Thursday, April 24, 2008

অনথকপা খেলতাম আহাৎ উবা ইয়া -৪

নিজর কপাল নিজে খেইলাঙ
বহির্জগতে মণিপুরী বুলিয়া আমার পরিচয়হান এবাকাউ ঙালকরিয়া থসে আমার রাস রাখুয়াল কীর্ত্তন পুঙচোলম খুবাকিশৈ বাসক এসাদে গভীর বারো উচ্চরসবোধসম্পন্ন সংস্কৃতি এহানিয়ে। মাততে গেলেগা আমি দুনিয়াএহার লগে উনাউনি অসিতা আমার সংস্কৃতির এরে মারৈ এহানিলো। আমার ভাষাসাহিত্যরতা গর্ব করেপারিল অতীত নেই, ভবিষ্যৎহানউ অন্ধকার। লোকসাহিত্য বুলিয়া নাপাল কররাঙ ঔতাউ চারি’পাচহৌ বছর আগেকার বরন ডাহানির এলা, মাদই সরালেল এলা বারো বুড়াবুড়ির য়ারি কতহান। আমার সংস্কৃতির হাবিত্ত দৃর্বল দিকহান লোকনৃত্য লোকগীত বুলিয়া কিত্তাউ নেই আমারতা। আমার মৈতৈ বেইবুনিয়ে হুদ্দা লোকনৃত্যলো মাহাআকেইহান অনুষ্ঠান করিয়া যিতারাগা, আমারতাতে অনুষ্ঠান আহান হাঞ্জেইলে বারহানটা পিদিয়া খুপাঙলো ‘খিতা-খিত-জাং’ বুলিয়া আগে নিকুলানি লাগের। সভ্যতা শিল্প সংস্কৃতির লীলাভুমি মণিপুরর মাটিত যুগ যুগ থায়াউ কিয়া আমার লৌকিক সংস্কৃতির ভান্ডারএগো আলথকপী নিঙলর বারনগর সাদে হুদালা অয়া থাইলতা এহান আচানকর য়ারিহান।
চারিপাচবছর আগে ইথাক পত্রিকাত রাজকান্ত সিংহ গিরকে রাসর নাছাত মুদ্রার অপপ্রয়োগ বারো বিকৃতি নিয়া নিয়াম গুরুত্বপুর্ন লেখা আহান ইকরেসিল। রবীন্দ্রভারতী বারো ছায়ানটর নৃত্যসমঝদার উতায় আমার রাসঅহান বিকৃত এলার লগে ভুল নাছার জিয়ানাহান বুলিয়া মাতিয়া গেসিগা উহানউ গিরকে দু:খ পেয়া মাতেসে। রাসর তত্ত্ব-মাহাত্ম্য-দর্শন কিত্তাউ হারনাপেয়া আকদিন তামকরিয়া রাখুয়াল বা দ্বি’দিন তামকরিয়া রাস আকেইহান করেবেলিঙ বুলিয়ারথাংতে কিহান করানি। বারর মানুর মুঙে নাছাআহান চুমকরে দিঙবুল্লেতে নাছাঅহার রীতি, মুদ্রা, লয়, তাল, ভঙ্গিউতা আয়ত্ত করানি লাগের, জকজকা বার-মেইখুম্বী পিদিয়া আতজাঙ লারিলেই নাছাহান নার। নাছা আকেইহার কম্পোজিশন আগেকার গুরুয়ে পুল্লাপকরে লেপকরিয়া থদেসি; তাল-মূদ্রা না হিকলাং বালা, গুরু পরম্পরায় পারাঙ অনুকরন-বিদ্যা এহানউ আমার রাসধারিয়ে ফাৎকরে দরিয়া থনা নারতারা। মণিপুরর লৌকিক নৃত্যধারা যেমন মাইবী জগোই, লাইবৌ জগোই, পান্থইবী জগোই এতার তাল মুদ্রারে বাগিয়া যে রাসনৃত্যহান লিঙখাত অসে অহান বপদিন আগর কথাহান নাগই। আমার মানুর হাবিত্ত ডাঙর ভুলহান মণিপুরর মুলধারার সংস্কৃতিউতা তানু সেচেয়া বেলিয়া ঙক্করেসিতা যত আরোপিত বারো অপোকৃত আধুনিক ফর্মউতা, যেতা হুদ্দা বৈষ্ণব ধারার লগে সম্পর্কিত। আঙম-মৈরাঙ-খুমল-লুয়াঙ-মাঙাঙ আমার নিজর লাম ইয়া থাইলেতে আপাবপার ঐতিহ্য, চিন্তা, জিনার য়ারি, লালফাম, অভিজ্ঞতার য়ারিপরিলো মূর্ত্তিপালসে মণিপুরর লৌকিক সংস্কৃতির পাঙকালপা বারনঅগো আমারগউ, হুদ্দা মৈতৈ’রগো নাগই। আর্য্যত্বর আবেগে বিভুলা ইয়া আমার মানু বপাবপেইর সভ্যতা-সংস্কৃতি-সংগ্রামর ইতিহাস পাহুরিয়া নিজর লগে লাহুলে বঞ্চনা করেসি, এরে আত্মবঞ্চনা আমারে সাংস্কৃতিক শুন্যতাআহাত নিয়া বেলাসেগা যেহান শিরাপহার সাদে প্রজন্মত্ত প্রজন্মত আমারে হিন লাকলা দিয়া আহের।

নিজর ঠারে রাস রাখুয়াল কীর্ত্তন: এ জনমে না হৌজনমে?
যে রাস রাখুয়াল পালাকীর্ত্তন আমারে ইঙাল ঙালকরিয়া থসে, ঔ রাস-রাখুয়ালর এলা এবাকাউ আমি দিয়ারতা বিজাতীয় ঠারে। ইতিহাসর বারাদে আলথক অইলে দেকতাঙায় অষ্টাদশ শতাব্দীত শ্রীচৈতন্যর ভক্তি আন্দোলন মণিপুরে থুঙিলগা সমেইৎ বাংলাত্ত বঙ্গদেশ পালা (মতান্তরে আরিবা পালা) বুলিয়া কীর্ত্তনভিত্তিক এলা নাছা জাতআহান মণিপুরে হমাসিলগা। ঔতার লগে মণিপুরীর নিজস্ব সুর, তাল, রাগ-রাগিনী (তিনহান তঙাল মাত্রার তা, রি, না) সুমকরিয়া ঢাক, করতাল, মঞ্জিলা, মাঙকাঙ, সেলবঙর, মইপঙর রৌ’লো আনৌবা পালা বুলিয়া মণিপুরী পালার নিজস্ব ফর্ম আহান হঙসিল। বৈষ্ণবধর্মর প্রভাবে চারিয়বেদে জয়দেব, গোবিন্দদাস, জ্ঞানদাস, কৃষ্ণদাস প্রমুখর ইকরা বৈষ্ণবপদাবলীর জয়জয়কার চলিসিল। ঔ সমেইৎ ব্রজবুলি, বাংলা, সংস্কৃত বারো মৈথিলী ঠারে লেংকরা পদাবলী কীর্ত্তনর এলাঅতা মণিপুরর মানুয়ে সুপৌ হারনাপেয়া দিয়া গেলাগা। পিসে পিসেদে মণিপুরর অজালকেয়েউ নিজর ঠারকিতা বেলিয়া ব্রজবুলি, বাংলালো পালা লেংকরানিত গৈ লাগলা। আজি রাস-রাখুয়ালে আমি যে এলা দিয়ার এতা বাঙালী বৈষ্ণবপদকর্তার লেংকরা এলা - বাংলা, ব্রজবুলি নাইলে মৈথিলী ঠারে। আমার দেকি মৈতৈয়ৌ পয়লা পয়লা মিয়াঙর ঠারলো এলা দিয়া গেলেগাউ পিসেদে এলা অতারে তানু নিজর ঠারে অলকরিয়া গাইলা। দিহৌ বসর আগেই তানু ভাগবৎগীতা, ভাগবৎপুরান, চৈতন্যচরিতামৃত, গীতগোবিন্দসহ বাংলাভাষার বৈষ্ণবপদাবলী নিজর ঠারে অনুবাদ করিয়া হদেইলা। নংসাঙ দিন বাদে কাছাড়ে আমার সাহিত্যিক বারো অজা গিরকলকেইরাং চেতনাঅহান আহিল। তানু হারপেইলা, নিজর ঠারহানরে দুরেই করিয়া থয়া মিয়াঙর ঠারলো রাস-কীর্ত্তন করিয়া করিলতা কিত্তা নেই, নিজর ঠারহানরে না য়ৌকরলে জাত বা সংস্কৃতি কুনোহানৌ না পালইতয়, বরং নিজর ঠারহানেই আকদিন নিঙসিঙর অতলে লেইমাঙ অইতই। মৈতৈর দেখাদেখি তানুয়ৌ বাংলাত্ত বিষ্ণুপ্রিয়া মণিপুরী ঠারে অলকরিয়া বা নিজে লেংকরিয়া এলা দেনা অকরলা। কাছাড়ে এবাকা রাস রাখুয়াল পালা কীর্ত্তন হাবি আমার ঠারে অর।
বাংলাদেশর ভানুগাছ লয়া এগো দ্বিতীয় মণিপুর বুলিয়া নাঙ কাহেসেগো। গীতিস্বামী গোকুলানন্দর জন্মস্থান এহাত জরম অসি গুরু নীলেশ্বর মুখার্জ্জী, ভদ্র অজা, রামসিং অজা, অজা হুনারু, অজা ব্রজগোপাল, দীননাথ সিংহ, নবদ্বীপ সিংহ, বলরাম সিংহর অসাদে নাঙপালপা মানু। বিশ্বকবি রবীন্দ্রনাথ ঠাকুর গিরকে শান্তিনিকেতনেত্ত বিশ্বর মুঙে মণিপুরী নাছারে উচপা ফাম দিলোতা মাছিমপুরে আমার নিঙলর রাসলীলা দেহিয়া। বৃটিশ আমেলেত্ব দরিয়া এপেইৎ সাহিত্য-সংস্কৃতির চর্চ্চাউ কমনেই। সংস্কৃতি ঙালকরানি পালকরানির কাজে মণিপুরী ললিতকলা একাডেমী বুলিয়া আগো সরকারে আমারে দিয়া থসে। এতা হাবি থাইতেউ দু:খর কথাহান বাংলাদেশে এবাকাউ কোন রাস বা রাখোয়াল আমার ঠারে নাইল; ললিতকলা একাডেমী, মণিপুরী রাসলীলা উৎযাপন পরিষদ বা আমার অন্য কোন সাংস্বৃতিক সামাজিক সংগঠনে এসাদে কোন থৌরাঙ নাকরেসি বা নাকরতারা। নিজর ঠারে রাস রাখুয়াল কীর্ত্তন আমি কুম্পাগা দেখতাঙাই হারনেই, এ জনমে না হৌজনমে?

মি থাইতে মিয়াঙগই কিয়া বকসাহান বয়া হিনপেইতইতা!
কাছাড়ে যেবাকা এলাত আমার ঠারহান চলিল ঔ সময় কততাই আমার ঠারে এলা দিলে রাসÑকীর্ত্তন-পালার ভাব, রস, পবিত্রতা মাঙইতই বুলিয়া প্রচার করলা বারো ইমারঠারে কীর্ত্তন গানা এহান পাত্তলপাহান বুলিয়া ইসালপা-রাসধারীরেউ খামকরলা। তানু বাংলা-সংস্কৃতরে দেবভাষা বুলিয়া নিংকরলা। অথচ বেদ, উপনিষদ, ভাগবৎপুরান কুরাঙউ লেখা নেই বৈষ্ণবকীর্ত্তন বাংলানো বা কুনো লেপ্পা ঠারে দেনা লাগতই। নিজর মাতৃভাষাহানরে নাকানহানদে বেলিয়া থয়া মিয়াঙর ঠারহানেই ডাঙর বুলিয়া মুরগত কাকরিয়া নাছানির মূলে আসিলতা আতলপা দাস-মনোবৃত্তি। আজি একবিংশ শতাব্দী ফৌয়িলগা, ঔ দাস-মনোবৃত্তিত্ত আমি এবাকাউ লিতনি পারলাংতা? তলে কাকেই পত্রিকার ২৩ এপ্রিল, ২০০৬ সংখ্যাত্ত পৌ আহান তুলেদিলু -
বাংলা ভাষা দেব ভাষা - সাহিত্য সভার মতে
শিলচর: শিলচর সাংবাদিক সম্মেলন আহাত বিষ্ণুপ্রিয়া মণিপুরী সাহিত্য সভার সভাপতি মণিকান্ত গিরকে কথা প্রসংগে মাতেসেতা ‘চৈতন্য মহাপ্রভূর মাতৃভাষাহান বাংলা। উহানে বাংলাভাষা এহানরে দেবভাষা বুলিয়া নিংকরিয়ার।’ প্রেসমিট উহানাত সাহিত্য সভার সাধারন সম্পাদক নগেন্দ্র কুমার সিংহ, নীরেশ কুমার সিংহ বারো অডিটর মুক্তা সিংহ বারো ডাঙরিয়া সভাপতি মণিকান্ত সিংহ স্বয়ং...
- সাপ্তাহিক কাকেই, ধরমনগর, ত্রিপুরা। ২১ বর্ষ ১৭ সংখ্যা, ২৩ এপ্রিল ২০০৬


কলামিস্টঃ রসরাস শর্মা, বামুনটিলা।

No comments: