বিষ্ণুপ্রিয়া মণিপুরীর লৌকিক বিশ্বাস বারো মণিপুরর লোকধর্ম - ৩

সনামাহি
সনামাহি বা সেনামাহি বুলিয়া মাততারা গিরকএগো থারতা গরর খা-পিছ কোণঅগদে যেপেই বারনগো থার। আমার মানুর কোন কোন লয়াত গিরক এগোরে সেনামানিক বুলিয়াউ মাততারা। আরিক অর্থহান বিসারাত বহিলে সনামাহির অর্থহান নিকুলেরতা ‘তরল হুনা’। ঔহানে নানান গবেষকে তানুর ইকরাত সনামাহি গিরগএকরে কুনোসমেইত ‘সূর্যদেব’[১৯], কুনোসমেইত ‘অগ্নিদেব’[২০] বুলিয়া উল্লেখ করেসি। মণিপুরর প্রাচীন লোকগাথা ‘নুমিত কাপ্পা’ত বেলী দুগোর উল্লেখ পেয়ার উতারমা বেলী আগো সনামাহি গিরকর রূপহান বুলিয়া কুনো কুনো গবেষকে মাতেসি। আগেকার মানুয়ে বেলি, দাবানল, জ্বি ইত্যাদি প্রাকৃতিক শক্তিরে হমাদেসি। জ্বিগোর লগে সম্পর্কিত প্রাকৃতিক শক্তি উতা আকহাত সুময়া দৌগর রূপহাত সনামাহি নাঙে বিবর্তিত অসে বুলিয়া নিঙকরে পারিয়ার। সনামাহি গরর বিতরর দৌগো। ড. কালীপ্রসাদ সিংহই সনামাহি গিরকরে গরর রক দৌগো বুলিয়া মাতেসে[২১]। গিরকএগো মৈতৈরাং এমাটিক ডাঙর ফাম কালকরিয়া থসে যে হাব্বি গরর খা-পিছ কোণেদে ‘সনামাহি কাচিন’ বুলিয়া গিরকর কাজে লেপ্পা লেইফাম আহান থদেনাই লাগের।

লেখক-গবেষক গিরকলকেয়ে মণিপুরর দর্শনর আধুনিক নাঙহান দিয়াসিতা সনামাহিজম (Sanamahism)। মণিপুরর মিথে সনামাহিরে পরমপুরুষ আতিয়া সিদাবার বলি পাঙকালপা পুতকগো বারো পাহাঙপার বেয়কগো বুলিয়া উল্লেখ করেসি। বাপকর য়াথাঙ পেয়া গিরকে মানু বারো জীবজগৎ এহান হাবি হঙকরেসে। টেইপাঙ মানুরে সাতহান তঙাল গোত্রত(Clan) খেইকরানি এহানৌ সনামাহি গিরকর আরাক অবদান আহান। সনামাহির বীরত্ব বারো সিংহাসনহার দখল নিয়া বেয়ক পাহাঙপার লগে কৌলির য়ারিআহান আসে। বাপক আতিয়া সিদাবায় মাতেসিলতা বেয়ক দ্বিয়গির মধ্যে যেগই হাবির আগে ভ্রহ্মান্ডহান পরিক্রমা করিয়া আহানি পারতই উগই সিংহাসনহান পেইতই। খুলা পিতকগো থকিয়া মালক লেইমারেলে বানাপেয়া পাহাঙপারে বাগাসিলিতা বাপকর সিংহাসনউহান সাতমাউ পরিক্রমা করলেই বিশ্বভ্রহ্মান্ড পরিক্রমাহান পুরা অইতই। মালকর কথা হুনিয়া পাহাঙপায় বাপকর সিংহাসন সাতবুলন দিয়া সিঙনাহান জিঙেবেল্ল। হৌগদে শৌর্য-বীর্যই পাঙকালপা সনামাহি মিকুপ আহানর মধ্যে ভ্রহ্মান্ডহান পরিক্রমা করিয়া আয়া দেহেরগাতা বেয়ক পাহাঙপা সিংহাসনহাত বয়া আসে। য়ারিএহার পয়লাকার তুপএহান হিন্দুপুরাণর কার্ত্তিক-গণেশর য়ারিয়ার তুলো মান্ন্া ইলেউ পিসেদের তুপঅহান গ্রীক পুরাণর য়ারিআহার সাদে ট্র্যাজিক পরিণতি আহাত গিয়া লয়সেগা। পাহাঙপার সিংহাসন দখলর দৃশ্যউহান দেহিয়া সনামাহি তিক শৌয়য়া পাহাঙপারে মারানিরকা তালকরে নেসিলগা, পাহাঙপা বারো ডরহানে লাইরেম্বী(দৌ-জেলা) দাপাআহানর হাদিৎ পলিয়া লিতুইসিল। বেয়করে বিসারিয়া নাপেয়া হতাশ সনামাহি চিকারি বাগেয়া লৌদেসিল বেয়করে বুদ্ধি দেসেউগো মুনিগো ইয়া থাইলে তার আতে উগো মরতই বারো জেলেইগো ইয়া থাইলেতে উগোরে তা লহঙ করতই। নির্মম ট্র্যাজেডির শিকার সনামাহি যেবাকা হারপেইলো বেয়করে বুদ্ধি দেসেউগো তার নিজর মালক লেইমারেল, উপাগা তার মুরে বজ্রাঘাত পড়িল পারা। অনুতাপে দু:খয় সনামাহি গিরক পৃথিবীহান ধ্বংস করাত যেপাগা লেপইল, হৌপেই স্বয়ং বাপক আহিয়া তারে খামকরিয়া বুঝ দেসিল রাজত্বহান পাহাঙপায় পেইলেউ মানুর গরর বিতরগো তা রাজত্ব্ করতই বারো গরে গরে হাবিয়ে মালক লেইমারেলর লগে তারে হমাদিতাই। ঔহানে এবাকাউ মণিপুরী ধর্মর অনুসারী ঔতাই ‘লেইমারেল কাচিন’র লগে ‘সনামাহি কাচিন’ কাদাকাদি থয়া হঙকরতারা বারো পুজাউ মান্না করিয়া দিতারা। [২২]

সনামাহি উপাসনার রীতিহান ‘সনামাহি লাইসন’- নানান মাহি মন্ত্র সলকরিয়া গিরকরে ডাহানি লাগের। পাহাঙপার সাদে হুদ্দা রাজবংশর মানু বা মেইপারমা সীমাবদ্ধ নাগই; আঙম, মৈরাঙ, খুমলেত্ত চিঙকরিয়া যে কুনো গোত্র যে কোন সাগেইর মানুয়ে সনামাহি গিরকর উপাসনা করানি পারতারা। বছর লৈয়ৈতেগা চৈরাউবার(বিষু) দিনে সনামাহি গিরকরকা তঙাল করিয়া পুজা আহান করতারা যেহানরে ‘সনামাহি খুরুম্বা’ বুলতারা। পুজা অহানাত কাবক, লারৌ, তিলুয়া, চউলর পিঠা, ফলমুল, ফুল ইত্যাদি কাৎকরতারা। মৈতৈর অসাদে বিষ্ণুপ্রিয়া মণিপুরীরাং ব্যাপক উপাসনর চল নেইলেউ গরর-দৌ হমাদেনার সমেইত গিরকর নাঙে এইরুক কাৎকরানি লাগের।



লামর দৌ
বছরহান লমর দিনউহাত লামর দৌ হমাদিতারা। আরিক অর্থে লামর দৌ বুলতে হারপেয়ারতা লাম আকেইহার দৌবিশেষ। লামর দৌ কালচারর লগে আত্মা উপাসনার সম্পর্কআহান আসে। থাইনাকালেত্ত আমার পূর্বপুরুষে বিশ্বাস করিয়া আহিতারা মানুআগো মরলে তার আত্মাাউগো না মরের; আত্মাউগো কুনোসমেইত অদৃশ্য ইয়া বায়ুমন্ডলে বুলে বুলে থার, কুনোসমেইত বারো নানান রূপ দরিয়া পহুরির বিতরে, লপুকে, রুকরসপাৎ বা জঙ্গলর হাদিৎ গর হঙকরিয়া থার [২৩]। লামর দৌ মর্যাদা পেইতারা আত্মাউতা অন্যান্য হবানেই দৌ-দুকর আতেত্ত লাম আহান রা করিয়া থইতারা। লাম আহাত মুলত দুগো লামরদৌ থাইতারা- আগো লামলাই বারো আরাকআগো লামলেইমা। লামআহানাত পয়লা দৌ-অর মুনি উগোরে লামঅহানর গিরকগো বা লামলাইগো বুলতারা; বারো লামআহানাত পয়লা দৌ-অইরী জেলা উগো লামঅহানর গিথানকগো বা লামলেইমাগো। লপুকে দৌওয়ার সমেইত, নুয়া ফসল রুয়ানির সমেইত বা লপুকে বান্দারা কিতা খেইলে লামর দৌরাঙ আগে চাকসা আহান দেনা লাগের। বছরহান লমর দিনউহাত আনুষ্ঠানিকভাবে লামর দৌ হমাদেনি অর। উঠানর অওয়াঙ-মুঙ কোণসেল উগোদে বা তিনজুড়া পথে কাবক, চিড়া, কলা, গুড়, চানা, চউলর লগে নানান জাতর পাতাপুতালো লুকহান হঙকরিয়া হাকরানি লাগের। লামর দৌ হমাদিতে ডাক করতাল বারানি বা এলা দেনার চল নেই।



