Friday, November 26, 2010

অ'হিন্দু অরিজিন সম্পর্কে দ্বি-আক কথা, লগে আরতাউ য়ারি কতহান

"শ্রুতং মে মা প্রহাসি... অণেনাধিতেন অহোরাত্রান সন্দধামি" -উপনিষদ
মি যেহান হুনেসু, যেহানরে বাক্যহান করিয়া পাসু, উহানরে মি না পাহুরতৌ, উহানরে মি অন্ধবিশ্বাসলো মানিয়া নানিতৌগা। দিনরাত্রি মি ঔ অপ্তবাক্য উহানরে পরীক্ষা করতৌ, সেত্য উহানরে হারপানির শ্রম, সন্দেহ বারো তপস্যালো।

১.
জাতি গঠনর নানান কেইরাক যেমন গোত্র, কৌম, উত্তর-কৌম, জাতিকল্প, ট্রাইব এসাদে নানান স্তর লালয়া আহানির পিসেই জাতিসত্তা আহান হঙর বা হঙনির প্রক্রিয়াহান চলের। এসাদে ঠার, ভৌগলিক লয়া, সংস্কৃতি বারো ঔতার লগে তানুর ধর্মভাবনা তিলয়া পৃথিবীত নানান সভ্যতা লিঙখাত অসে, যদিও প্রাক-শ্রেনীসমাজর জীবনচেতনা উহানরে আধুনিক সংজ্ঞালো 'ধর্ম' বুলানি চুমনেই। যেমন আফ্রিকান, হিন্দু, পশ্চিমি সভ্যতা, চৈনিক সভ্যতা, জাপানীজ সভ্যতা যেতা ভাষা, ধর্ম বা সংস্কৃতির মাতুঙে তঙাল। ঠিক অসাদে সভ্যতা আহার বিতরেই হুরুকাং অংশ আহার জাতর বিতরেই নানান পার্থক্য থার। যেমন বাঙালি স্বতন্ত্র জাতিহান অইলেউ ঢাকা, চট্্রগ্রাম বারো সিলেটর ঠারর লগে পশ্চিম বাঙলার ঠার বা সংস্কৃতির কতিহান মিল দেহরাঙতা? ঠারহানরে ইজ্জু করিয়া ধরলে সিলেটী অতারেউ অ-বাঙালি বুলানি লাগের, কিয়াবুল্লে বর্তমান সমেইত নিয়াম গুরুত্বপূর্ণ গবেষণা কতহান অসে যেহাত্ত হারপেয়ার সিলেটি ঠারর উৎপত্তি বারো বিকাশের ধারা অহান একদম অ-বাংলীয়, মানে বাংলার অসাদে নাগৈ। নানান কারণে নানান সভ্যতার বিতরে কনফিক্ট দেহিয়ার, কারণ কুনো সমেইত ঠার, কুনো সমেইত রাজনীতি, কুনো সমেইত সভ্যতা বারো কুনো সমেইত ধর্ম।

