায়নর আগে আমার মানুর লৌকিক ধর্মহানলো এবাকাউ কোন গবেষনাকর্ম নাইসে থাংতে এসম্বন্ধে লেপ্পা কোন সিদ্ধান্তৎ উপ’না না’ররাং। কিন্তু আমার কৃষ্টির খইতুগ’ লেইসাঙ, লেইসাঙর লগে মালঠেপ, বার্তন বারো মালঠেপে বহানির লেইত্রেং, বাদ্যযন্ত্র যেমন ডাক, করতাল বারো এতার লগে অন্যান্য বিষয় যেমন কীর্ত্তনর রাগ, পদ্ধতি, নাছার মুদ্রা এতা হাবি কুপকরে খালকরলে লেপ’না লাগের আমার কলা-কৃষ্টি-সংস্কৃতি এতা হাবি গৌড়ীয় বৈষ্ণবধর্মর অবদান নাবে।৪ মনিপুরে থাইতে আমার মানুয়ে তঙাল তঙাল সময়ে শৈব, বিভিন্ন মার্গর বৈষ্ণব, বৌদ্ধ এতাহাবি দর্শনর উপাদান তাঙর লৌকিক দর্শনর লগে আত্তীকরন করেসি। আমার মানুর খাদ্যভ্যাস, প্রসাদ কাতকরানি, কীর্ত্তনর রীতি, তিলক পিদানির স্টাইলউ অন্যান্য বৈষ্ণব’রাংতো তঙাল। গতিকে ভাগবতগীতার ভক্তিমার্গরে যাবতীয় আচারর মুলগ’ ধরিয়া পালন করিয়া আহরাঙ ধর্মমত এহানরে গৌড়ীয় বৈষ্ণবধর্ম নাবুলিয়া এবাকা মণিপুরী বৈষ্ণবধর্ম (Manipuri Vaishnavism) বুলানি’ই চুম। হুত্তুমে ভারতবর্ষর অন্য ধর্মমতর লগে পান্তাম দিলে, আমার বৈষ্ণবধর্ম এহান- ঐতিহাসিক দৃষ্টিকোণেত্ত আরতাউ মার্জিত-পরিশীলিত, দার্শনিক দৃষ্টিকোণেত্ত আরতাউ লু বারো আধ্যাত্মিক বিচারে উচ্চতর স্তরর বুলানি য়াকরের।৫

ধবারে ফুতিসুপানি বাগাদেনা না’লাগের
আমার মানু বৈষ্ণব ইসিতা লামসাম তিনহৌ বসর অ’পলগা, ইসকন হঙিলতা আজিত্ত মাত্র দ্বিক্কুড়ি বসর আগে, ১৯৬৬ সালে। মুরখুড়িয়া শিক্কা লাল্লাম করিয়া পথেঘাটে, রেলষ্টেশনে, এয়ারপোর্টে লেইরিক-লেইসু বেসানি বারো মানুরাং ডোনেশন মাগানি (য়ুরোপ-আমেরিকাত এহান জবর) এহানই বৈষ্ণবধর্মহান বুললেতে ইসকন’ই আউপা বৈষ্ণবর ফেক্টরিগ’ শৈনেই। বেরা লাগেরতা আরাক জাগা আহাত। ইসকন’র বৈষ্ণবতত্ত্ব এবাকাউ মণিপুরী বৈষ্ণবধর্মর অসাদে দার্শনিক বারো আধ্যাত্মিক স্তরে কা’নারেসে, বরং দ্বিক্কুড়ি বসর ধরিয়া ইসকনর বৈষ্ণবতত্ত্ব মাছ-মাংস নাখানি, সন্তান-উৎপাদন ব্যতীত নারীসম্ভোগ নাকরানি, চা-সিগারেট নাপিনা, তাস-জুয়া নাখেলানি এসাদে গৌণ বৈদিক আচারর মাঝে চক্কর দিয়া থাইল।৬ এতাতে আমার মানু বহুআগে হারপিয়া হদাসিতা। আমার সামাজিক আচার-অনুষ্ঠান, পালাকীর্ত্তন, রাস, রাখুয়াল, আরতির পদগর লেহে, পারেঙহার লেহে পারাঙ রাধাভাবলো পরমাত্মাগর লগে তিলনার খৌরাঙ। তারো ইসকনে আমারে বৈষ্ণবতত্ত্ব শিা দেনা এহান ধবা’রে ফুতিসুপানি বাগাদেনাহান পারা অর। বৈষ্ণবদর্শন এহান আমার আপাবপায় কিসাদে নেসিলাগা, কিসাদে বৈষ্ণবর শান্ত, দাস্য, বাৎসল্য, সখ্য, মধুর- এসাদে ভাব-রূপ-রস এতা আমার আপাবপায় তাঙর কলা-সংস্কৃতিত আত্মীভূত করেসিলা বারো এসাদে করিয়া নুয়া চিন্তার বিপ্লবী দর্শন আহান ঔ সমেইৎ কিসাদে ডেভেলপ করেসিল- আমারতা আজি এতাহাবি হারপানি লাগতই। বেহুদা ধর্মীয় আবেগ আহানলো সাময়িক জনস্রোত আহাত বাহিয়া আমার আপাবপার হংকরা অসাম্প্রদায়িক ধর্মদর্শন বারো ঐতিহ্যর মারাগ’ত কদালর সেৎ নাদবাং।


তথ্য-নির্দেশ:
১. বাঙলা সাহিত্যের রূপরেখা, ১ম খন্ড, শ্রীগোপাল হালদার, কলিকাতা, ১৯৭০, পৃৃ. ৭০
২. সহজীয়া ও গৌড়ীয় বৈষ্ণব ধর্ম, শ্রীপরিতোষ দাস, কলিকাতা, ১৯৭৮
৩. পাঞ্চজন্য অর্জ্জুনী, ৬ষ্ঠ সংকলন, শিলচর, ১৩৮১ বাংলা, পৃৃ. ৪
৪. আজিকার কথা, মথুরা সিংহ, শিলচর, ১৪০১ বাংলা, পৃ. ১৪
৫. Religion and Culture of Manipur by Dr. M. Kirti Singha, Imphal, 1988
৬. শ্রী শ্রী নামহট্ট দীপিকা, শ্রী কৃতকন্দর্প দাস, ইসকন ঢাকা, ৫০৯ গৌরাব্দ, পৃ. ১১


কলামিস্টঃ রসরাস শর্মা, বামুনটিলা।

অনথকপা খেলতাম আহাৎ উবা ইয়া - ১

পথগো বিসারতে কুমেইহান লমিল

কনফুসিয়াস চীনদেশর নাঙকরা দার্শনিক আ’গ। চীনদেশর মানু এমনেউ কথা অতারতারাতা কম, কনফুসিয়াস অতারলো আরো কম। জবর সংযত স্বভাবর মানু’গ আসিল কনফুসিয়াস; যেতা মাতানির অতা শিষ্যঅতারাং মাতিয়া গেসেগা, সংপ্তি কথালো। কুনো সংগঠিত ধর্মমত গিরকে প্রচার নাকরেসে, মাতিসে অতা জীবনবোধর কথা। মরানির আগে শিষ্য আগয় গিরকরাং আঙকরিসিল, গিরকে কিহান প্রার্থনা করেরহান। কনফুসিয়াসে মাতিসিল, হারাজীবনহানতে প্রার্থনা করিয়া আহিলু, নুয়াকরে কিতা প্রার্থনা করতু;, নৈতিকভাবে জীবনযাপন করানি অহানেই ডাঙর প্রার্থনাহান। পরকাল সমন্ধে গিরকে কিহান খালকরের আঙকরতে মাতিসিল, জিঙতা ইয়া আসি অতার কাজে কিহান করানি আগে খালকরো, মরপরলাগা অতার কথা পিসে। কনফুসিয়াসর কথাহানি জবর তাৎপর্যপুর্ণ। অর্জ্জুন-বভ্রবাহনর বংশধর বিষ্ণুপ্রিয়া মণিপুরীয়ে খ্রীষ্টপুর্ব ষষ্ঠ শতাব্দীর এরে অনার্য্য মংগোলীয় গিরকএগর কথাহানি ইকরতাই এসারে কথা হপনে খালকরানিয়ৌ চুমনেই, জড়বাদীগো বুলিয়া থমদিয়া বেলাদেনাই স্বাভাবিক। কিয়াবুল্লে ইহজাগতিকতা বা যৌক্তিক ধারনালো নিজর বিবেকবোধ হংকরানির সাদে বুদ্ধিবৃত্তিক স্তরে আমি এবাকাউ থুঙো নারেসি। গতিকে আমার ইতিহাসচর্চ্চা বারো নিজর মারাহাছ বিসারানির ধারা এহানৌ যৌক্তিক ধারালো পরিচালিত নাসে। বিংশ শতকর তিরিশর দশকর পরেত্ত আমার নিজরে বিসারানির যে থৌরাঙ আহান শ্রীমহেন্দ্রকুমার সিংহ গিরকআসিয়ে অকরেসিলা, লমিতেগা অহান বংশ-পরিচয়লো নিজরে ডাঙর করানির হৎনাহাত লেপুইলগা। মহাসভা-সাহিত্যসভা-সমাজকল্যান চিংকরিয়া মেয়েক দেহেসি-নাদেহেসি শৌ-বুজন হাবিহান মহাভারতহাত উবুরি ইলা, উদ্দেশ্যহান যেন-তেন প্রকারে নিজরে অর্জ্জুন-বভ্রবাহনর লগে যুক্ত করানি, নিজরে আর্য্য সভ্যতার কান্ডারীগো প্রমান করানি বারো আমার ইতিহাস, সংস্কৃতি, ভাষাতত্ত্ব, ধর্ম হাবিতা মহাভারতর মিথলো ব্যাখ্যা দেনা। অমতাহান এহান ইলৈ আমি জিংতা ইয়া থাইলাঙ নাইলে যেমন লমিলাঙ। আর্য্যঅতা হবাতা বারো অনার্য্য মঙ্গোলয়েড অতা মিত্তলতা - এসাদে ইম্যাচ্যুরড চিন্তা’ল সভ্য জগতর আর কুনো জাতি পরিয়া আছিতানা কিতা হারপাকুরা মানুয়ে মাতে পারতাই। সভ্য জগতর আর কুনো জাতিয়ে নির্দিষ্ট পুরুষ আগর বংশধর বুলিয়া দাবী করতারা এসারে নজীরউ নেই। জাতআহান কিহানলো ডাঙর ইতারা - তানুর কৃষ্টি-সংস্কৃতি-সাহিত্যর ভান্ডারগোলো না বংশ-পরিচয়লো - আধুনিক নৃতত্ত্ব, নৃবিজ্ঞান, ভাষাবিজ্ঞানর খবর থইতারা অতায় হারপিতাই। হুত্তুমে মাত্তে গেলেগা, আমার জাত এহান বৈদিক-আর্য্য ইলেউ ধন্য অনারতা কিত্তাউ নেই, নাইলেউ নুঙেই নাপানিরতা কিত্তা নেই।


মহাভারত নাকরতারা অতা পাপিষ্ঠ?