দিকর দৌ
দিক ঙাক্করিয়া থইতারা দৌ উতারে ‘মেইকেই ঙাকপা’ বুলতারা। খা-পিছ বারাউহানদে থাঙজিং, অওয়াং-মুঙ বারউহানদে মারজিং, খা-মুঙ বারউহানদে ওয়াঙবেরেন বা ওয়াঙপুরেল বারো অওয়াং-পিছ বারাউহানদে কৌব্র“ - এসাদে চারিয়কোণাদে চারিগো দৌ আমার লামহান রা করিয়া থাইতারা। নুয়া গরগৎ অঙানির সমেইত ইনচাউগর চাইরোকোণাত চারিগো খুটি দিক-ঙাকপা গিরক এগিরাঙ সিলকরানি লাগের। থাঙজিং মুলত মৈরাঙর দৌগ; মৈরাঙে এবাকাউ থাঙজিং গিরকর লেইশাঙগো আছে যেপেই হারিবছর মৈরাঙ হারাউবা কুমেইঅহান অর। মারজিং গৃহপালিত জীবজন্তুর নুয়ারপানি ঙাক্করিয়া থর দৌগ; বিশ্বত Polo বুলিয়া নাঙকাসে মণিপুরর বিখ্যাত সাগোন কাঙজেই (গড়াৎ ড়িয়া খেলতারা খেলাজাত আহান), মুক্না কাঙজেই (হকির সাদে পাকানা বাহার ককারা লাঠিলো খেলাতারা খেলাজাত আহান), মুক্না (লাকাটি) ইত্যাদি খেলা উতা মারজিং গিরকে নিকালাসেতা[২৪]। কৌব্র“ মণিপুরর মিথলজির আরাক গুরুত্তপুর্ণ দৌ আগো; কৌব্র“ টেঙারা যেহানাত মণিপুর মাটিত পয়লাকা টেইপাঙ মানুর পারা পরেসিল বুলিয়া মাততারা ঔগোর নাঙহান কৌব্র“ গিরকর নাঙহাত্ত আহেসেহান[২৫]। ওয়াঙবেরেন মহামারির দৌগো; গিরকএগোই কালা বাঘআগোৎ চরিয়া বুলে বুলে থার। আতম্বাপু শর্মার অসাদে লেখক দুগো আগয় থাঙজিং গিরকরে বৈদিক দৌ ‘অশ্বিনীকুমার’, ওয়াঙপুরেলরে ‘বরুণ’ বারো কৌব্র“রে ‘কুবের’র লগে পাšতাম দিয়াসি।



তথ্যনির্দেশ:
১৯. Singh, W. Yumjao, Religious belief of Ancient Manipur, Imphal, 1966, page-66
২০. . Singh, L. Ibunglhal, Introduction to Manipur, Imphal, 1963, page-27
২১. ড. কালীপ্রসাদ সিংহ, প্রবন্ধমালা (৩য় খন্ড: মহৎ প্রশস্তি বারো সংস্কৃতি) শিলচর, ১৯৮৪, ২য় ভাগ, পৃষ্ঠা ১৫
22. Saroj Nalini Parratt, The Religion of Manipur, Calcutta 1980, page- 22
23. Manipur: Past and Present Vol-II, New Delhi, 1991, page 101-105
24. Dr. M T Laiba, The Geography of Manipur, Imphal ,1990, page-. 4
25. Dr. M. Kirti Singh, Religious Development. in Manipur, Imphal,1980, page-48


লেখক : অসীমকুমার সিংহ