যেতাউ অক, এসাদে প্রক্রিয়া আহার বিতরে আমার 'বিষ্ণুপ্রিয়া মণিপুরি' পরিচয় এহান হঙসিল বুলিয়া ধারনা করে পারিয়ার। ট্রাইব বা ট্রাইবাল ওয়াহি এগো আপত্তিকর অইতে পারে কিন্তু, পৃথিবীর হাবি জাতিয়ৌ ইতিহাসর কোন না কোন সময়ে ট্রাইব স্তরে আসিলা এহাত নেই। মর্গানর উসাদে নৃবিজ্ঞানি গিরকগাছিয়ে দেহুয়িয়া গেসিগা, আধুনিক রাস্ট্রভিত্তিক সমাজ উহান অইলতা Political Society, বারো প্রাক-রাস্ট্রূীয় সমাজ যেতা রাস্ট্রব্যবস্থা লিঙখাত অনার পিসে পেয়া নিজ নিজর ধর্ম-রীতি-নীতি-নিয়মলো চলিয়া গেলাগা উতারে মাতানি অরতা Gentile Society,উপনিবেশিক যুগর পিসে যেতা Tribal Soceity বুলিয়া পরিচিত অইলা [১]। আমার মানুয়েউ ঔ বিশেষ স্বাতন্ত্রমন্ডিত ধর্ম-রীতি-নীতি-নিয়ম চেৎকরে দরিয়া থয়াই বর্তমান যুগে হমাসিগাহান। অহানে থাইনাকার আমলর নিজস্ব ধর্মবিশ্বাস বা ধর্মাচরনর লগে এবাকার ধর্মবিশ্বাস বা ধর্মাচরনর ঐক্য আহান আসে, যেহান বাংলাদেশর আর আর হুরুকাং প্রান্তিক জাতিসত্তারাং নেই। উদাহরন হিসাবে মাতানি পারিয়ার, মান্দি বা গারো জাতিয়ে তানুর আদিধর্ম দাকবেওয়াল এরাদিয়া হাবি খ্রীস্টান লনার পিসে পিসেদে আমি দেকলাং তানুর অস্তিত্ব সংকট কতিহান বাড়িল। কারণহান অইলতা তানুর আদিধর্ম অহান পুরাপুরি তানুর সাম্য সমাজব্যবস্থা বারো যৌথ উৎপাদন ব্যবস্থার লগে যে মারেঙর সম্পর্কহান, ঔহান শ্রেণীভিত্তিক সমাজর ধর্মৎ সম্ভব নেই। হুত্তুমে মাত্তে গেলেগা আদিম বা প্রাচীন ঐতিহ্যর লগে সংযোগ-বিরহিত অয়া থায়া সুস্থ অস্তিত্ব সম্ভব নেই, বিশেষ করিয়া আমার এসাদে হুরুকাং জাতিগোষ্ঠীরকা উহানতে লেপ্পাহান।



২.
'হিন্দু' ওয়াহি এগো অইলতা পারসিক ঠারে সিন্ধু নদর নাঙহান। দনি এশিয়ার অয়াঙ-পিছবারাদে সাতহান সড়ার হাবিত্ত ডাঙরহান অসেতা সিন্ধু। ঔ সিন্ধু ওয়াহি অগো আদি পারসিক ঠারে হিন্দু বুলিয়া পরিচয় পাসে[২]। ঋকবেদে সপ্ত-সিন্ধু লয়া অহানরে আর্যজাতির লামহান বুলিয়া উল্লেখ করেসি। এরে লয়া এহানই জরথুস্ত্রবারে পবিত্র গ্রন্থ আবেস্তাত (ভেনদিদাদ বা ভিদেভদাদ ১.১৮) মাতেসিতা 'হপ্ত-হিন্দ' বুলিয়া, যেতা ভারতীয় উপমহাদেশর সিন্ধু নদ উপত্যকা বা অহার কাদবারাত আসিলা অতারে চিনানির কাজে [৩]। ইসলাম ধর্মর আরবি ঠারর লেইরিক উতাত 'আল-হিন্দ' বুলিয়া কথা আহান আসে। পারসিক ্ওয়াহি এগো সম্ভবত ১৩২৩ খ্রিস্টাব্দত্ত দণি ভারতীয বারো কাশ্মিরি লেইরিকে ব্যবহার অইল [৪]। ব্রিটিশ আমলে ইংরেজ অকারাং 'হিন্দ'ু আরতাউ ব্যাপকতা পাসিল। 'হিন্দু' ওয়াহি এগোর লগে যে নাংহান হাবির আগেই আগের অহান অইলতা 'আর্য'। 'হিন্দু ধর্ম', 'হিন্দু সংস্কৃতি' ইত্যাদি নাঙে এবাকা যেতা হারপেয়ার উতা হাবি মুলত আর্য সভ্যতার অবদান। 'বেদ' 'উপনিষদ' 'রামায়ন' 'মহাভারত'এত্ত চিংকরিয়া বর্ণভিত্তিক সমাজব্যবস্থা হাবি আর্যউতার হংকরাতা। রাইন নদীত্ত তুরস্ক পেয়া দিগল লয়া এহান আর্যজাতির আদিনিবাস বুলিয়া মাততারা। ঔ লয়া উহার মুঙবারার আর্য উতার অংশ আহান অইলাতা ইরাণী বারো ভারতীয় আর্য। আর্য নিয়া নানা মুনির নানা মত। কুনোগই মাত্তারা হিন্দুকুশ টেঙারেদে ইয়া যেতা উপমহাদেশে আহেসি অতাই ভারতীয় আর্য। কুনোতাই বারো মাততারা আর্য বুলিয়া কোন নৃ-গোষ্টী হুত্তুমেই নেয়সিলা, আর্য উহান ভাষাশ্রেনী আহার নাঙহান।