হুনতে নুঙেইনাইলেউ সেত্যহান, এপাকা আমার মানুয়ে যেহাত গাম সয়ুছি, আমার মৈতৈ বেইবুনিয়ে অতা করতে করতে আলিইয়া বেলাসিলা একশ বছর আগে। মৈতৈ পন্ডিত আতম্বাপু শর্মা বিদ্যারতœ , ইবুঙোহাল সিংহ, য়ুমজাউ সিংহত্ব দরিয়া এবাকার খেলচন্দ্র সিংহ, ঝালজিৎ সিংহ প্রমুখ গিরকগাছিয়ে মৈতৈ ইতিহাস, সংস্কৃতি, ধর্ম হাবিতা বৈদিক সভ্যতাত্ব , মৈতৈ এতা মিথিলাত্ত উৎপত্তি ইসিতা বুলিয়া উঠিয়া পড়িয়া লাগিসিলা। আতম্বাপু শর্মায় মৈতৈ ঠার এহান সংস্কৃতেত্ব বারো মৈতৈ ব্যাকরনর ভিত্তি সংস্কৃত এসারে তত্ত্ব প্রমান করানির কাজে ডাঙর ডাঙর লেরিক ইকরিয়া গেসেগা। এপাগা তাঙি অজাত চিন্তা নাকরতারা। আমার মহাভারতপন্থী ইতিহাস লেখক অতায় এসুদিন মুলত আতম্বাপু-ইবুঙোহাল-য়ুমজাউ-খেলচন্দ্র-ঝালজিৎ’র মসালা এগদে-উগদে করিয়া আহিতারাহান। য়াঙ্ঘেই বসর ইল, এপাকাউ কোন রিমার্কেবল মৌলিক কামতে নাদেখলাঙ। এহাত্ব হারপারাঙ আমার ইতিহাস-ভাষাতত্ত্বর চর্চ্চা কোন পর্যায়ে আছে। একমাত্র ড.কালিপ্রসাদ সিংহ গিরকর গবেষনাকর্মত খানিআহান বৈজ্ঞানিক ধারা, হাইপোথিসিস ভিত্তিক যৌক্তিক চিন্তার গৎগো পারাঙ। গিরকর গবেষনাকর্মআহান যাদবপুর বিশ্ববিদ্যালয়’ত্ত স্বীকৃতি পাসে। বাকীঅতার কাম বেশীর ভাগই ধর্মীয় আবেগনির্ভর, ন্যুনতম মান আহার মধ্যে নাপরের। ইন্ডিয়ার মোর মারুপ আগরাঙতো হুনিসিলু অনেকগই ‘রিসার্চ’ করানির কাজে বিশ্ববিদ্যালয় অতাত দাব্দাদাব্দি করিসিলা বুলিয়া, কিন্তু মাষ্টারডিগ্রী কুনোমতে পাসইসি থাঙতে গাইড অতায় আলকরে দেসি। যোগ্যতাসম্পন্ন অতায় বারো রিসার্চর পটা ড. কালিপ্রসাদরে সমালোচনা করিয়া খানিআহান সস্তা জনপ্রিয়তা কামানিত গৈ লাগিছি। ‘রিসার্চ’র নাঙে শিলচরর পত্র-পত্রিকাত এপাগা চলেরতা মুলত কালিপ্রসাদ চুম না লাল, সৌরশেনী না মাগধী, ছ-বর্ণ না স-বর্ণ এতালো উসুলা-পাসুলি। আমার সামাজিক সংগঠন অতাই বারো আরতাউ আগুইয়া নৃতত্ত্ব ভাষাতত্ত্র অসারে হাইলি-একাডেমিক বিষয়রে সামাজিক বিতর্কর বিষয়হাত আনিয়া বেলাদিলাগা।


জুহান লেং লেং, কামে বগার ঠেং

সাহিত্যচর্চ্চার ইতিহাসহানৌ আমারে হারৌ নাকরের। ঠারহানলো মরিক বুলিয়া মাতলেউ সাহিত্যর খবর লকুরা মানু নেই, লেখেকুরা নেই, চাকুরা নেই, পাকরেকুরা নেই। লাখ লাখ রূপা মাঙকরিয়া মহামেল, সাহিত্য সম্মেলন, সেমিনার হান্জারাং, করপেখ ইয়া আসে আমার সাহিত্য ছাপানির রূপা নাপারাঙ। গীতিস্বামী, সেনারূপ, অশ্বিনীকুমার, মাধব গিরকআছির রচনাসমগ্র এপাগাউ না নিকুলিল। আমার সাহিত্যর সমালোচক আকিগই মাতিসি, বিংশ শতাব্দীর তৃতীয় দশকেত্ত আমারতা সাহিত্যর কাকেই। খালকরিয়া চেইক ঔ সময় অহাত বাংলা সাহিত্য মিথ, উপনিষেদীয় মঙ্গলচেতনা, রোমান্টিসিজম, সিম্বলিজমর ধারা লালুয়া পোস্টমডার্ন যুগে হমাসিলগা। এরে চারিকুরি বছরে আমার সাহিত্যরে আমি তৃতীয় দশকর বাংলা সাহিত্যর সমপর্যায়েউ নেনা নারিসি। উঠেই-জাগেই, এক ইক, যুদ্ধ করিকগা - এসারে জাগরনী কবিতা পাকরতে পাকরতে, বর্গ-কবিতা, চৌপদী কবিতা - এসাদে নোয়াখালি নিরীা চেইতে চেইতে, সুবলর মালকে সুবলর কথা খালকরিয়া আহির পানি বেলিরি - টাইপর অপরিণত গল্প পাকরতে পাকরতে আমি যবরে চকথা।


কলামিস্টঃ রসরাস শর্মা, বামুনটিলা।