হাদিমেরাকে কুনো কুনোগই, বিশেষ করিয়া উগ্র হিন্দু পুণর্জাগরণ বাদীঅতাই নিকালাসিহান যে আর্যজাতি অতাই ভারতর আদি অধিবাসী বারো সংস্কৃত ঠারেত্ত পাশ্চাত্যর হাবি ঠার নিকুলেসেতা। এতারমা কতগোই কাপ আহান গজে কাহিয়া মাততারা কাস্পিয়ান হ্রদ অগো উনি 'কশ্যপ মুণি' নাঙে করেসিগো। কতগো পশ্চিমা নৃবিজ্ঞানিয়েউ মত এহার প েমাতে গেসিগা। এ মতবাদ এহানরে আউট অব ইন্ডিয়া (Out Of India) মতবাদ বুলিয়া মাততারা [৫]। আজিকালি আমার মানুর ইতিহাসবিদ গবেষক গিরিগিথানিয়েউ তত্ত্ব এগলো গৈগ ইতে দেখরাং [৬]। কিন্তু এ তত্ত্ব এগো বহুত আগেই আধুনিক গবেষনাত গ্রহণ যোগ্য নায়া বাতিল অসে। বিশেষত ঋগবেদে মুন্ডা ও দ্রাবিড় ঠারর প্রভাব (ঋগবেদে লামসাম ৫০০ হার গজে মুন্ডা ঠারর ওয়াহি বিসারিয়া পাসি), ইরাণী প্রাচীন ধর্মও দৌদুকর বিবর্তিত নাঙ বারো সাংস্কৃতির ফারাক চেয়া হাবিয়ে উপইলা যে অস্ট্রিক, দ্রাবিড় ও আর্য হাবি তঙাল জার্তিগোষ্টি বারো আর্যউতা ভারতর বারারতা।

গবেষকে মাততারা সিন্ধু লয়াত আর্য আহানের আগে নিয়াম আগুয়িয়া আসিলা দ্রাবিড় সভ্যতা। কিন্তুমান কালর পরিক্রমাত আর্য সভ্যতার গরিমালো যেসাদে গজে কাহিল, দ্রাবিড় সভ্যতাঅহান অসাদে মুতয়া গেলগা। আর্যউতাই পরাজিত দ্রাবিড় জাতির শুদ্র বা হাবিত্ত তলর শ্রেণীত বরাসিলা। তবে তাপ্প তাপ্প আর্য -দ্রাবিড়র লগে রক্ত সম্পর্ক, ভাব, ভাষা, সভ্যতা ও সংস্কৃতির সম্পর্ক আহান হঙসিল। কিন্তু দ্রাবিড় সভ্যতার উপাদান এবাকাউ না মুতসে। 'পুজা' বুলতারা বিষয় অহানৌ দ্রাবিড় সভ্যতাত্ত নেসিগাহান ।'দোলযাত্রা','ঝুলনযাত্রা','রথযাত্রা'- এসাদে জাতিগত উৎসব যেতা বেলিগর গতির লগে সম্পর্কযুক্ত ঔতা হাবি উৎস দ্রাবিড় সভ্যতা। 'যাত্রা' বা 'যাত্রে' ওয়াহি এগোই দ্রাবিড় ঠাররগো [৭]। দ্রাবিড়ীয় দৌ 'জগন্নাথ', উত্তর ভারতর উত্তর ভারতর অনার্য মহাদেব দুর্গা হাবি এতার কোন উল্লেখ বৈদিক লেইরিকে নাদেহিয়ার।


৩.
আর্যজাতি উপমহাদেশে আহানির নিয়াম আগেত্ত উত্তর-পূর্ব ভারতর আসিলতা মঙ্গোলিয় বা মঙ্গলয়েড জাতির লামহান। তানুরে মাতলাতা 'কিরাত'। মহাভারত, রামায়ন, কালিকাপুরাণ, যোগিনীতন্ত্রত কিরাতর দেশ উহানরে ''প্রাগজ্যোতিষপুর'' বুলিয়া মাতেসি।

রামায়নে রাবনর আতে অপহরিত সীতারে বিসারানির কাজে সৈন্যউতারে মাতেসি -

ব্রহ্মপুত্র তরি রঙ্গে করিহ প্রবেশ
মন্দর পর্বতে যাইও কিরাতের দেশ।।
যাইবে কর্ণাট দেশ আর শাকদ্বীপে।
কিরাত জানিবা আছে অত্যদ্ভুত রূপে।।
কনক চাপার মত শরীরের বর্ণ।
ঊঠানখানার মত ধরে দুই কর্ণ।।
থালাহেন মুখখান তাম্রবর্ণ কেশ।
এক পাশে চলে পথ বলেতে বিশেষ।।

(কৃত্তিবাসী রামায়ন, রাজেন্দ্র লাইব্রেরী, কলকাতা, ১৩০৬ বঙ্গাব্দ, পৃ ২৩৩)

এহাত্ত হারপেয়ার প্রাচীন কামরূপ বা প্রাকজ্যোতিষপুর বারো কাদাবারার লয়াঅতার আদিবাসিন্দা উতা কিরাত। তানুরতা \"কনক চাপার মত শরীরের বর্ণ" কথা এহাতই হারপেয়ার কিরাতউতা মঙ্গোলিয় নরগোষ্ঠির মানু। এহাত অবশ্য মাতানি লাগের উপমহাদেশর উত্তর-পূর্বাঞ্চলে প্রাগজ্যোতিষপুর দখন করলেউ, মঙ্গোলিয় জাতির লগে আর্য জাতির অসাদে ডাঙর কোন কৌলি খান্না নাদেহিয়ার। বরং এপেই আর্যর লগে কিরাত বা মঙ্গোলিয় জাতির সংমিশ্রণের নিয়াম বিবরণ পেয়ার [৮]। চীনা সুত্রৎ প্রাচীন কালেত্ত দণি চীন বা টঙ্কিং এত্ত উত্তর মিয়ানমার-মণিপুর-কামরূপ মারিয়া আফগানিস্থান পেয়া সড়ক আগোর বর্ণনা আছে, এহাত্ত হারপেয়ার চীনা তিব্বতি জাতির লগেউ ভারতর মানুর যোগাযোগ আসিল। এপেই মাাতিয়া থইঙ, প্রাচীন মণিপুরর আদি বাসিন্দা অতার বিতরে আঙম, লুয়াঙ, মৈরাঙ, খুমন, মৈতৈ, খাবা-ঙানবা, চিঙখেই-সারাঙ-লেইশাঙথেম এসাদে বিভাজন আসিল- এতার বিতরে কিরাত বপসিলা তবে আর্য বা মিশ্রআর্য বা ইন্দো-মঙ্গলয়েড গোষ্ঠির মানু আসিলা এহান শ্বৈনেই।


৪.
থাইনাকার আমলেত্ত বর্তমান মণিপুর রাজ্য উহান স্বাধীর রাস্ট্র আহান হিসাবে আসিল বুলিয়া নানান ইতিহাসবিদ বারো গবেষকে ঐক্যমতে আহেসি। মণিপুর রাস্ট্র উহাত পূর্ণ বিকশিত জাতিআহান হিসাবে মণিপুরি উতা লালয়া পালয়া আসিলা বুলিয়া হারপেয়ার। নিজস্ব ভৌগলিক সীমানা আহার বিতরে রাজ্য, রাজধানী, মুদ্রাব্যবস্থা, শাসনব্যবস্থা, সৈন্য, আইন, বিচারব্যবস্থা, সামাজিক ব্যবস্থা, ধর্ম, ঠার, সাহিত্য, দর্শন, মেয়েক, লিখিত ইতিহাস ইত্যাদিলো মণিপুরি সভ্যতাহান লিঙখাত অসিল। মণিপুরির নিজস্ব লৌকিক আদিধর্মআহান আসিল যেহার লগে প্রাক-শ্রেণীসমাজর 'সর্বপ্রানবাদ'র নিয়াম মিল বিসারিয়া পেয়ার। আদিধর্ম উহাত আমি ধর্মর লগে জীবনবোধ, বিজ্ঞান, শিল্পকলা ও নৈতিকতার ঐকত্রিক রূপ আহান দেহরাং। শ্রেনীসমাজর অসাদে ধর্মরে শোষন বা স্বার্থ হাসিলর আাতিয়ার হিসাবে ব্যবহার করানির সুয়োগ নেয়মিল এপেই, কিয়াবুল্লে \'সালাই\' বারো \'সাগেই\' ভিত্তিক যৌথ সামাজিক জীবনের বাইরে ধর্মচেতনার কোন স্থান নেই।

মণিপুর নাঙ অহানৌ বেশিদিন আগরহান নাগই বুলিয়া দুগো আগো বাদে প্রায় হাবিয়ে স্বীকার করতারা। খ্রীস্টিয় ষোল শতকের অহানদে বাংলাত্ত হিন্দু মিশনারি আকতাই মণিপুরে হিন্দুধর্ম প্রচার করাত গেসিলাগা বারো তানু জাগা অহানরে মহাভারতে বর্ণিত মণিপুর রাজ্যহান বুলিয়া দাবি করেসিলা। রাজনৈতিক সুবিধা, মতার লোভ বারো ব্যক্তিগত স্বার্থরকা সময়অহান রাজালকেয়ে তানুরে সমর্থন দেসিলা। পিসে পিসেদে অস্টাদশ শতকর অহানদে শাসকগোষ্টিয়ে কিসাদে নিজর পুরানা ধর্মহান ত্যাগ করিয়া বৈষ্ণবধর্ম গ্রহন করেসিলা বারো রাজ্যহানরে হিন্দুরাজ্যহান হিসাবে ঘোষনা করেসিলা উতার য়ারিপরি আমি হাবিয়েউ কমসম হারপা আহরাং। গৌড়ীয় বৈষ্ণব ধর্মও লগে প্রাচীন ধর্মউহার ভাবগত মিল থানিয়ে নুয়া ধর্ম এহান মানুয়ে সাদরে লক্করেসিলা। কিন্তু মণিপুরি আদিধর্মর অনুসারি উতারকা সময়উহান ক্রান্তিকাল বুলানি য়াকরের। ঔ সমেইক রাস্ট্রর উদ্যোগে প্রাচীন ধর্মর হাবি লেইরিক লেইসু, পুরাণ বারো ঐতিহাসিক দলিলপত্র খমকরিয়া জ্বালাদেসিলা। প্রাচীন আচার-অনুষ্ঠান পালন করতে খামকরলা। প্রাচীন ধর্মর হাবি চিন্তা, দর্শন ও দৌ-দুক হিন্দুধর্মে কিসাদে বরাসিলা বারো আমার সংস্কৃতিহান কিসাদে হিন্দুকরন করেসিলা অতার য়ারিপরি মোর আপোকপা হমাদেনি, দৌ-দুকে বিশ্বাস বারো বিষ্ণুপ্রিয়া মণিপুরীর অহিন্দু অরিজিন বিসারানির হৎনা আহান নিবন্ধর ১ম-৫ম পর্বত বিস্তারিত আলোচনা করেসু।

আমি হাবিয়ে হারপাসি বর্ণাশ্রমভিত্তিক হিন্দুধর্মত বারার মানুর হমানির সুযোগ নেই। হিন্দুধর্মত্ত নিকুলানির পথ আসে, কিন্তুমান হমানির সুযোগ নেই। অহান ইলেতে কিসাদে আমি হিন্দু অইলাংতা? অহার বিকল্প ব্যবস্থাহান অইলতা পুরা জনগোষ্ঠী আহানরে ট্রাইব বা Caste এ রুপান্তর করিয়া আত্মস্থ করানি। কারণ হিন্দুধর্মত ক্রিড (Creed)নেই, কাস্ট হাবির গজে। মুলধারার হিন্দু সমাজে তানুরে হিন্দু বুলিয়া স্বীকৃতি নাদলেউ ব্রাহ্মন্য বিধি মানিয়া কাস্ট আহান তানুর মতো স্বতন্ত্র ইয়া থানা পারতারা। এসাদে ব্যবস্থা আহাত মণিপুরর মানুরে মহাভারতর অর্জ্জুনর বংশধর বুলিয়া ভ্রান্ত পরিচয় আহানলো ক্ষত্রিয় বর্ণশ্রেনীত অন্তর্ভূক্ত করানি অসিল। অবশ্য হুদ্দা আমি নাগই, এসাদে পন্থানো অসম বারো উত্তরবঙ্গর কোচ, রাজবংশী, হাজং, টিপরা ইত্যাদি জাতিগোষ্টি এতারেউ হিন্দুধর্মে বরানি অসিল। বিভিন্ন সুত্রত্ত হারপেয়ার ধর্মান্তর করানির সময় মনিপুরর মানুরে মুর খুড়োয়েয়া বারো বাঙ্গালি সন্যাসি অতার 'খোমজুং' বার চরণামৃত পিয়ুয়েয়া প্রায়শ্চিত্ত করুয়াসিলা। এসাদে পুর্ণাঙ্গ জাতিসত্তা আহানরে মিথলজির কাল্পনিক কোন চরিত্র আগর বংশধর হিসাবে পরিচিত করানির নজির পৃথিবীর ইতিহাসে আরতা কুরাঙৌ নেই।


৫.
বৈষ্ণব ধর্ম দর্শনর লগে আমার উনাউনির ঘটনাউহান নিয়াম বপদিন আগরহান নাইলেউ পরবর্তী সময়ে মণিপুরি, বিশেষ করিয়া মণিপুরি বিষ্ণুপ্রিয়া জাতির বর্ণহিন্দু শ্রেণীত হমানির তেতনেই হৎনা অনার চানার মাটিক য়ারিহান। এহার মুল কারণহান মনে অরতা আহার গজে আহান রাজনৈতিক বারো সামাজিক বিপর্যয়র শিকার অনা। অথবা ইতে পারে উগ্র মৈতৈ গোষ্টী আহার তৎপরতাত্ত নিজর অস্তিত্বহান কালকরিয়া থনার কাজে বৃহত্তর হিন্দুসমাজরাং এরে আত্মসমর্পন। বিংশ শতকের পয়লার পাতাপে মণিপুরি বিষ্ণুপ্রিয়ার বিতরে যে শিতি শ্রেণীআহার উদ্ভব অসিলা তানুর প্রধান ল্যহানই অসিলতা মহাভারতর অর্জ্জুন বারো চিত্রাঙ্গদার লগে নিজর জাতহানরে যুক্ত করানি বারো ক্ষত্রিয় বর্ণহিন্দু বুলিয়া মানুরাং জাহির করানি। সময় অহার বৃটিশ ভারতীয় সেন্সাসে আমার জাত এহানরে হিন্দু ত্রিয় শ্রেণীত অন্তর্ভূক্ত করানির দাবি জানুয়াসিলা। মৈতৈর লগে ফাঙনা দিয়া মহাভারতর যজ্ঞর গড়াগো কুহানদে গেলগা নাগেলগা অতালো দিনমাদান চর্চা করিয়া থাইলা। য়ারি এতার পিসে বহুবছর গত অইল, আমার চিন্তাৎ অসাদে হেরফের আহান নাইল। এবাকাউ আমার ইতিহাসবেত্তা-গবেষক গিরকলকেয়ে মহাভারতর হৌ গড়া অগোর পিছে দাবাদানি নাবেলাসি।

এহান অস্বীকার করিল উপায় নেই যে, বৈষ্ণব ধর্ম আমারে আধুনিক শিা বারো সভ্যতার লগে পরিচয় করুয়াদেসে, নিজর ঠার, সাহিত্য বারো সংস্কৃতির বিকাশে নিয়াম ভুমিকা থসে। কিন্তু নব্য হিন্দু পরিচিতির লগে লগে আমার চিন্তা-মনন, আচার আচরনে পরিবর্তন আহানি অকরলো, আমারাং সামপ্রদায়িক মনোভাব আহান হঙনা অকরলো, মনহানৌ তাপ্প তাপ্প সংকীর্ন অনা অকরলো। কনাক প্রজন্মর ডাঙর অংশ আহার বিতরে নিজর ঐতিহ্যর প্রতি বিপভাব আহান হঙনা অকরলো। নগরকেন্দ্রিক শিতি শ্রেনীর গরে জাগাহান নিলগা মাতৃভাষাহার বদলে বাংলা। আমার নৃত্য-গীত-কলা-শিল্প দরিয়া থনারকা উৎসাহ নেই বরং নেগেটিভ ধারনা তৈরী অনা অকরলো। শিতি বারো নুঙেইপা শ্রেনীরমা আগেকার ত্রিয় বর্ণহিন্দু অনার যুক্তিহীন আবেগর লগে যোগ ইলগা \'বাঙালি বাবু\' হনার শিঙনা। বিষু, কাঙ, কার্ত্তিকা, রাসপূর্ণিমার সাদে নিয়াম গুরুত্বপূর্ণ উৎসব উতারে থেইকরিয়া জাগাহান কালকরলো দুর্গাপূজাসহ নানান হিন্দুয়ানি পূজা-পার্বন। আগেকার সাম্যর সামাজিক কাঠামোর জাগাহান কালকরলো হিন্দুবাদী ধর্মীয় চেতনা। এবাকা জাতিসত্তাহান না ধর্মসমপ্রদায়হান পার্থক্য করে নারিয়ার। এহারকা অবশ্য রাস্ট্রর দৃষ্টিভঙ্গিরেউ দায়ি করানি য়াকরের। রাস্ট্র নিজেই যেবাকা ধর্ম বারো ধর্মীয় মৌলবাদরে থৌতাল দের, উবাকাতে হাবিরেউ অহার লগে শিঙনা দেনা লাগের।


৬.
ইতিহাস বুলতে আমি যেতা পেয়ার অতা মুলত মণিপুরর ইতিহাস, মণিপুরি জাতির ইতিহাস নাগই। মণিপুরর ইতিহাস বারো মণিপুরির ইতিহাস আকহান নাগই। জাতআহানর মুলশক্তি অন্ত্যজ মানু অতাই ইতিহাসে হাবির আগে বাদ পরো পরতারাগা। অহানে সমস্যা নেই। হুত্তুমে জাতি আহান ইতিহাসলো ডাঙর নাইতারা। আমার কাদাবারার বাঙালি জাতির কথাহানই চেইক। হায়হান মাতলে জাতি হিসেবে বাঙালির বিকাশ মাত্র কয়েকশো বসর আগরহান বুলানি য়াকরের। সুনীতিকুমার, নীহাররঞ্জন গুপ্ত, রমেশচন্দ্র, দীনেশচন্দ্র বাবুগাসিয়ে ইকরিয়া গেসিগা ঔতা বাঙলার ইতিহাস, বাঙালিরতা নাগই। যেমন, মহাস্থানগড়, এহান অইলতা পুণ্ড্রজ বুলিয়া জাতি আহার কীর্তিহান। অথবা উয়ারী-বটেশ্বর, অতাউ মান্দি জাতির অবদান। রমেশবাবুগাছির সমইেৎ লুপা গবেষণা নাইসে, অসাদে প্রযুক্তিয়ৌ নেয়সিল, তানু যেতা পেইলা অতারেই 'বাঙালির হাজার বছরের মহান কীর্তি' বুলিয়া চালাদিলা। সামপ্রতিক গবেষনাত দেহিয়ারতার, বাঙালির লগে এরে সভ্যতার এতার একদম হরপগই-বেঙগই সম্পর্ক। অহান বুলিয়া বাঙালি কিন্তু তলে পড়িয়া নেই।

মহাভারত রামায়নে ইতিহাস না বিসারিয়া আমারতা এবাকা নিজর ইতিহাসহান নিজে হঙকরানির বারাদে মনোযোগ দেনা লাগতই। আমার ভাষা-সাহিত্য-সংস্কৃতির বারনগো বরা করিয়া- এতাই আগামি দিনে আমার ইতিহাস অয়া থাইতয়তা।


তথ্যনির্দেশ:
১. মর্গান, জেপি, কোয়ার্টার্নারি জিওলজি অব বেঙ্গল বেসিন, লুসিয়ানা বিশ্ববিদ্যালয়, ১ সেপ্টেম্বর ১৯৫৫
২. Lipner, Julius (1998), Hindus: Their Religious Beliefs and Practices, p 7-8
৩. Thapar, R. 1993. Interpreting Early India. Delhi: Oxford University Press. p. 77
৪. David Lorenzen, Who Invented Hinduism? New Delhi 2006, pp. 24-33
৫. http://en.wikipedia.org/wiki/Out_of_India_theory
৬. http://heritageorissa.com/PeopleT/peoples.html
৭. http://appiusforum.net/scripts.html
৮. পদ্মনাথ ভট্টাচার্য, কামরূপ শাসনাবলী, ১৩৩৮ বঙ্গাব্দ, পৃ ৩-৪

[ আসামর গৌহাটিত্ত নিকুলের সরারেল পত্রিকার ২য় বর্ষ ১ম সংখ্যাৎ শিমু সিংহ গিরকর ইকরা অ'হিন্দু অরিজিন সম্পর্কে দ্বি-আক কথা লেখা অহার মাতুং ইলয়া]

লেখক: অসীমকুমার সিংহ

No comments: