অ'হিন্দু অরিজিন সম্পর্কে দ্বি-আক কথা, লগে আরতাউ য়ারি কতহান

"শ্রুতং মে মা প্রহাসি... অণেনাধিতেন অহোরাত্রান সন্দধামি" -উপনিষদ
মি যেহান হুনেসু, যেহানরে বাক্যহান করিয়া পাসু, উহানরে মি না পাহুরতৌ, উহানরে মি অন্ধবিশ্বাসলো মানিয়া নানিতৌগা। দিনরাত্রি মি ঔ অপ্তবাক্য উহানরে পরীক্ষা করতৌ, সেত্য উহানরে হারপানির শ্রম, সন্দেহ বারো তপস্যালো।

১.
জাতি গঠনর নানান কেইরাক যেমন গোত্র, কৌম, উত্তর-কৌম, জাতিকল্প, ট্রাইব এসাদে নানান স্তর লালয়া আহানির পিসেই জাতিসত্তা আহান হঙর বা হঙনির প্রক্রিয়াহান চলের। এসাদে ঠার, ভৌগলিক লয়া, সংস্কৃতি বারো ঔতার লগে তানুর ধর্মভাবনা তিলয়া পৃথিবীত নানান সভ্যতা লিঙখাত অসে, যদিও প্রাক-শ্রেনীসমাজর জীবনচেতনা উহানরে আধুনিক সংজ্ঞালো 'ধর্ম' বুলানি চুমনেই। যেমন আফ্রিকান, হিন্দু, পশ্চিমি সভ্যতা, চৈনিক সভ্যতা, জাপানীজ সভ্যতা যেতা ভাষা, ধর্ম বা সংস্কৃতির মাতুঙে তঙাল। ঠিক অসাদে সভ্যতা আহার বিতরেই হুরুকাং অংশ আহার জাতর বিতরেই নানান পার্থক্য থার। যেমন বাঙালি স্বতন্ত্র জাতিহান অইলেউ ঢাকা, চট্্রগ্রাম বারো সিলেটর ঠারর লগে পশ্চিম বাঙলার ঠার বা সংস্কৃতির কতিহান মিল দেহরাঙতা? ঠারহানরে ইজ্জু করিয়া ধরলে সিলেটী অতারেউ অ-বাঙালি বুলানি লাগের, কিয়াবুল্লে বর্তমান সমেইত নিয়াম গুরুত্বপূর্ণ গবেষণা কতহান অসে যেহাত্ত হারপেয়ার সিলেটি ঠারর উৎপত্তি বারো বিকাশের ধারা অহান একদম অ-বাংলীয়, মানে বাংলার অসাদে নাগৈ। নানান কারণে নানান সভ্যতার বিতরে কনফিক্ট দেহিয়ার, কারণ কুনো সমেইত ঠার, কুনো সমেইত রাজনীতি, কুনো সমেইত সভ্যতা বারো কুনো সমেইত ধর্ম।

যেতাউ অক, এসাদে প্রক্রিয়া আহার বিতরে আমার 'বিষ্ণুপ্রিয়া মণিপুরি' পরিচয় এহান হঙসিল বুলিয়া ধারনা করে পারিয়ার। ট্রাইব বা ট্রাইবাল ওয়াহি এগো আপত্তিকর অইতে পারে কিন্তু, পৃথিবীর হাবি জাতিয়ৌ ইতিহাসর কোন না কোন সময়ে ট্রাইব স্তরে আসিলা এহাত নেই। মর্গানর উসাদে নৃবিজ্ঞানি গিরকগাছিয়ে দেহুয়িয়া গেসিগা, আধুনিক রাস্ট্রভিত্তিক সমাজ উহান অইলতা Political Society, বারো প্রাক-রাস্ট্রূীয় সমাজ যেতা রাস্ট্রব্যবস্থা লিঙখাত অনার পিসে পেয়া নিজ নিজর ধর্ম-রীতি-নীতি-নিয়মলো চলিয়া গেলাগা উতারে মাতানি অরতা Gentile Society,উপনিবেশিক যুগর পিসে যেতা Tribal Soceity বুলিয়া পরিচিত অইলা [১]। আমার মানুয়েউ ঔ বিশেষ স্বাতন্ত্রমন্ডিত ধর্ম-রীতি-নীতি-নিয়ম চেৎকরে দরিয়া থয়াই বর্তমান যুগে হমাসিগাহান। অহানে থাইনাকার আমলর নিজস্ব ধর্মবিশ্বাস বা ধর্মাচরনর লগে এবাকার ধর্মবিশ্বাস বা ধর্মাচরনর ঐক্য আহান আসে, যেহান বাংলাদেশর আর আর হুরুকাং প্রান্তিক জাতিসত্তারাং নেই। উদাহরন হিসাবে মাতানি পারিয়ার, মান্দি বা গারো জাতিয়ে তানুর আদিধর্ম দাকবেওয়াল এরাদিয়া হাবি খ্রীস্টান লনার পিসে পিসেদে আমি দেকলাং তানুর অস্তিত্ব সংকট কতিহান বাড়িল। কারণহান অইলতা তানুর আদিধর্ম অহান পুরাপুরি তানুর সাম্য সমাজব্যবস্থা বারো যৌথ উৎপাদন ব্যবস্থার লগে যে মারেঙর সম্পর্কহান, ঔহান শ্রেণীভিত্তিক সমাজর ধর্মৎ সম্ভব নেই। হুত্তুমে মাত্তে গেলেগা আদিম বা প্রাচীন ঐতিহ্যর লগে সংযোগ-বিরহিত অয়া থায়া সুস্থ অস্তিত্ব সম্ভব নেই, বিশেষ করিয়া আমার এসাদে হুরুকাং জাতিগোষ্ঠীরকা উহানতে লেপ্পাহান।



২.
'হিন্দু' ওয়াহি এগো অইলতা পারসিক ঠারে সিন্ধু নদর নাঙহান। দনি এশিয়ার অয়াঙ-পিছবারাদে সাতহান সড়ার হাবিত্ত ডাঙরহান অসেতা সিন্ধু। ঔ সিন্ধু ওয়াহি অগো আদি পারসিক ঠারে হিন্দু বুলিয়া পরিচয় পাসে[২]। ঋকবেদে সপ্ত-সিন্ধু লয়া অহানরে আর্যজাতির লামহান বুলিয়া উল্লেখ করেসি। এরে লয়া এহানই জরথুস্ত্রবারে পবিত্র গ্রন্থ আবেস্তাত (ভেনদিদাদ বা ভিদেভদাদ ১.১৮) মাতেসিতা 'হপ্ত-হিন্দ' বুলিয়া, যেতা ভারতীয় উপমহাদেশর সিন্ধু নদ উপত্যকা বা অহার কাদবারাত আসিলা অতারে চিনানির কাজে [৩]। ইসলাম ধর্মর আরবি ঠারর লেইরিক উতাত 'আল-হিন্দ' বুলিয়া কথা আহান আসে। পারসিক ্ওয়াহি এগো সম্ভবত ১৩২৩ খ্রিস্টাব্দত্ত দণি ভারতীয বারো কাশ্মিরি লেইরিকে ব্যবহার অইল [৪]। ব্রিটিশ আমলে ইংরেজ অকারাং 'হিন্দ'ু আরতাউ ব্যাপকতা পাসিল। 'হিন্দু' ওয়াহি এগোর লগে যে নাংহান হাবির আগেই আগের অহান অইলতা 'আর্য'। 'হিন্দু ধর্ম', 'হিন্দু সংস্কৃতি' ইত্যাদি নাঙে এবাকা যেতা হারপেয়ার উতা হাবি মুলত আর্য সভ্যতার অবদান। 'বেদ' 'উপনিষদ' 'রামায়ন' 'মহাভারত'এত্ত চিংকরিয়া বর্ণভিত্তিক সমাজব্যবস্থা হাবি আর্যউতার হংকরাতা। রাইন নদীত্ত তুরস্ক পেয়া দিগল লয়া এহান আর্যজাতির আদিনিবাস বুলিয়া মাততারা। ঔ লয়া উহার মুঙবারার আর্য উতার অংশ আহান অইলাতা ইরাণী বারো ভারতীয় আর্য। আর্য নিয়া নানা মুনির নানা মত। কুনোগই মাত্তারা হিন্দুকুশ টেঙারেদে ইয়া যেতা উপমহাদেশে আহেসি অতাই ভারতীয় আর্য। কুনোতাই বারো মাততারা আর্য বুলিয়া কোন নৃ-গোষ্টী হুত্তুমেই নেয়সিলা, আর্য উহান ভাষাশ্রেনী আহার নাঙহান।

হাদিমেরাকে কুনো কুনোগই, বিশেষ করিয়া উগ্র হিন্দু পুণর্জাগরণ বাদীঅতাই নিকালাসিহান যে আর্যজাতি অতাই ভারতর আদি অধিবাসী বারো সংস্কৃত ঠারেত্ত পাশ্চাত্যর হাবি ঠার নিকুলেসেতা। এতারমা কতগোই কাপ আহান গজে কাহিয়া মাততারা কাস্পিয়ান হ্রদ অগো উনি 'কশ্যপ মুণি' নাঙে করেসিগো। কতগো পশ্চিমা নৃবিজ্ঞানিয়েউ মত এহার প েমাতে গেসিগা। এ মতবাদ এহানরে আউট অব ইন্ডিয়া (Out Of India) মতবাদ বুলিয়া মাততারা [৫]। আজিকালি আমার মানুর ইতিহাসবিদ গবেষক গিরিগিথানিয়েউ তত্ত্ব এগলো গৈগ ইতে দেখরাং [৬]। কিন্তু এ তত্ত্ব এগো বহুত আগেই আধুনিক গবেষনাত গ্রহণ যোগ্য নায়া বাতিল অসে। বিশেষত ঋগবেদে মুন্ডা ও দ্রাবিড় ঠারর প্রভাব (ঋগবেদে লামসাম ৫০০ হার গজে মুন্ডা ঠারর ওয়াহি বিসারিয়া পাসি), ইরাণী প্রাচীন ধর্মও দৌদুকর বিবর্তিত নাঙ বারো সাংস্কৃতির ফারাক চেয়া হাবিয়ে উপইলা যে অস্ট্রিক, দ্রাবিড় ও আর্য হাবি তঙাল জার্তিগোষ্টি বারো আর্যউতা ভারতর বারারতা।

গবেষকে মাততারা সিন্ধু লয়াত আর্য আহানের আগে নিয়াম আগুয়িয়া আসিলা দ্রাবিড় সভ্যতা। কিন্তুমান কালর পরিক্রমাত আর্য সভ্যতার গরিমালো যেসাদে গজে কাহিল, দ্রাবিড় সভ্যতাঅহান অসাদে মুতয়া গেলগা। আর্যউতাই পরাজিত দ্রাবিড় জাতির শুদ্র বা হাবিত্ত তলর শ্রেণীত বরাসিলা। তবে তাপ্প তাপ্প আর্য -দ্রাবিড়র লগে রক্ত সম্পর্ক, ভাব, ভাষা, সভ্যতা ও সংস্কৃতির সম্পর্ক আহান হঙসিল। কিন্তু দ্রাবিড় সভ্যতার উপাদান এবাকাউ না মুতসে। 'পুজা' বুলতারা বিষয় অহানৌ দ্রাবিড় সভ্যতাত্ত নেসিগাহান ।'দোলযাত্রা','ঝুলনযাত্রা','রথযাত্রা'- এসাদে জাতিগত উৎসব যেতা বেলিগর গতির লগে সম্পর্কযুক্ত ঔতা হাবি উৎস দ্রাবিড় সভ্যতা। 'যাত্রা' বা 'যাত্রে' ওয়াহি এগোই দ্রাবিড় ঠাররগো [৭]। দ্রাবিড়ীয় দৌ 'জগন্নাথ', উত্তর ভারতর উত্তর ভারতর অনার্য মহাদেব দুর্গা হাবি এতার কোন উল্লেখ বৈদিক লেইরিকে নাদেহিয়ার।


৩.
আর্যজাতি উপমহাদেশে আহানির নিয়াম আগেত্ত উত্তর-পূর্ব ভারতর আসিলতা মঙ্গোলিয় বা মঙ্গলয়েড জাতির লামহান। তানুরে মাতলাতা 'কিরাত'। মহাভারত, রামায়ন, কালিকাপুরাণ, যোগিনীতন্ত্রত কিরাতর দেশ উহানরে ''প্রাগজ্যোতিষপুর'' বুলিয়া মাতেসি।

রামায়নে রাবনর আতে অপহরিত সীতারে বিসারানির কাজে সৈন্যউতারে মাতেসি -

ব্রহ্মপুত্র তরি রঙ্গে করিহ প্রবেশ
মন্দর পর্বতে যাইও কিরাতের দেশ।।
যাইবে কর্ণাট দেশ আর শাকদ্বীপে।
কিরাত জানিবা আছে অত্যদ্ভুত রূপে।।
কনক চাপার মত শরীরের বর্ণ।
ঊঠানখানার মত ধরে দুই কর্ণ।।
থালাহেন মুখখান তাম্রবর্ণ কেশ।
এক পাশে চলে পথ বলেতে বিশেষ।।

(কৃত্তিবাসী রামায়ন, রাজেন্দ্র লাইব্রেরী, কলকাতা, ১৩০৬ বঙ্গাব্দ, পৃ ২৩৩)

এহাত্ত হারপেয়ার প্রাচীন কামরূপ বা প্রাকজ্যোতিষপুর বারো কাদাবারার লয়াঅতার আদিবাসিন্দা উতা কিরাত। তানুরতা \"কনক চাপার মত শরীরের বর্ণ" কথা এহাতই হারপেয়ার কিরাতউতা মঙ্গোলিয় নরগোষ্ঠির মানু। এহাত অবশ্য মাতানি লাগের উপমহাদেশর উত্তর-পূর্বাঞ্চলে প্রাগজ্যোতিষপুর দখন করলেউ, মঙ্গোলিয় জাতির লগে আর্য জাতির অসাদে ডাঙর কোন কৌলি খান্না নাদেহিয়ার। বরং এপেই আর্যর লগে কিরাত বা মঙ্গোলিয় জাতির সংমিশ্রণের নিয়াম বিবরণ পেয়ার [৮]। চীনা সুত্রৎ প্রাচীন কালেত্ত দণি চীন বা টঙ্কিং এত্ত উত্তর মিয়ানমার-মণিপুর-কামরূপ মারিয়া আফগানিস্থান পেয়া সড়ক আগোর বর্ণনা আছে, এহাত্ত হারপেয়ার চীনা তিব্বতি জাতির লগেউ ভারতর মানুর যোগাযোগ আসিল। এপেই মাাতিয়া থইঙ, প্রাচীন মণিপুরর আদি বাসিন্দা অতার বিতরে আঙম, লুয়াঙ, মৈরাঙ, খুমন, মৈতৈ, খাবা-ঙানবা, চিঙখেই-সারাঙ-লেইশাঙথেম এসাদে বিভাজন আসিল- এতার বিতরে কিরাত বপসিলা তবে আর্য বা মিশ্রআর্য বা ইন্দো-মঙ্গলয়েড গোষ্ঠির মানু আসিলা এহান শ্বৈনেই।


৪.
থাইনাকার আমলেত্ত বর্তমান মণিপুর রাজ্য উহান স্বাধীর রাস্ট্র আহান হিসাবে আসিল বুলিয়া নানান ইতিহাসবিদ বারো গবেষকে ঐক্যমতে আহেসি। মণিপুর রাস্ট্র উহাত পূর্ণ বিকশিত জাতিআহান হিসাবে মণিপুরি উতা লালয়া পালয়া আসিলা বুলিয়া হারপেয়ার। নিজস্ব ভৌগলিক সীমানা আহার বিতরে রাজ্য, রাজধানী, মুদ্রাব্যবস্থা, শাসনব্যবস্থা, সৈন্য, আইন, বিচারব্যবস্থা, সামাজিক ব্যবস্থা, ধর্ম, ঠার, সাহিত্য, দর্শন, মেয়েক, লিখিত ইতিহাস ইত্যাদিলো মণিপুরি সভ্যতাহান লিঙখাত অসিল। মণিপুরির নিজস্ব লৌকিক আদিধর্মআহান আসিল যেহার লগে প্রাক-শ্রেণীসমাজর 'সর্বপ্রানবাদ'র নিয়াম মিল বিসারিয়া পেয়ার। আদিধর্ম উহাত আমি ধর্মর লগে জীবনবোধ, বিজ্ঞান, শিল্পকলা ও নৈতিকতার ঐকত্রিক রূপ আহান দেহরাং। শ্রেনীসমাজর অসাদে ধর্মরে শোষন বা স্বার্থ হাসিলর আাতিয়ার হিসাবে ব্যবহার করানির সুয়োগ নেয়মিল এপেই, কিয়াবুল্লে \'সালাই\' বারো \'সাগেই\' ভিত্তিক যৌথ সামাজিক জীবনের বাইরে ধর্মচেতনার কোন স্থান নেই।

মণিপুর নাঙ অহানৌ বেশিদিন আগরহান নাগই বুলিয়া দুগো আগো বাদে প্রায় হাবিয়ে স্বীকার করতারা। খ্রীস্টিয় ষোল শতকের অহানদে বাংলাত্ত হিন্দু মিশনারি আকতাই মণিপুরে হিন্দুধর্ম প্রচার করাত গেসিলাগা বারো তানু জাগা অহানরে মহাভারতে বর্ণিত মণিপুর রাজ্যহান বুলিয়া দাবি করেসিলা। রাজনৈতিক সুবিধা, মতার লোভ বারো ব্যক্তিগত স্বার্থরকা সময়অহান রাজালকেয়ে তানুরে সমর্থন দেসিলা। পিসে পিসেদে অস্টাদশ শতকর অহানদে শাসকগোষ্টিয়ে কিসাদে নিজর পুরানা ধর্মহান ত্যাগ করিয়া বৈষ্ণবধর্ম গ্রহন করেসিলা বারো রাজ্যহানরে হিন্দুরাজ্যহান হিসাবে ঘোষনা করেসিলা উতার য়ারিপরি আমি হাবিয়েউ কমসম হারপা আহরাং। গৌড়ীয় বৈষ্ণব ধর্মও লগে প্রাচীন ধর্মউহার ভাবগত মিল থানিয়ে নুয়া ধর্ম এহান মানুয়ে সাদরে লক্করেসিলা। কিন্তু মণিপুরি আদিধর্মর অনুসারি উতারকা সময়উহান ক্রান্তিকাল বুলানি য়াকরের। ঔ সমেইক রাস্ট্রর উদ্যোগে প্রাচীন ধর্মর হাবি লেইরিক লেইসু, পুরাণ বারো ঐতিহাসিক দলিলপত্র খমকরিয়া জ্বালাদেসিলা। প্রাচীন আচার-অনুষ্ঠান পালন করতে খামকরলা। প্রাচীন ধর্মর হাবি চিন্তা, দর্শন ও দৌ-দুক হিন্দুধর্মে কিসাদে বরাসিলা বারো আমার সংস্কৃতিহান কিসাদে হিন্দুকরন করেসিলা অতার য়ারিপরি মোর আপোকপা হমাদেনি, দৌ-দুকে বিশ্বাস বারো বিষ্ণুপ্রিয়া মণিপুরীর অহিন্দু অরিজিন বিসারানির হৎনা আহান নিবন্ধর ১ম-৫ম পর্বত বিস্তারিত আলোচনা করেসু।

আমি হাবিয়ে হারপাসি বর্ণাশ্রমভিত্তিক হিন্দুধর্মত বারার মানুর হমানির সুযোগ নেই। হিন্দুধর্মত্ত নিকুলানির পথ আসে, কিন্তুমান হমানির সুযোগ নেই। অহান ইলেতে কিসাদে আমি হিন্দু অইলাংতা? অহার বিকল্প ব্যবস্থাহান অইলতা পুরা জনগোষ্ঠী আহানরে ট্রাইব বা Caste এ রুপান্তর করিয়া আত্মস্থ করানি। কারণ হিন্দুধর্মত ক্রিড (Creed)নেই, কাস্ট হাবির গজে। মুলধারার হিন্দু সমাজে তানুরে হিন্দু বুলিয়া স্বীকৃতি নাদলেউ ব্রাহ্মন্য বিধি মানিয়া কাস্ট আহান তানুর মতো স্বতন্ত্র ইয়া থানা পারতারা। এসাদে ব্যবস্থা আহাত মণিপুরর মানুরে মহাভারতর অর্জ্জুনর বংশধর বুলিয়া ভ্রান্ত পরিচয় আহানলো ক্ষত্রিয় বর্ণশ্রেনীত অন্তর্ভূক্ত করানি অসিল। অবশ্য হুদ্দা আমি নাগই, এসাদে পন্থানো অসম বারো উত্তরবঙ্গর কোচ, রাজবংশী, হাজং, টিপরা ইত্যাদি জাতিগোষ্টি এতারেউ হিন্দুধর্মে বরানি অসিল। বিভিন্ন সুত্রত্ত হারপেয়ার ধর্মান্তর করানির সময় মনিপুরর মানুরে মুর খুড়োয়েয়া বারো বাঙ্গালি সন্যাসি অতার 'খোমজুং' বার চরণামৃত পিয়ুয়েয়া প্রায়শ্চিত্ত করুয়াসিলা। এসাদে পুর্ণাঙ্গ জাতিসত্তা আহানরে মিথলজির কাল্পনিক কোন চরিত্র আগর বংশধর হিসাবে পরিচিত করানির নজির পৃথিবীর ইতিহাসে আরতা কুরাঙৌ নেই।


৫.
বৈষ্ণব ধর্ম দর্শনর লগে আমার উনাউনির ঘটনাউহান নিয়াম বপদিন আগরহান নাইলেউ পরবর্তী সময়ে মণিপুরি, বিশেষ করিয়া মণিপুরি বিষ্ণুপ্রিয়া জাতির বর্ণহিন্দু শ্রেণীত হমানির তেতনেই হৎনা অনার চানার মাটিক য়ারিহান। এহার মুল কারণহান মনে অরতা আহার গজে আহান রাজনৈতিক বারো সামাজিক বিপর্যয়র শিকার অনা। অথবা ইতে পারে উগ্র মৈতৈ গোষ্টী আহার তৎপরতাত্ত নিজর অস্তিত্বহান কালকরিয়া থনার কাজে বৃহত্তর হিন্দুসমাজরাং এরে আত্মসমর্পন। বিংশ শতকের পয়লার পাতাপে মণিপুরি বিষ্ণুপ্রিয়ার বিতরে যে শিতি শ্রেণীআহার উদ্ভব অসিলা তানুর প্রধান ল্যহানই অসিলতা মহাভারতর অর্জ্জুন বারো চিত্রাঙ্গদার লগে নিজর জাতহানরে যুক্ত করানি বারো ক্ষত্রিয় বর্ণহিন্দু বুলিয়া মানুরাং জাহির করানি। সময় অহার বৃটিশ ভারতীয় সেন্সাসে আমার জাত এহানরে হিন্দু ত্রিয় শ্রেণীত অন্তর্ভূক্ত করানির দাবি জানুয়াসিলা। মৈতৈর লগে ফাঙনা দিয়া মহাভারতর যজ্ঞর গড়াগো কুহানদে গেলগা নাগেলগা অতালো দিনমাদান চর্চা করিয়া থাইলা। য়ারি এতার পিসে বহুবছর গত অইল, আমার চিন্তাৎ অসাদে হেরফের আহান নাইল। এবাকাউ আমার ইতিহাসবেত্তা-গবেষক গিরকলকেয়ে মহাভারতর হৌ গড়া অগোর পিছে দাবাদানি নাবেলাসি।

এহান অস্বীকার করিল উপায় নেই যে, বৈষ্ণব ধর্ম আমারে আধুনিক শিা বারো সভ্যতার লগে পরিচয় করুয়াদেসে, নিজর ঠার, সাহিত্য বারো সংস্কৃতির বিকাশে নিয়াম ভুমিকা থসে। কিন্তু নব্য হিন্দু পরিচিতির লগে লগে আমার চিন্তা-মনন, আচার আচরনে পরিবর্তন আহানি অকরলো, আমারাং সামপ্রদায়িক মনোভাব আহান হঙনা অকরলো, মনহানৌ তাপ্প তাপ্প সংকীর্ন অনা অকরলো। কনাক প্রজন্মর ডাঙর অংশ আহার বিতরে নিজর ঐতিহ্যর প্রতি বিপভাব আহান হঙনা অকরলো। নগরকেন্দ্রিক শিতি শ্রেনীর গরে জাগাহান নিলগা মাতৃভাষাহার বদলে বাংলা। আমার নৃত্য-গীত-কলা-শিল্প দরিয়া থনারকা উৎসাহ নেই বরং নেগেটিভ ধারনা তৈরী অনা অকরলো। শিতি বারো নুঙেইপা শ্রেনীরমা আগেকার ত্রিয় বর্ণহিন্দু অনার যুক্তিহীন আবেগর লগে যোগ ইলগা \'বাঙালি বাবু\' হনার শিঙনা। বিষু, কাঙ, কার্ত্তিকা, রাসপূর্ণিমার সাদে নিয়াম গুরুত্বপূর্ণ উৎসব উতারে থেইকরিয়া জাগাহান কালকরলো দুর্গাপূজাসহ নানান হিন্দুয়ানি পূজা-পার্বন। আগেকার সাম্যর সামাজিক কাঠামোর জাগাহান কালকরলো হিন্দুবাদী ধর্মীয় চেতনা। এবাকা জাতিসত্তাহান না ধর্মসমপ্রদায়হান পার্থক্য করে নারিয়ার। এহারকা অবশ্য রাস্ট্রর দৃষ্টিভঙ্গিরেউ দায়ি করানি য়াকরের। রাস্ট্র নিজেই যেবাকা ধর্ম বারো ধর্মীয় মৌলবাদরে থৌতাল দের, উবাকাতে হাবিরেউ অহার লগে শিঙনা দেনা লাগের।


৬.
ইতিহাস বুলতে আমি যেতা পেয়ার অতা মুলত মণিপুরর ইতিহাস, মণিপুরি জাতির ইতিহাস নাগই। মণিপুরর ইতিহাস বারো মণিপুরির ইতিহাস আকহান নাগই। জাতআহানর মুলশক্তি অন্ত্যজ মানু অতাই ইতিহাসে হাবির আগে বাদ পরো পরতারাগা। অহানে সমস্যা নেই। হুত্তুমে জাতি আহান ইতিহাসলো ডাঙর নাইতারা। আমার কাদাবারার বাঙালি জাতির কথাহানই চেইক। হায়হান মাতলে জাতি হিসেবে বাঙালির বিকাশ মাত্র কয়েকশো বসর আগরহান বুলানি য়াকরের। সুনীতিকুমার, নীহাররঞ্জন গুপ্ত, রমেশচন্দ্র, দীনেশচন্দ্র বাবুগাসিয়ে ইকরিয়া গেসিগা ঔতা বাঙলার ইতিহাস, বাঙালিরতা নাগই। যেমন, মহাস্থানগড়, এহান অইলতা পুণ্ড্রজ বুলিয়া জাতি আহার কীর্তিহান। অথবা উয়ারী-বটেশ্বর, অতাউ মান্দি জাতির অবদান। রমেশবাবুগাছির সমইেৎ লুপা গবেষণা নাইসে, অসাদে প্রযুক্তিয়ৌ নেয়সিল, তানু যেতা পেইলা অতারেই 'বাঙালির হাজার বছরের মহান কীর্তি' বুলিয়া চালাদিলা। সামপ্রতিক গবেষনাত দেহিয়ারতার, বাঙালির লগে এরে সভ্যতার এতার একদম হরপগই-বেঙগই সম্পর্ক। অহান বুলিয়া বাঙালি কিন্তু তলে পড়িয়া নেই।

মহাভারত রামায়নে ইতিহাস না বিসারিয়া আমারতা এবাকা নিজর ইতিহাসহান নিজে হঙকরানির বারাদে মনোযোগ দেনা লাগতই। আমার ভাষা-সাহিত্য-সংস্কৃতির বারনগো বরা করিয়া- এতাই আগামি দিনে আমার ইতিহাস অয়া থাইতয়তা।


তথ্যনির্দেশ:
১. মর্গান, জেপি, কোয়ার্টার্নারি জিওলজি অব বেঙ্গল বেসিন, লুসিয়ানা বিশ্ববিদ্যালয়, ১ সেপ্টেম্বর ১৯৫৫
২. Lipner, Julius (1998), Hindus: Their Religious Beliefs and Practices, p 7-8
৩. Thapar, R. 1993. Interpreting Early India. Delhi: Oxford University Press. p. 77
৪. David Lorenzen, Who Invented Hinduism? New Delhi 2006, pp. 24-33
৫. http://en.wikipedia.org/wiki/Out_of_India_theory
৬. http://heritageorissa.com/PeopleT/peoples.html
৭. http://appiusforum.net/scripts.html
৮. পদ্মনাথ ভট্টাচার্য, কামরূপ শাসনাবলী, ১৩৩৮ বঙ্গাব্দ, পৃ ৩-৪

[ আসামর গৌহাটিত্ত নিকুলের সরারেল পত্রিকার ২য় বর্ষ ১ম সংখ্যাৎ শিমু সিংহ গিরকর ইকরা অ'হিন্দু অরিজিন সম্পর্কে দ্বি-আক কথা লেখা অহার মাতুং ইলয়া]

লেখক: অসীমকুমার সিংহ

A clarification on the term Mayang in Relation to Bishnupriya Manipuri || ময়াং শব্দএগোর বারাদে নুয়া মিল্লেঙ আহান

Manipuri, Bishnupriya Manipuri, Bishnupriya, Khalachai, Kalisha, Mayang ইত্যাদি নাঙএতা কুরাঙতো আহিল, কিসাদে হঙইল বা কিসাদে আমার ইতিহাস-ঐতিহ্য-পরম্পরার লগে আয়া তিলইলগা এতালো আমার পন্ডিত গিরিগিথানীয়ে এবাকাউ মীমাংসার লেপ্পা কাফাম আহাত ফৌঅনি নারেসি। পুরানা কোন ইতিহাস, দলিল-দস্তাবেজ বারো নথিপত্রত ‘বিষ্ণুপ্রিয়া’ বুলিয়া কুনো জাতর বা থারর নাঙসাত পেয়া নাপেয়ার। প্রাচীন কোন নিদর্শন, শিলালিপি বা লিখিত সাহিত্য নেয়নিয়ে আমার ঠারঅহার ক্রমবিবর্তনর ধারাবাহিক রুপআহান পানাউ হিনুইসে। আমার পূর্বপুরুষেউ মাতে পারিল অসাদে কুনো নিদর্শন থয়া যানা নারেসি, তানু হয়তো নিজর জাতহার আইডেন্টিটি বারো ঠারহার মুঙে কুনো সংকট কুনোসমেইত উবা অইতয়গা বুলিয়া না খালকরেসি। এবাকা পেয়া আমারতা বুলিয়া যেতা যেতা তথ্যপাতি পানা অসেউতা মুলত বৃটিশ, ভারতীয় বারো মৈতৈ ইতিহাসবিদ যেতাই নানান সময়ে তানুর ইকরাত হেইরাপ উল্লেখ আকেইহান করিয়া গেসিগা ঔতা। বৃটিশ লেখক বারো ভাষাতাত্ত্বিক ড. জি এ গ্রীয়ার্সন গিরকরাঙতো চিঙকরিয়া বি সি এলেন, ই টি ডালটন, ক. মেককুলাক, ক্যাপ্টেন ই ডব্লিউ ডান প্রমুখ গিরকগাসির ইকরাত ‘ময়াং’ (Mayang) বুলিয়া ঠারআহার কথা উল্লেখ পেয়ার যেহানরে আমার ইতিহাসবিদ, ভাষাবিদ বারো পন্ডিত গিরকলকেয়ে আমার ঠারহান বুলিয়া চিহ্নিত করেসি। অতার পিসেদে বিভিন্ন ভারতীয় লেখকে ঠারএহানলো নানান সামঞ্জস্যহীন মন্তব্য করিয়া তানুর দ্বায়িত্বহীনতা বারো উন্নাসিতকা দেহাদিয়া গেসিগা। ড. সুনীতিকুমার চ্যাটার্জ্জী, ড. বাণীকান্ত কাকতী, ড. মহেশ্বর নিয়গর সাদে গিরক কতগই নিয়ামপারা উৎসাহী অয়া ঠারএহান বাঙলার উপভাষাহান না অসমীয়া ঠারর উপভাষাহান এহানলো উসুলা পাসুলি দিয়া নিয়াম হিমপেইলা। তানুর লগে তাল দিয়া ইবহাল সিংহ, ইবুঙোহাল সিংহ, য়ুমজাউ সিংহর দেকি উগ্র হিন্দুবাদী মৈতৈ লেখক কতগয় খায়রে ডাঙর করতেগা আমার মানুরে তলকরানির হৎনা করলা।

বিংশ শতকর তৃতীয় দশকেত্ত আমার মানুরাং জাতিগত বারো রাজনৈতিক চেতনা উদয় অনা অকরলে আমার মানু সভা-সমিতি-সাহিত্যর বারাদে মনহান দিলা। Bishnupriya Manipuri গিরিগিথানীরাং জাতিয়তাবাদ বারো ইতিহাস চর্চ্চার হোৎ আগো আহিল। শ্রীমহেন্দ্রকুমার সিংহ, পন্ডিত সেনা সিংহ, খুমল মহিদেব সিংহ, কৃষ্ণকুমার সিংহ,হরিদাস সিংহ প্রমুখ জ্ঞানীগুণী গিরিগিথানির ইকরাৎ জাতীয় চেতনার প্রতিফলন দেহিয়ার। সমাজর শিতি গিরিগিথানীর তেতনেই হৎনার ফলে বৃটিশ সরকারে ভারতবর্ষর লোকলেহাত্ত মণিপুরীরে পার্ব্বত্য জাত’র নাঙহান সেচেয়া আর্য্যহিন্দু মণিপুরী বুলিয়া লেপকরানিত বাধ্য অসিল। এতার হাদিৎ রাজমোহন নাথ বুলিয়া বরাক উপত্যকার ইঞ্জিনিয়ার কাম ইতিহাস-ইকরেকুরা গিরক আগই বিষ্ণুপ্রিয়া এতা মণিপুরর পয়লাহার সভ্য শাসক জাতিহান ইয়াথাইতেউ পারে বুলিয়া কথাআহান মাতেদিয়া জাতীয়তাবাদর ইথাকগো আরতাউ ইহৌ কাকরেদেসিল। মুলত ঔ সমেইত্ত আতম্বাপু-ইবহাল-ইবুঙোহাল-য়ুমজাউ গাসির লগে ফাঙনা দিয়া নিজর ইতিহাস, পরম্পরা বারো ঐতিহ্য ডাঙর করে দেহুয়েইতেগা হুদ্দা অনুমান, আবেগ, প্রবাবিলিটি বারো হাইপোথিসিসর ভিত্তিলো ইতিহাস হঙকরানি বা ইতিহাসর ব্যাখ্যা দেনার প্রবনতা আহান আমার লেখক গিরিগিথানীরাং হাচুরাসে বুলিয়া মাতানি অকরের।

এহান আমার দুর্ভাগ্যহান যে বৃটিশ বা ভারতীয় কুনো জাতর লেখকেউ আমার ঠারহার গজে মুল ফাৎকরে গবেষনা করানির হেইনা নাকরেসি, অথচ আমারাঙতো জিঙিন গৌন জনগোষ্ঠিরে নিয়া তানু ভল্যুম ভল্যুম লেইরিক লেঙকরিয়া গিয়াসি। বৃটিশ লেখকরমা আমার ঠারর গজে একমাত্র ডিটেইল গবেষনাকর্মহান পেয়ারতা স্যার ড. জি এ গ্রীয়ার্সন গিরকরাঙতো; গিরকে তার ‘লিঙ্গ্যুস্টিক সার্ভে অব ইন্ডিয়া’ নাঙর প্রামাণ্যগ্রন্থর ৫ম খন্ডত ‘ময়াং’ নাঙে সাপ্লিমেন্ট আহান য়ৌকরেসে। ঔ সাপ্লিমেন্ট অহানাত আমার ঠারর আরূপী বৈশিষ্ঠ্য কতহার উল্লেখ পেয়ার বারো আমার ঠারর লগে উত্তরপুর্ব ভারতর আর আর ঠারর তুলনামুলক সংপ্তি স্টাডি আহান পেয়ার। এপেই মাতানি থক, একমাত্র ড. জি এ গ্রীয়ার্সন গিরকে ‘ময়াং’ বুলিয়া কথিত ঠারঔহান টটরেকুরা জনগোষ্ঠি অহানরে বিষ্ণুপুরিয়া মণিপুরী বুলিয়া চিহ্নিত করেসে [১]। আরতা হাবিয়ে ভাষা অহানরে বুঝেইতে ‘ময়াং’, ‘মেয়াং’ ইত্যাদি ওয়াহি ব্যবহার করেসি বারো জনগোষ্ঠি অহানরে ‘খালাছাই’, ‘কালিসা’. ‘কালাচায়া’ ইত্যাদি নাঙ দেসি। এখুরুম বিভিন্ন বৃটিশ লেখকে ময়াং নিয়া যেতা যেতা মন্তব্য করিয়া গেসিগা ঔতার বারাদে আকমাউ মিল্লেঙ দিক-

• They (Mayangs) amongst themselves speak their own language, which is a dialact of Hindee... – Col Mc.Cullock, An account of the Valley of Manipore, 1849.
• The present population of Manipur includes a tribe called Meyung who speak a language of Sanskrit derivation... - E.T. Dalton, Descriptive Ethnology of Bengal, 1872, page 49
  
• The Mayang-sajik department supervises the supplies of fodder’s and grass for elephants and ponies – T. C. Hudson, The Meitheis, 1908, page 69
  
• The Mayangs are employed as grass cutters - Cap E. W. Dun, Gazzeteer of Manipur, 1886, page 27
  
• Western Assamese slightly differs from that spoken at the eastern valley but the only dialect is Mayang or Bishnupuriya spoken by a Hindu colony - Sir G. A. Greirson, Linguistic Survey of India, Vol 1, Part I , Page 155
  

‘ময়াং’ শব্দএগোর উৎপত্তি বারো অর্থহান সমন্ধে আলোচনা করতেগা ড. কালীপ্রসাদ সিংহই শব্দ এগো মৈতৈ শব্দগো বুলিয়া উল্লেখ করেসে। গিরকর মতে ‘ময়াং’ শব্দ এহার অর্থ পশ্চিমর মানু বা বিদেশী বারো শব্দ এহান গালিহান হিসাবে প্রযোজ্য অর যেসাদে মৈতৈরেউ আমার মানুয়ে খায় বুলিয়া থারিতারা [২]। ড. সিংহই শব্দ এগো মৈতৈত্ত কিসাদে আহেসে ্ঔহার ব্যাখ্যা আহােনৗ দেসে। মৈতৈ ভাষাত ‘ম’ শব্দ এগোর অর্থ তা (He), সমাসবদ্ধ পদর আগে বহিলে অহানর অর্থহান অরতায় ‘তার’ (His)। কিত্তু প্রথম পুরুষ বুঝেইতে এরে শব্দ এগোর ব্যবহার অর। যেমন ‘মমিং’= ‘মিং’ (=নাঙ), মনম = নম (=গন্ধ) ইত্যাদি। ‘ময়াং’ শব্দত ‘ম’ শব্দ এগো খুব সম্ভবত: প্রথম পুরুষ বুঝানিরকা ব্যবহৃত অসেগো। ‘য়াং’ শব্দর অর্থ পিঠি বা পশ্চিমাংশ। সুতরাং ‘পশ্চিমাঞ্চলর মানু’ এ অর্থে শব্দ এগো পয়লা প্রযুক্ত অসেগো বুলিয়া মনে অর [৩]। বাঙালী ভাষাতাত্ত্ব্কি ড.সুনীতিকুমার চ্যাটার্জ্জী গিরকেউ ‘ময়াং’ শব্দর অর্থ বিদেশী বা বিংঃবৎহবৎ এসাদে আহান মাতিয়া গেসেগা। কুনো কুনো পন্ডিত গিরকলকেয়ে ‘ময়াং’ শব্দ এগো মৈতৈ ময়াম শব্দত্ত (হাকতাক আহাত আমার মানু সংখ্যায় মিয়াম বা নিয়াম আসিলা অর্থে; মি+য়াম>ময়াম>ময়াং এসাদে) আহেসে বুলিয়াউ মাততারা। এহার পিসে অবশ্য তথ্যপ্রমান বা যুক্তি কুনোহানৌ নেই। ‘ময়াং’ বিশেষ্য বারো ‘ময়াম’ বিশেষন পদর ওয়াহিগ। বর্ণবিপর্য্যয়, স্বরাগম বা স্বরলোপর মাধ্যমে শব্দ আগত্ত আরাক শব্দ আগর বুৎপত্তি ঘটলে মুল শব্দঅহান থানার কথাহান নাগই। কিস্তু বাস্তবে দেহিয়ারতা ‘ময়াং’ বারো ‘ময়াম’ শব্দ দ্বিয়হানিয়ৌ ঠারআহাত ব্যবহৃত অর। কুনো কুনোগই বারো ময়াং’র জড়গো ‘মিয়াত’ বুলিয়া উল্টা ব্যাখ্যা আহানউ উবা করতারা (যেমন মি = মানু, য়াত=কম; মিয়াত>মিয়াং এসাদে)। হৌগদে বিষ্ণুপ্রিয়া মণিপুরী সাহিত্য পরিষদর সাধারন সম্পাদক শ্রী মঙ্গলবাবু সিংহ গিরকে ড.কালিপ্রসাদ সিংহর ধারনা অহানরে ‘সম্পুর্ণ ভুল’হান বুলিয়া উড়াদিয়া মাতের ‘ময়াং’ শব্দ এগো মৈতৈত্ত নাগই, আহেসেতা সংস্কৃত ‘ময়ু:’ শব্দত্ত, ময়ু>ময়ুম>ময়ুন>ময়াং এসাদে। ‘ময়ু:’ দ্বিতীয়ার একবচন বারো বহুবচনে ময়ুম বা ময়ুন অর তারো ‘উ’কার স্থলে ‘আ’কার অইলে ময়ুং শব্দত্ত ময়াং অর [৪]। তিন খন্ডর বিষ্ণুপ্রিয়া মণিপুরী ভাষাতত্ত্বর সমীা নাঙর লেরিকে গিরকে রামায়ন, মহাভারত, বিষ্ণুপুরাণ, ভবিষ্যপুরাণ ইত্যাদি নানান পৌরাণিক লেরিকর উদ্ধৃতি আসুলিয়া দেহুয়াসে মণিপুর এহান দৌর ধামহান উপরন্তু সংস্কৃত ‘ময়:ু’ অর্থ গন্ধর্ব, অপ্সরা, য, কিন্নর ইত্যাদি; ময়াং মানে গন্ধর্ব অতএব বিষ্ণুপ্রিয়া মণিপুরী এতা স্যাাৎ দৌ বা গন্ধর্বর জাতহান। কাজেই দেহিয়ারতা আমার ইতিহাসবিদ বারো ভাষাবিদ গিরিগিথানীয়ে নানানভাবে ‘ময়াং’ শব্দএহার অর্থহান বিসারানির হৎনা করেসি, কিন্তু কুনোগউ লেপ্পা মীমাংসা আহাত থুঙনা নারেসি।

আলোচনার মেলহাত হমানির আগে ‘ময়াং’ শব্দ এগো কুন থাররগো ঔহান আগে লেপকরানির হৎনা করিক। শব্দ এগো আমার ঠাররগো যে নাগই এবিষয়ে কুনো সন্দই নেই। শব্দ এগোর পিসে আমারতা কুনো কিংবদন্তী বা ট্রাডিশন নেই ঔহানউ স্বীকার করানি লাগতই। প্রথমত: আমার ঠারর কুনো সাহিত্য বা এলাত শব্দ এগো নাদেহিয়ার । আমার কুনো লোকসাহিত্য যেমন বরন ডাহানির এলা, মাদই সরালেলর এলা, লপুকর এলা, পৌরেই, বুড়াবুড়ির য়ারি, আপাঙর য়ারি, খেলর ছড়া, শৌ থেমকরানির ছড়া, মাহি মন্ত্র ইত্যাদিত ‘ময়াং’ বুলিয়া কুনো শব্দ নাপেয়ার। তদুপরি আমার গাঙগরর ইমা-ইন্দল বা বুজন গিরীগিথানীরাং শব্দ এগো সুপৌ ফ্যামিলিয়ার বা পরিচিত নাগই। দ্বিতীয়ত: সংস্কৃত, বাংলা, হিন্দী বারো অসমীয়া ঠারর শব্দভান্ডারে ‘ময়াং’ বুলিয়া কুনো শব্দর অস্তিত্ব বিসারিয়া নাপেয়ার। তৃতীয়ত: বাঙালী, অসমীয়া বা ভারতর অন্য কুনো জাতর মানুরে আমারে কুনো সমেইত ‘ময়াং’ বুলিয়া নামাততারা। চতুর্থত: কাছাড়, ত্রিপুরা বা বাংলাদেশর মৈতৈয়ে আমারে ‘ময়াং’ নাবুলতারা। নেতৃস্থানীয় বা লেখালেখি করাতারা দুগো আগ খায়ে আমারে ‘ময়াং কালিসা’ বুলতারা অহানউ হুদ্দা একাডেমিক বিতর্কত বা লেইরিক-লেইসুত সীমাবদ্ধ থার। কাজেই যেহেতু বিষ্ণুপ্রিয়া, হিন্দী, বাংলা বা অমসীয়া কুনো ঠারেই ‘ময়াং’ শব্দ এগো নাপেয়ার, একমাত্র মৈতৈ ঠারে শব্দ এগো আসে এবং এবাকাউ ব্যবহৃত অর, তা থকিয়া শব্দ এগোরে মৈতৈ শব্দগো বুলিয়াই লেপনা লাগের। এন. খেলচন্দ্র সিংহ গিরকর সম্পাদিত মৈতৈ ঠারর অভিধান ‘Manipuri to Manipuri and English dictionary’ অহাত ‘ময়াং’ শব্দএহান পেয়ার, অর্থহান দেসিতা এসাদে - “(Mayang) হ. থোংনাঙ (অরিবা লোন)। Indian who are coming through the western side of Manipur… [৫]।

সুতরাং শ্রী মঙ্গলবাবু সিংহই ‘ময়াং’ শব্দএগো মৈতৈ শব্দগো নাগই বুলিয়া দাবী করের ঔহান গ্রহনযোগ্য অইতয় বুলিয়া মনে নার। বৃটিশ গবেষক ই. টি. ডাল্টন গিরকর ‘Meyung’ শব্দ অহান শ্রী মঙ্গলবাবু সিংহরে জবর উজ্জীবিত করেসে হারপা পারিয়ার, কিন্তু ‘Meyung’র উচ্চারন ‘মেয়ুং’ নায়া ‘মেয়াং’ বা ‘মিয়াং’উ ইতে পারেনায়। এপেই ময়ুত্ত ময়ুন ইয়া ময়াং আহে থাইলেতে হাদি এগৎ মেয়ুং কুরাঙতো কিসাদে আহিলতা বারো কিদিয়া এপেই ‘অ’কারর স্থলে ‘এ’কারর আগম অইলতা এহানৌ ব্যাখ্যা করানি থকসিল। হাবিত্ত দু:খর য়ারিহানতে এহান গিরকে ‘ময়াং’ শব্দর ব্যুৎপত্তি বিসারতেগা লাম, লেইপাক, খৌনু, পুন্নিঙ, মিঙাল, ফুংকা, মেঙশেল, সাকেই ইত্যাদি নিরপরাধ অনার্য্য শব্দরে কাল্পনিক ব্যাখ্যাআকেইহান উবা করিয়া সংস্কৃত অরিজিনে নিয়া বেলাদেসেগা। দুনিয়াহার হাবিতা রামায়ন-মহাভারতর মিল্লেঙেত্ত চানা বারো ঔতার ডিকসনলো ইতিহাস বা ভাষাতত্ত্ব গবেষনাত লামানির প্রবনতা অহান আমার গবেষনা-সাহিত্যর নিয়াম বিপজ্জনক দিকহান। হুত্তুমে দুনিয়াএহার যেকুনো ঠারর যেকুনো শব্দরেউ মনগড়া ব্যাখ্যা দিয়া নির্দিস্ট কুনো ঠারে বরানি অহান অমাটিক হিমপেইল কামহান নাগই, প্রশ্নহান গ্রহনযোগ্যতা বুলতারা বিষয় অহাৎ।

ড. কালিপ্রসাদ সিংহ গিরকে ড. সুনীতিকুমার চ্যাটার্জ্জীর মাতুং ইলয়া ‘the term mayang means westerner or foreigner’ বুলেসে কথা এহানৌ পুরাহান সঠিকহান বুলিয়া মাতে নারিয়ার। নিজর মতহানরে ডাঙর করতে গিয়া বা গবেষনার পথগো লালৈতে গিয়া ভাষাবিজ্ঞানে অনেকসময় রেডীমেইড তথ্যর ব্যবহার অর, কিন্তু যাচাই নাকরিয়া বা তথ্যপ্রমান নাবিসারিয়া পটকো লাইনআহান ছঁড়ঃব করেবেলানি অহান দ্বায়িত্বশীলতার পরিচয় নাদের। যেহেতু ‘ময়াং’ শব্দএহার উৎপত্তি মণিপুরে, অহানে বর্তমান মণিপুরর মানুয়ে শব্দএহানরে কী অর্থে বা কিসাদে ব্যবহার করতারা অহানৌ বিবেচনাত আনানি লাগের। মণিপুরর মানুয়ে ‘ময়াং’ মাততারাতা নির্দিষ্ট কুনো ভাষাগোষ্ঠি বা জনগোষ্ঠিরে নাগই, অমণিপুরী সধরহষধহফ রহফরধহ অর্থ্যাৎ মণিপুরর বারার বারো ভারতর অন্যান্য রাজ্যর মানুঅতারে মণিপুরে ময়াং বুলিয়া মাততারা। এপেই ময়াং বুলতে বাঙালী, পাঞ্জাবি, বিহারি, মারাঠি হাবিরে বুঝানি অর। ‘Manipuri to Manipuri and English dictionary’ নাঙর মৈতৈ অভিধান অহাত ‘ময়াং’ অর্থ দেসিতা ‘Indian who are coming through the western side of Manipur…’। গতিকে ময়াং বুলতে এপেই হুদ্দা ভারতীয় মানু যেতা মণিপুরর পিছবারা অহানদে হমাসিগা ঔতারে হারপুয়ানি অসে। এহানৌ হায়হান যে ‘ময়াং’ শব্দ এহান গালিহান নাইলেউ খানি শ্লেষার্থে প্রযুক্ত অর, কিন্তু কোনক্রমেই বিদেশী বা ‘Westerner’ বা ‘Foriegner’ অর্থে ব্যবহার নার। যেমন বার্মার মানুরে এপেই ‘অওয়া’ বুলতারা, অসাদে চীনদেশর মানুরে ‘খাগি’ বুলতারা ইত্যাদি কিন্তু তানুরে কোনসময় ময়াং নাবুলতারা। আধুনিক যুগর কুনো মৈতৈ লেখক বা গবেষকে তানুর ইকরাৎ ময়াং শব্দ এগোরে ‘Westerner’ বা ‘Foreigner’ বুঝেইতে ব্যবহার করতে নাদেহরাং । ‘ময়াং’ প্রসঙ্গৎ মণিপুরর নুয়া প্রজন্মর গবেষক লে. কর্ণেল এইচ. ভুবন সিংহ গিরকে টাঙখেই সেংকরে ইকরেসে- “The Meiteis (plains Manipuris) call all outsiders as mayangs in Manipur without specifying any community. To a Meitei, a Bihari is a mayang, a Bengali a mayang, a Rajasthani a mayang, etc. There is no community called mayang [৭]।



To be contd...


Author: Ashim Kumar Singha

তথ্যনির্দেশ
1. Sir G. A. Grierson / Linguistic Survey of India, Vol-IV, Part- I, 1903, P-419
2. Dr. K P Sinha / Bishnupriya Manipuri Language, Calcutta 1981, P-3
3. ড. কালিপ্রসাদ সিংহ/ বিষ্ণুপ্রিয়া মণিপুরী ভাষাতত্ত্বর রূপরেখা, শিলচর ১৯৭৭
4. শ্রী মঙ্গলবাবু সিংহ / বিষ্ণুপ্রিয়া মণিপুরী ভাষাতত্ত্বর সমীা (১ম খন্ড) ,শিলচর ২০০২,পৃ-১৭
5.Manipuri to Manipuri and English Dictionary by N. Khelchandra Singh, Imphal 1964, p- 429
6.NSCN(I-M) and Government of India Peace Talks by Lt. Col. H. Bhuban Singh (Retd.), Imphal 2004

বিষ্ণুপ্রিয়া মণিপুরীর লৌকিক বিশ্বাস বারো মণিপুরর লোকধর্ম - ৪

কালঠাকুর
কালঠাকুর ওয়াহি এগোর লেপ্পা অরিজিন হারপানি চিলইসে কিয়াবুল্লে কোন প্রামাণ্য লেইরিক লেইসুত কালঠাকুরর উল্লেখ নাপেয়ার। পুল্লাপ অনিষ্টকারী দৌগো কালঠাকুরর গিরকরে লয়া য়ারিপারির সীমাসংখ্যা নেই। কালঠাকুর গিরকরে কুনো কুনোগই মহাদেবর রূপহান বুলিয়া নিঙকরতারা, কিন্তু মহাদেবর এসাদে পুল্লাপ নেগেটিভ স্পিরিটর পরিচয় কুরাঙৌ নাপারাঙ। তান্ত্রিক দর্শনর কালীমাই বুলতারা গিথানক অগর পুরুষাকারহান নিঙকরিয়া গিরকএগোরে কালগিরক বুলিয়াউ মাততারা। যেতাউ অক, কালঠাকুর ওয়াহি এগোর লগে কালারঙর সম্পর্ক আহান আসে এপেই কোন সন্দই নেই। য়ারিপারি বারো লোকবিশ্বাসর ধরনেত্ব মণিপুর মিথলজির কালাদৌ ওয়াঙবেরেনর লগে মান্নাপাআহান বিসারিয়া পেয়ার। কালঠাকুরর কুুসুহাত্ত চিংকরিয়া ফিজেৎকিতা হাবিতা কালা। গিরকএগো কুনোসমেইৎ কালা মানুগো বারো কুনোসমেইৎ কালা মোষগোর রূপহান দরিয়া নির্জন জাগাঅতাৎ বিশেষকরিয়া পহুরির পাড়ে, গাটরপাড়ে, বাহারসপার হাদিৎ, লপুকে, উরুমফামে লুকিয়া থার। বারোবাজিৎ, সেন্ধ্যাৎ বা রাতিনঙেই সিকসিক বরন দিলে গিরকএগো নিকুলিয়া আহের বারো মানু আখুলাআখুলি থাইলে উগোরে ধরের। গিরকে ধরলে মানু নিংসা দিফিয়া, থতাদে কলপুক নিকালিয়া মরতারা। গিরকএগোই শৌ সুমারারে পানিত বুরাদিয়াউ মারের বুলিয়া মাততারা। কালা রঙর মাছ বাজারেত্ত লয়া আনলে পথেত্ত গিরকএগোই থাবিয়া নেরগা বুলিয়া অধিকাংশ বিষ্ণুপ্রিয়া মণিপুরীয়ে বাজারেত্ত কালা মাছ নালইতারা। চাপাল দিয়া কালগিরকরে হারৌ করানি লাগের, ঔহানে নাইলে হারপাকুরা মেইপা দরিয়া ‘কাম’ করুয়ানি লাগের।

পাথরপুজা
আগে আমার মানুয়ে হিল বা পাথর দৌজ্ঞানে পুজা করেসি অহার প্রমান আমার সংস্কৃতিত এবাকাউ পেয়ার। কুনো কুনো লকেইর মানুয়ে হিলউতা মাটির কলআগৎ বরিয়া বারনগৎ বিতরে থইতারা বারো বছরহার লেহে আপোকপা হমাদেনির সমেইত ঔ হিলউতা নিকালিয়া সেলকমনো হিনাদিতারা। বারনগৎ নুয়া ধান বরানির আগে ধানর লগে হিল আকেইগো য়ৌকরানি লাগের। নুয়া ধান রইদগৎ হুকানির সমেইতৌ হিল উগো না বেলাদিতারা। এতাবাদে পহুরির পাড়ে, উঠানহাত তুলসীপুঙগৎ, গরর বিতরে উপুগর তলেউ হিল থনার চল দেহিয়ার। প্রাচীর মণিপুরর হিল উপাসনা কালচার নিয়া কলনেল জে. শেক্সপিয়ার বারো জে.সি. হিগিন্স গিরকে গবেষণা করেসি। মণিপুরর পুরাণ উতাত মৈরাঙর রাজপুরুষ য়াউসুরাকপা মরানির আগে হিলগোৎ সিলোসিল বুলিয়া মাতেসি। খাম্বা-থৈবীর য়ারিত যুদ্ধত সালনার আগে খাম্বাই খা-পিছবারার দৌ থাঙজিঙর নিঙে হিলআগর মুঙে দলামোষ আগো কাৎকরেসিল বুলিয়া উল্লেখ পেয়ার[২৬]।

রুকরসপা হমাদেনির কালচার বারো সংশ্লিষ্ট লোকাচার
দৌ নিঙকরিয়া রুকরসপা হমাদেনির কালচার অহান প্রাচীন নানান জাতির মধ্যেউ প্রচলিত কালচারহান। ৩৬৪ হান বৈশিষ্ঠপূর্ন গাছরজার (Scred Groves) মণিপুরে পেয়ার যেতা কুনো না কুনোভাবে দৌদুকর লগে সংশ্লিষ্ট। কুনো কুনো গাছজার দৌ থাইতারা লেইফাম বুলিয়া বারো কুনো কুনো গাছজাররে দৌ আকেইগর সমান মর্যাদা দিয়া পুজা কাৎকরানি অর। উঠানহার কোণগৎ তুলসীসপারে এবাকা যেসাদে পুজা কাৎকরানি অর অসাদে গাছজার উতারে আগেকার মানুয়ে পুজা কাৎকরলা। কুনো কুনো গাছজারে জাঙর পারা পড়লে হমাদেনা লাগের। ডাঙর গাছ আকজার সেদানির আগে ‘অমুকপারা দিনে তরে সেদানি অইতই’ বুলিয়া দিনহান লনা লাগের বারো সেদানির সমেইত তিনমাউ হমাদিয়া সেৎহান বেলানি লাগের। চেইলেই যেকুনো সমেইত যেকুনো গাছর জার সেদানির নিয়ম নেই, উতার কাজে লেপকরা দিন বা সমেয় থার। যেমন [২৮]-



গাছজার হমাদেনির কালচারর লগে সংশ্লিষ্ট লোকাচারউতা প্রকৃতি বারো প্রাকৃতিক রহস্যর বারে আমার পুর্বপুরুষর চিন্তাচেতনার পরিচয় আকেইহান। পৃথিবীর নানান আদিম জাতির বিতরেউ বৃপুজার চল দেহিয়ার। আগেকার মানুয়ে রুকরসপা আহানর বিতরেউ অলৌকিক মতাসম্পন্ন আত্মাআগোর অস্তিত্ত খালকরলা। আরাক বিশ্বাস আহান অইলতা পৃথিবীর হাবি বস্তু কুনো না কুনোভাবে দৌ-দুকে নিয়ন্ত্রন করতারা। মুলত দৌদুকরে হারৌ করানি, বরনবাদল, বজ্রপাত, দাবানল ইত্যাদি প্রাকৃতিক বিপর্যয়েত্ত বারো নুয়ারাপানিত্ত বাচানির সালে, কুনো কুনো ত্রেত শৌসুমারা পানার সালেউ মানুয়ে রুকরসবাত পুজা কাৎকরলা [২৮]। পাশ্চাত্যর পন্ডিত গবেষকে যেহানরে Animism বা সর্বপ্রাণবাদ বুলতারা ঔহার গৎআগো এহানাৎ পেয়ার। সর্বপ্রাণবাদর মুলে আসেতা রুকরসবা, গাছজার, পাথর, মাটি, বেলী, জুনাক ইত্যাদির বিতরে দৌর অস্তিত্ত খালকরিয়া ঔতার সক্রিয় উপাসনা।



তথ্যনির্দেশ:
26. Higgins, J.C., Notes on Manipuri beliefs and customs, London, MS 95069, pp 28
২৭. ইকোলজি বিভাগ, আসাম বিশ্ববিদ্যালয়র শ্রীজিতেন্দ্র সিংহ, শ্রীবিরাজ সিংহ বারো শ্রীঅভিক গুপ্ত গিরক গাছির 'Environmental Ethics in the Culture of Manipuris from North East India’ (2003)নাঙর রিসার্চ পেপারেত্ত খমকরেসু তথ্যহানি
২৮. K. Ashalata Devi, Sacred groves in Manipur, Dept of Forestry/NERIST, Nirjuli, 2005

লেখক : অসীমকুমার সিংহ

বাংলাপিডিয়াত বিষ্ণুপ্রিয়া মণিপুরীর নাঙসাত নেই!

বাংলাদেশর জাতীর বিশ্বকোষ বুলিয়া নিকালাসি ১০ খন্ডর বাংলাপিডিয়াত বাংলাদেশর কোণা কোনসেলর হুরুকাং ডাঙর হাবি প্রান্তিক জনগোষ্ঠির বিবরন থাইলেউ বিষ্ণুপ্রিয়া মণিপুরীর নাঙসাত নেই। মণিপুরীর নাঙে আসেতা হুদ্দা খাইর য়্যারি। ৭ম খন্ডর ৪৬৮, ৪৬৯ বারো ৪৭০ পৃষ্টাত বারো ২য় খন্ডর ৬-১৫ পৃষ্টা পেয়া হুদ্দা খাইর য়্যারিলো বুজাসি। মণিপুরীরে বুলতে ‘মৈতৈ’ বারো মণিপুরী ঠার বুলতে ‘মৈতৈ’ ঠার হারপানি উনি। ১৯১৯ সালে কবিগুরু রবীন্দ্রনাথ ঠাকুরর মাছিমপুর পরিদর্শন, জোড়ামান্ডপর রাসপুর্ণিমা, ললিতকলা একাডেমীর কুনো নাঙনিশানা নেই। ভানুবিলর কৃষকপ্রজা আন্দোলন অহানউ খায়ে করিসিহান উনি।

বাংলাপিডিয়ার প্রধান সম্পাদকগো ড. সিরাজুল ইসলাম বারো প্রকাশকগো-বাংলাদেশ এশিয়াটিক সোসাইটি। মুদ্রিত সংস্করন অহান বাদেউ বাংলাপিডিয়া সিডি বারো ওয়েবসাইট আকারেউ নিকালাসি। আজি পেয়া আমার মানুর কুনো সমিতি সংগঠনে এহার প্রতিবাদ নাকরেসি বা খোজখবর নালুয়াসি। ব্যক্তিগত পর্যায়ে দুগ আগই এহার ব্যাপারে কর্তৃপর লগে যোগাযোগ করলে তাঙরে করতাঙাই কররাঙ বুলিয়া বাংগালবুজ দিয়া থসি বুলিয়া পৌ পেইলাং। ইথাকর বারাদেত্ত এহার মুল ফংকরে তদন্ত করাত লামিয়া হারপেইলাংতা সিলেটের খাইমামা গাসিয়ে দাবদাদাবদি করিয়া হায়তাই নাবেতাই তথ্য সরবরাহ করিয়া এহান করেসিহান। আমার জ্ঞানেগুণে পাংকালপা নেতালকেইরাং এতা গুরুত্বপুর্ণ নাইলেউ খায়েতে যথেষ্ঠ গুরুত্ব দিতারা। আমার অসচেতনার কাজে ক্লাস ফাইভর সমাজবিজ্ঞান লেরিকেত্ত চিঙকরিয়া বাংলাদেশর অন্যান্য জাতীয় প্রকাশনাত আমারে অবহেলা করানি অর।

বাংলাদেশর ইতিহাস, ঐতিহ্য, সংস্কৃতি নিয়া জাতীয় পর্যায়ে লেরিক লেইসউ যেতা ফঙর অতাত আমার দু:খর, আহানির, কাদানির, ভাষা-সংস্কৃতির সঠিক কুনো ফাম নেই, যদিয়ৌ আমি যে দেশেউ থাইক, যে ফামেউ থাইক, ঔ দেশরে-ফামরে নিজর বুলিয়া নিঙকরিয়ার, চিন্তা করিয়ার বারো কাম করিয়া যারাঙগা। নিয়াম দিন এসাদে চললে বিষ্ণুপ্রিয়া মণিপুরী বুলিয়া জাত আহান বাংলাদেশে আছি অহানউ কততাই অস্বীকার করতাই।

বাংলাপিডিয়ার অনলাইন ভার্সন এপেই চেইক - http://banglapedia.net/

বিষ্ণুপ্রিয়া মণিপুরীর লৌকিক বিশ্বাস বারো মণিপুরর লোকধর্ম - ৩

সনামাহি
সনামাহি বা সেনামাহি বুলিয়া মাততারা গিরকএগো থারতা গরর খা-পিছ কোণঅগদে যেপেই বারনগো থার। আমার মানুর কোন কোন লয়াত গিরক এগোরে সেনামানিক বুলিয়াউ মাততারা। আরিক অর্থহান বিসারাত বহিলে সনামাহির অর্থহান নিকুলেরতা ‘তরল হুনা’। ঔহানে নানান গবেষকে তানুর ইকরাত সনামাহি গিরগএকরে কুনোসমেইত ‘সূর্যদেব’[১৯], কুনোসমেইত ‘অগ্নিদেব’[২০] বুলিয়া উল্লেখ করেসি। মণিপুরর প্রাচীন লোকগাথা ‘নুমিত কাপ্পা’ত বেলী দুগোর উল্লেখ পেয়ার উতারমা বেলী আগো সনামাহি গিরকর রূপহান বুলিয়া কুনো কুনো গবেষকে মাতেসি। আগেকার মানুয়ে বেলি, দাবানল, জ্বি ইত্যাদি প্রাকৃতিক শক্তিরে হমাদেসি। জ্বিগোর লগে সম্পর্কিত প্রাকৃতিক শক্তি উতা আকহাত সুময়া দৌগর রূপহাত সনামাহি নাঙে বিবর্তিত অসে বুলিয়া নিঙকরে পারিয়ার। সনামাহি গরর বিতরর দৌগো। ড. কালীপ্রসাদ সিংহই সনামাহি গিরকরে গরর রক দৌগো বুলিয়া মাতেসে[২১]। গিরকএগো মৈতৈরাং এমাটিক ডাঙর ফাম কালকরিয়া থসে যে হাব্বি গরর খা-পিছ কোণেদে ‘সনামাহি কাচিন’ বুলিয়া গিরকর কাজে লেপ্পা লেইফাম আহান থদেনাই লাগের।

লেখক-গবেষক গিরকলকেয়ে মণিপুরর দর্শনর আধুনিক নাঙহান দিয়াসিতা সনামাহিজম (Sanamahism)। মণিপুরর মিথে সনামাহিরে পরমপুরুষ আতিয়া সিদাবার বলি পাঙকালপা পুতকগো বারো পাহাঙপার বেয়কগো বুলিয়া উল্লেখ করেসি। বাপকর য়াথাঙ পেয়া গিরকে মানু বারো জীবজগৎ এহান হাবি হঙকরেসে। টেইপাঙ মানুরে সাতহান তঙাল গোত্রত(Clan) খেইকরানি এহানৌ সনামাহি গিরকর আরাক অবদান আহান। সনামাহির বীরত্ব বারো সিংহাসনহার দখল নিয়া বেয়ক পাহাঙপার লগে কৌলির য়ারিআহান আসে। বাপক আতিয়া সিদাবায় মাতেসিলতা বেয়ক দ্বিয়গির মধ্যে যেগই হাবির আগে ভ্রহ্মান্ডহান পরিক্রমা করিয়া আহানি পারতই উগই সিংহাসনহান পেইতই। খুলা পিতকগো থকিয়া মালক লেইমারেলে বানাপেয়া পাহাঙপারে বাগাসিলিতা বাপকর সিংহাসনউহান সাতমাউ পরিক্রমা করলেই বিশ্বভ্রহ্মান্ড পরিক্রমাহান পুরা অইতই। মালকর কথা হুনিয়া পাহাঙপায় বাপকর সিংহাসন সাতবুলন দিয়া সিঙনাহান জিঙেবেল্ল। হৌগদে শৌর্য-বীর্যই পাঙকালপা সনামাহি মিকুপ আহানর মধ্যে ভ্রহ্মান্ডহান পরিক্রমা করিয়া আয়া দেহেরগাতা বেয়ক পাহাঙপা সিংহাসনহাত বয়া আসে। য়ারিএহার পয়লাকার তুপএহান হিন্দুপুরাণর কার্ত্তিক-গণেশর য়ারিয়ার তুলো মান্ন্া ইলেউ পিসেদের তুপঅহান গ্রীক পুরাণর য়ারিআহার সাদে ট্র্যাজিক পরিণতি আহাত গিয়া লয়সেগা। পাহাঙপার সিংহাসন দখলর দৃশ্যউহান দেহিয়া সনামাহি তিক শৌয়য়া পাহাঙপারে মারানিরকা তালকরে নেসিলগা, পাহাঙপা বারো ডরহানে লাইরেম্বী(দৌ-জেলা) দাপাআহানর হাদিৎ পলিয়া লিতুইসিল। বেয়করে বিসারিয়া নাপেয়া হতাশ সনামাহি চিকারি বাগেয়া লৌদেসিল বেয়করে বুদ্ধি দেসেউগো মুনিগো ইয়া থাইলে তার আতে উগো মরতই বারো জেলেইগো ইয়া থাইলেতে উগোরে তা লহঙ করতই। নির্মম ট্র্যাজেডির শিকার সনামাহি যেবাকা হারপেইলো বেয়করে বুদ্ধি দেসেউগো তার নিজর মালক লেইমারেল, উপাগা তার মুরে বজ্রাঘাত পড়িল পারা। অনুতাপে দু:খয় সনামাহি গিরক পৃথিবীহান ধ্বংস করাত যেপাগা লেপইল, হৌপেই স্বয়ং বাপক আহিয়া তারে খামকরিয়া বুঝ দেসিল রাজত্বহান পাহাঙপায় পেইলেউ মানুর গরর বিতরগো তা রাজত্ব্ করতই বারো গরে গরে হাবিয়ে মালক লেইমারেলর লগে তারে হমাদিতাই। ঔহানে এবাকাউ মণিপুরী ধর্মর অনুসারী ঔতাই ‘লেইমারেল কাচিন’র লগে ‘সনামাহি কাচিন’ কাদাকাদি থয়া হঙকরতারা বারো পুজাউ মান্না করিয়া দিতারা। [২২]

সনামাহি উপাসনার রীতিহান ‘সনামাহি লাইসন’- নানান মাহি মন্ত্র সলকরিয়া গিরকরে ডাহানি লাগের। পাহাঙপার সাদে হুদ্দা রাজবংশর মানু বা মেইপারমা সীমাবদ্ধ নাগই; আঙম, মৈরাঙ, খুমলেত্ত চিঙকরিয়া যে কুনো গোত্র যে কোন সাগেইর মানুয়ে সনামাহি গিরকর উপাসনা করানি পারতারা। বছর লৈয়ৈতেগা চৈরাউবার(বিষু) দিনে সনামাহি গিরকরকা তঙাল করিয়া পুজা আহান করতারা যেহানরে ‘সনামাহি খুরুম্বা’ বুলতারা। পুজা অহানাত কাবক, লারৌ, তিলুয়া, চউলর পিঠা, ফলমুল, ফুল ইত্যাদি কাৎকরতারা। মৈতৈর অসাদে বিষ্ণুপ্রিয়া মণিপুরীরাং ব্যাপক উপাসনর চল নেইলেউ গরর-দৌ হমাদেনার সমেইত গিরকর নাঙে এইরুক কাৎকরানি লাগের।



লামর দৌ
বছরহান লমর দিনউহাত লামর দৌ হমাদিতারা। আরিক অর্থে লামর দৌ বুলতে হারপেয়ারতা লাম আকেইহার দৌবিশেষ। লামর দৌ কালচারর লগে আত্মা উপাসনার সম্পর্কআহান আসে। থাইনাকালেত্ত আমার পূর্বপুরুষে বিশ্বাস করিয়া আহিতারা মানুআগো মরলে তার আত্মাাউগো না মরের; আত্মাউগো কুনোসমেইত অদৃশ্য ইয়া বায়ুমন্ডলে বুলে বুলে থার, কুনোসমেইত বারো নানান রূপ দরিয়া পহুরির বিতরে, লপুকে, রুকরসপাৎ বা জঙ্গলর হাদিৎ গর হঙকরিয়া থার [২৩]। লামর দৌ মর্যাদা পেইতারা আত্মাউতা অন্যান্য হবানেই দৌ-দুকর আতেত্ত লাম আহান রা করিয়া থইতারা। লাম আহাত মুলত দুগো লামরদৌ থাইতারা- আগো লামলাই বারো আরাকআগো লামলেইমা। লামআহানাত পয়লা দৌ-অর মুনি উগোরে লামঅহানর গিরকগো বা লামলাইগো বুলতারা; বারো লামআহানাত পয়লা দৌ-অইরী জেলা উগো লামঅহানর গিথানকগো বা লামলেইমাগো। লপুকে দৌওয়ার সমেইত, নুয়া ফসল রুয়ানির সমেইত বা লপুকে বান্দারা কিতা খেইলে লামর দৌরাঙ আগে চাকসা আহান দেনা লাগের। বছরহান লমর দিনউহাত আনুষ্ঠানিকভাবে লামর দৌ হমাদেনি অর। উঠানর অওয়াঙ-মুঙ কোণসেল উগোদে বা তিনজুড়া পথে কাবক, চিড়া, কলা, গুড়, চানা, চউলর লগে নানান জাতর পাতাপুতালো লুকহান হঙকরিয়া হাকরানি লাগের। লামর দৌ হমাদিতে ডাক করতাল বারানি বা এলা দেনার চল নেই।



দিকর দৌ
দিক ঙাক্করিয়া থইতারা দৌ উতারে ‘মেইকেই ঙাকপা’ বুলতারা। খা-পিছ বারাউহানদে থাঙজিং, অওয়াং-মুঙ বারউহানদে মারজিং, খা-মুঙ বারউহানদে ওয়াঙবেরেন বা ওয়াঙপুরেল বারো অওয়াং-পিছ বারাউহানদে কৌব্র“ - এসাদে চারিয়কোণাদে চারিগো দৌ আমার লামহান রা করিয়া থাইতারা। নুয়া গরগৎ অঙানির সমেইত ইনচাউগর চাইরোকোণাত চারিগো খুটি দিক-ঙাকপা গিরক এগিরাঙ সিলকরানি লাগের। থাঙজিং মুলত মৈরাঙর দৌগ; মৈরাঙে এবাকাউ থাঙজিং গিরকর লেইশাঙগো আছে যেপেই হারিবছর মৈরাঙ হারাউবা কুমেইঅহান অর। মারজিং গৃহপালিত জীবজন্তুর নুয়ারপানি ঙাক্করিয়া থর দৌগ; বিশ্বত Polo বুলিয়া নাঙকাসে মণিপুরর বিখ্যাত সাগোন কাঙজেই (গড়াৎ ড়িয়া খেলতারা খেলাজাত আহান), মুক্না কাঙজেই (হকির সাদে পাকানা বাহার ককারা লাঠিলো খেলাতারা খেলাজাত আহান), মুক্না (লাকাটি) ইত্যাদি খেলা উতা মারজিং গিরকে নিকালাসেতা[২৪]। কৌব্র“ মণিপুরর মিথলজির আরাক গুরুত্তপুর্ণ দৌ আগো; কৌব্র“ টেঙারা যেহানাত মণিপুর মাটিত পয়লাকা টেইপাঙ মানুর পারা পরেসিল বুলিয়া মাততারা ঔগোর নাঙহান কৌব্র“ গিরকর নাঙহাত্ত আহেসেহান[২৫]। ওয়াঙবেরেন মহামারির দৌগো; গিরকএগোই কালা বাঘআগোৎ চরিয়া বুলে বুলে থার। আতম্বাপু শর্মার অসাদে লেখক দুগো আগয় থাঙজিং গিরকরে বৈদিক দৌ ‘অশ্বিনীকুমার’, ওয়াঙপুরেলরে ‘বরুণ’ বারো কৌব্র“রে ‘কুবের’র লগে পাšতাম দিয়াসি।



তথ্যনির্দেশ:
১৯. Singh, W. Yumjao, Religious belief of Ancient Manipur, Imphal, 1966, page-66
২০. . Singh, L. Ibunglhal, Introduction to Manipur, Imphal, 1963, page-27
২১. ড. কালীপ্রসাদ সিংহ, প্রবন্ধমালা (৩য় খন্ড: মহৎ প্রশস্তি বারো সংস্কৃতি) শিলচর, ১৯৮৪, ২য় ভাগ, পৃষ্ঠা ১৫
22. Saroj Nalini Parratt, The Religion of Manipur, Calcutta 1980, page- 22
23. Manipur: Past and Present Vol-II, New Delhi, 1991, page 101-105
24. Dr. M T Laiba, The Geography of Manipur, Imphal ,1990, page-. 4
25. Dr. M. Kirti Singh, Religious Development. in Manipur, Imphal,1980, page-48


লেখক : অসীমকুমার সিংহ

সংস্কৃতির ফাঁক: খাল্করানির দিক কতহান

কথার ফাঁক, কামর ফাঁক এতা আমার হারদিনকার জীবনে অতারারাং শব্দ। কথাৎ ফাঁক থাইলে আমারে অযৌক্তিক প্রমাণ করের, কামে ফাঁক থাইলে বেকামা প্রমাণ করের। সংস্কৃতিতৌ ফাঁক আহান আছে। সংস্কৃতিৎ ফাঁক থাইলে কোন সমাজর সভ্যতার লাগাল পানা দিল অর, সমাজে বিশৃঙ্খলা দেখা দের।

“আদিত আমার আপা বপায় যে যে প্রথা, রীতি-নীতি, মালামাল ব্যবহার করিসি অতারে আমি আমার সংস্কৃতি বুলিয়া পালরাং বার আমি আজি যেতা কররাং অতারে সংস্কৃতি বুলিয়া পালতাই আমার আহিতারা প্রজন্ম।”এহানরে সংস্কৃতির সংজ্ঞা আহান বুলিয়া মানলে সংস্কৃতির দ্বিজাত উপাদান পারাং Ñ বস্তুগত সংস্কৃতি বার অবস্তুগত সংস্কৃতি। আমি আমার হারদিনকার জীবনে যে মালামাল ব্যবহার কররাং অতা বস্তুগত সংস্কৃতি (গধঃবৎরধষ ঈঁষঃঁৎব) বার যে প্রথা, রীতি-নীতি, চিন্তা-ভাবনা কররাং অতা অবস্তুগত সংস্কৃতি ( ঘড়হ গধঃবৎরধষ ঈঁষঃঁৎব ) । বস্তুগত সংস্কৃতি বার অবস্তুগত সংস্কৃতি দ্বিয় হানিয়ৌ সময়র লগে তাল মিলিয়া বদলানি চার। যদি বস্তুগত সংস্কৃতি বার অবস্তুগত সংস্কৃতি সমান তালে না আগুয়ার বার না বদলার অতাইলে সংস্কৃতিৎ ফাঁক দেখা দের। আমার সংস্কৃতিৎ ফাঁক অনার কারণ কতহান আছে। যেমন-

সংস্কৃতির উপাদান অতা আকতা আরাক আকতার গজে নির্ভরশীল। ডেক বার খাঙহার লগে সমান মাপে যেসাদে লেইরাংহান হঙ্করানি লাগের ঠিক অসাদে সংস্কৃতির উপাদান অতার মধ্যে সম্পর্কহান অনা লাগের। আরাক উদাহরণ আহান দেনা একরের। রাস করানির কাজে রাসর মন্ডলীগ বা মান্ডবগ নির্ভরশীল সংস্কৃতিহান। ৮ কুড়ি মারি দরিয়া মাধবপুরে রাস পূর্ণিমার দিনে যে রাস রাখুয়াল অর অতার লগে মান্ডব বা মন্ডলীগর সামঞ্জস্য না থানিয়ে রাস সংস্কৃতিৎ ফাঁক অর। এদিন হুদ্দা রাস রাখুয়াল চানার কাজে মানু না যিতারাগা, অদিন মান্ডবগ তিলনার ত্রে আগৌ অর। এহানই রাস পূর্ণিমার ঐতিহ্যহান। কিন্তু এরে ঐতিহ্যহান দিনে দিনে বাগে যারগা। আগদে মারিত্ত মারিত মানু বারানি আরাক আগদে এহাত সেহাত
দোকান বহিতে দেনা রাস সংস্কৃতিৎ যে ফাঁক আহান আছে অহান দেখা দের।

হবা বার গতিশীল সমাজ আহার কাজে সংস্কৃতির বিভিন্ন উপাদানর বিতরে ভারসাম্যমূলক অবস্থান আহান থানা উচিত। কিন্তু এরে ভারসাম্যমূলক অবস্থান এহান অনেক সময় সমাজর নির্দিষ্ট দল আহার তি করের। ইংল্যান্ডর গৌরবময় বিপ্লব, আমেরিকার স্বাধীনতা আন্দোলন, রুশ বিপ্লব এতা পৃথিবীর রাজনৈতিক ধারাহান পাল্টাশীল কিন্তু এরে মহতী আন্দোলন অতাতউ দেখলাং বিশেষ দল আহার বিরোধীতা। সক্রেটিস, ডারউইন, মার্কস এসাদে ডাঙর মনীষী অতার ধ্যান ধারণার বিপরীতে সমাজর বিশেষ দল আহানে তাঙরে ফাসি দেনা, নির্বাসন দেনা এসাদে হীন কামে মত্ত ইসিলা- তাঙর স্বার্থ হানরে রা করানির কাজে। আমার সমাজেউ এরে নির্দিষ্ট দল অতা বুজে বুজে আছি। “দলাদলি করতাউ, লাঠির বারি খেইতাউ” এসাদে শ্লোগান অতা আমার অন্তরে মিহানির পিসেউ দলাদলি, রেষারেষি দিনে দিনে বাড়ে আহেরতা- ঔ নির্দিষ্ট দল অতার মগজ ধোলাইর কারণে। আজি দিন আহিল এতার কামেত সাবধান অনার।

আমার সংস্কৃতির ফাঁক থানার আরাক কারণ আহান নগরায়নর প্রভাব। শহরে যে যে গিরি গিথানি আছি তাঙি শহরর বস্তুগত সংস্কৃতিনো প্রভাবিত ইতারা কিন্তু নগর মানসিকতা অসাদে না বাড়ের। অহার ফলে তাঙি অস্পষ্ট ধারণা আহান্ন থাইতারা অথচ অহানরে স্পষ্ট ধারণাহান বুলিয়া নিজর সমাজ সংস্কৃতিৎ চল করানির চেষ্টা করতারা। অস্পষ্ট নগর মানসিকতার কারণে আজি অনেকগয় ইমার ঠারে শৌরে অতারানি নাদতারা। কিস্তু জাতীয় জীবনে ঠারহানর প্রভাব কিসাদে অহান ইতিহাসে মিল্লেঙ দিলেই হারপানি একরের। চল্লিশর দশকে এরে উপমহাদেশ অহান খন্ড বিখন্ড অনার কারণ আহান ইসিল ঠারহান। পাকিস্তান রাষ্ট্র দ্বিতুপ ইসিল ঠারহানরে ইখুত দরিয়া। বিশ্ব রাজনৈতিক প্রোপট বিশ্লেষণ করানি না লাগের। নিজর জাতর বিতরেই ঠারহান কিসারে দুহান জাতিসত্তা করানি চার অহান আমি দেখরাং। জাতি, রাষ্ট্র বাগানির পিসে ঠারহান যে ডাঙর ফেক্টর আহান ইয়া কাম করের বার ঠারর ভিত্তিতেই জাতীয়তাবোধ আহের অহান হাবি অভিবাভক মন্ডলীয়ে হারপানি ঠক।
অযোগ্য আকতারাং দায়িত্ব দিলে সংস্কৃতিৎ ফাঁক অর। হুরকা উদাহরণ আহান দেনা একরের। আধুনিক অনার নাঙে রাসধারি অতায় রাস রাখুয়ালে বলিউডর প্রভাব থনা চেইলে অহান অযোগ্য নির্দেশনার ফলহান ইতই। এহান ইলে মিথস্ক্রিয়ার নাঙে সংস্কৃতিৎ ফাঁক আহান ইতই।

মূল্যবোধর পরিবর্তন নানি আমার সংস্কৃতিৎ ফাঁক অনার কারণ আহান। বিশ্ব বিবর্তনর সামাজিক, রাজনৈতিক, নৃ-তাত্ত্বিক ধারণা না থানিয়ে অনেকগয় নিংকরতারা সংস্কৃতি বিষয় অহান টহরাবৎংধষ কিন্তু ঈযধহমবধনষব, ঝযধৎবফ, অফধঢ়ঃবফ নাবে। সংস্কৃতি বিষয় অহান ঈযধহমবধনষব, ঝযধৎবফ বার অফধঢ়ঃবফ বুলিয়াই টহরাবৎংধষ ধারণা অহানরে আঘাত করানি চার। এরে দ্বন্দ এগত্তই অর সংস্কৃতির ফাঁক। আজি কালির কইনা অতায় দামানগর নাঙহান মাতানি নামাতানির যে দ্বন্দ আগত পরিসি অহান এরে ফাঁক অহার কারণে ইসেহান।

আমার সংস্কৃতিৎ ফাঁক ইতে সাংস্কৃতায়ন কিসারে প্রভাব থর অহান কুমেই ’র দ্বিতীয় সংখ্যাহান ( পর্ব-১, সাংস্কৃতায়ন: খাল্করানির দিক কতহান ) পাকরলে হারপানি একরের। আজি এহাত হুদ্দা মাতানি আহের Ñ সাংস্কৃতায়ন ঔপাগায় সংকট করের যেপাগা মানু নিজর সমাজর আর্থ-সামাজিক বার সাংস্কৃতিক প্রোপট না খাল্করিয়া কানার সাদে অন্য সমাজর সংস্কৃতি ধার করতারা।



লেখকঃ প্রভাতী সিনহা

উপন্যাসর জাতপাত বার "কার-বিদা হৃদি"

পুঁজিবাদর ঔরসে উপন্যাসর জরমÑসাহিত্যর দুনিয়াৎ মত এহান এবাকা প্রতিষ্ঠিত। ফুকিয়া মাততে গেলেগা, পয়সা বা কাচামালখানি খাটিয়া লাভতি গনানির যে সমাজহান মারাঙকেলুইল, অরে সমাজর ভ্রুণগ মানুর শিল্পীসত্তাহানর গর্ভৎ গিয়া জরম নিলগা উপন্যাস নাঙে। শব্দ এহান আমারাংতে দূরে থাক বাঙালিরাঙৌ বপদিন আগে পরিচিত নাইছিল। বৃটিশ অতা নাহিলে বাঙলার রুহিবৃত্তি বা শিল্পকলার শপাহাৎ এরে ডেঙ এগ সৌয়িল অইসতা না কিতা মাতানি হিন। তবে এহানৌ হাইহানÑবাঙলার পালা,কীর্তন, পাঁচালি, ঝুমুর, মঙ্গলকাব্য, গীতিকা... শিল্পনমুনা এতার পরম্পরাগত রূপসিলনার ধারা অহাৎ পরবর্তী নমুনা আহান হিসাবে উপন্যাস বা এহার কাছাকাছি ফর্ম বা রূপআহান ফঙনা বিচিত্র নাবে।
উপন্যাসর লগে পুঁজিবাদর সম্পর্কহান কিহান ? এহার লগে ফর্ম বা প্রকাশভঙ্গির বারাদেত’ সাহিত্যরে বিচার করানির ব্যাপারঅহান তিল। কবি বা সাহিত্যিকঅতাই ইমে সত্য আকিহানরে শাতকরতারাতাহেÑকবিতানো অক, বর্ণনানো অক বা উয়ারিনো... যেসারেউ মাতকা, ভিতরর কথাহান ইমে আকহানÑএজাত মত আছে, কিন্তু রূপবাদী বা স্ট্রাকচারালিস্ট গিরকগাছিয়ে এহান নাকরতারা, ঘোষণাউ দিয়াদেবেললাÑঞযব যরংঃড়ৎু ড়ভ ধৎঃ রং ঃযব যরংঃড়ৎু ড়ভ ভড়ৎস . অন্তরগৎত গারিগই ডাঙর ইল। আসলেই, গারিগ ছাড়া অন্তরগ থা’ পারের থাঙ ? খানি কুপিয়া খালকরলে, জগতসংসার এহাৎ দিকে দিকে ইমে মাতানির ভঙ্গি অহানই ডাঙর ইছে। রস লাগিয়া মাতে নুয়ারলে কোনো কথাই কারাঙৌ না হমারগা। হিন্দু ধর্মর জাতপাত অতাই আকুয়া নিংশামাপি বেলিয়া চৈতন্য গিরকে ভাগবত পুরানর পাতা আহাৎত রাধিকারে নিকালিয়া কৃষ্ণর লগে সম্পর্ক করেইল, সোজা কথাহানÑমানুহাবি নিজরে রাধা নিংকরকা, তন্ত্রমন্ত্র যাগযজ্ঞ নাবে, রাধাই যেসারে প্রেমহাননো কৃষ্ণরে পেইরি, তাঙিয়ৌ অসারে পানার সাধনা করকা। বামুন-চণ্ডাল- বৈশ্য-ত্রিয় হাবি রাধা ইয়া পড়লেগা জাতপাত নেয়র।(হান্নেই কই, এহান নিংকররাঙ নাই, চৈতন্য গিরকর মনে আরতাউ মতলব থা’ থাইতেউ পারে। এবাকা বার নানান কথা মাতানি অকরলা। ) অহাৎতে এরে কথা এহান তিন-চাইর লাইনে মাতেইলে কিহান অরথাং ? কতশত বাণী, পদ, এলা... কিয়া ? মানু এতা সভ্য বার সাংস্কৃতিক অনার পওে যে কোনো ভাব বা মতরে হবা হবা ফিজেৎ বার হাজেলনো দেখানি চেইতারা। এহান তর্কাতীত। হানতে যুগ যুগ দরিয়া ইমেÑসত্যর জয়, হবা বার সুন্দরর মঙ্গলÑমর্ম এহানরে কতশত ভঙ্গি, মিতলেং, আরমনো হারপুয়ানি চেইলাতা।
জবর দূরেইৎ আহোপরলাংগা সাৎ, প্রসঙ্গর মাংকলহাৎত এবাকা গরে হমানির উপায়আহান করিক। উপন্যাস। বপ ডাঙরনাসায়া য়েকরেবেলিক এহান উদারি করিয়া আনরাং শব্দহান ( বা বিষয়হান) বুলিয়া। বাঙালিয়ে বৃটিশ বা পাশ্চাত্যরাংত, আমি বাঙালিরাংত। আমি কিয়া উপন্যাস লিখতাঙাইতা ? দরকারহান কিহান ? প্রভাস কান্তি সিংহ গিরকে কিয়া কার-বিদা হৃদি লিখলতা ? বর্তমান সভ্যতার ভিতরেদে যারগা সাহিত্যিক আগরতা উপন্যাস জবরে প্রিয়। পাঠকরতাউ। নিজর নিজর জীবনরে এরে ফর্ম বা ভঙ্গি এহাননো চিনানি নুঙেই, যে জীবনর আহিআবেগঅনুরাগ উপন্যাসিয় লেখক অগর অসারে বিচ্ছিন্ন ; হাবিতা হাবির লগে এক করে নেনার খৌরাঙ বা ঠৌরাঙ নেই। এলা-নাচা-বর্ণনা-সংলাপ বার ব্যাখ্যাত্মক পদর সম্মিলনে বাঙলার যে বিচিত্র নান্দনিক প্রকাশআহান আছিল, অহাৎ পালাকার বা ইশালপা অগই সামষ্টিক সত্তা আগর ভিতরেত’ উয়ারি আহান বা ভাব আহান হারপুয়ার, নিজর উপস্থিতি নেয়র, ওহফরারংঁধষ ইয়া পরেরগা ঈড়ষষবপঃরাব, ব্যক্তিক প্রকাশহান ইয়া পরেরগা সামাজিক ভিব্যক্তি আহান। রচনাকার বা ইকরেকুরা অগ মাঙোপরেরগা। হানতে জরম নেরগা ঘনীভূত চেতনার রূপ আহান।
উপন্যাস সমষ্টির কথা মাতিয়াউ ব্যক্তিক। চরিত্র, বর্ণনা, ঘটনার লগে লগে লেখক নিজেউ আটের, আটের তার বিচ্ছিন্ন জীবনর রুচি, চিন্তা, আবেগ, পপাত হাবিতানো। জনসমষ্টি আহানর ঘনচেতনা তারাং থানা সম্ভব নার, যেহানি থনার চেষ্টাÑঅহান প্রাকৃতহান নাবে, হিকিয়া অর্জিত। উত্তম পুরুষে মাতলেউ যেহান, নাম-পুরুষে মাতলেউ অহান। ( ল্যাটিন আমেরিকার সাহিত্যনমুনরে ফলো করিয়া হাদিএগ বাঙলাতৌ উত্তম পুরুষর বহুবচনেÑআমরা, আমাদেরÑলেখানির ধুম আহান পড়িছে। ) পুঁজির লগে উপন্যাসর সম্পর্ক পারাংতা এহাননো যে, পুঁজিবাদ নাহিলে আকখুলাগর লাভ-তির হিসাব নাইল অইস, হানতে অরে আকখুলা ব্যক্তির জরমউ অবান্তর। উপন্যাসে মাতের অগ আকখুলা, চরিত্র অতাউ আকখুলা। হাবির লগে থায়াউ আকখুলা অরে ব্যক্তি অতার ভিতরে হমারগা লেখক ব্যক্তি অগ। মন, দেহ, বোধ হাবির ভিতরে হমিয়া হাবিতা উদুংদুয়া করেদের। কিন্তু আকগ আকগ মানুরে লয়া চলের কারবারএহান সামষ্টিক চেতনা অহানরে কিসারে শরীক করে পারত। তার ভাষা,ভঙ্গি, ভাব, রস গণগ্রাহী ইয়া নুয়ারের, আলাদা আলাদা ব্যক্তিপাঠক হংকরের। বিষয়এহান হুনতে কঠিন লাগলেউ চাঙঅহান কঠিনহান নাবে, বার সরল করে বেললেউ বিপদ। আইচ্ছা থাক, ইতিহাসে যিকগা। কুম্বাকা উপন্যাস আহিল ? পুঁজিবাদর লামহেলপা মাতমর সময় অহাৎ। সামন্ততন্ত্র বাগে যারগা, বণিকসমাজ আহান ফঙিল, বাজার নিকুলিল, জিঙাজিঙির যুদ্ধ আরম্ভ ইল। মানু যত নিজরে নিয়া চিন্তা করতাই, নিজর লাভর কথা খালকরতাই, যত আগরাংত আগই আলাদা ইতাই তত বাজারে ক্রেতার সংখ্যা বপিতাই। সমষ্টিতে দূরে থাক হেয়ক-মিনকর সম্পর্কউ বাগে গেলগা। ফলে পরিবারর ভিতরেতৌ আলাদা আলাদা ক্রেতা নিকুললা। পুঁজিবাদ এসারে করিয়া ব্যক্তির জরম দের।
সময় এহাৎ ভলতেয়ার, স্কট, দস্তয়েভস্কি, টলস্টয় পরেদে জোলা, টোয়েন, হেমিংওয়ে, কাফকা, কামু, ফুয়েন্তেস, কার্পেন্তিয়ার, মার্কেজ, জয়েস... বাঙলাৎ বঙ্কিম, রবীন্দ্রনাথ, শরৎ, বিভূতি, মানিক, তারাশংকর, সতীনাথ, অদ্বৈত আরতাউ শত শত ঔপন্যাসিক। পুঁজিবাদ-সাম্রাজ্যবাদর ডিগল সময়পথর ঠেকে ঠেকে তাঙর প্রকাশ বিকাশ। সমাজর লগে ব্যক্তির দ্বন্দ্ব, প্রচলিত মূল্যবোধর লগে আধুনিকতার সংঘাত, সনাতনর লগে সংস্কারর বাদবিবাদ, বিচ্ছিন্ন জীবনর জ্বালাযন্ত্রণা এতাই উপন্যাসর মেয়েকে মেয়েকে। তবে এতার হাদিৎ হাবিৎত ডাঙর ইলহান রাষ্ট্রর লগে ব্যক্তি বা সম্প্রদায়র দ্বন্দ্ব অহান। অধূনা উপন্যাসে আল’ আল’ ইমে এহানই বিষয়হান। আসলেই রাষ্ট্র অহান বড় আচানক ধারণাহান। ভূগোল আগর শত শত জাতর ধর্মর ভাবর মানুরে এক বিধাননো বিচার বা শাসন ( না, শোষণ ? ) করানির এরে যন্ত্রএগ স্বয়ং ভগবান।
হোমারর ইলিয়াড-ওডিসি, বাল্মীকির রামায়ণ, ব্যাসদেবর মহাভারত, ভার্জিলর ঈনিড, ফেরদৌসীর শাহনামা, অজ্ঞাতলেখকর বেউল্্ফ্ মহাকাব্যএতার বিশালতা, উপস্থাপনধর্মী আঙ্গিক, কমিউনিকেটিভ ভঙ্গির সামষ্টিক শিল্পচেতনা অহান বাগিয়া মাঙুয়া গেলগা। ( পরেদে গ্যেটের ফাউস্ট, মিল্টনর প্যারাডাইজ লস্ট, মধুসূদনর মেঘনাদবধ কাব্য...মহাকাব্য পদবী পার, কিনতু এহান টেকনিক বার গুণবিচারে, শিল্পর সামাজিক রূপবিচারে নাবে। বিষয় এতা পরেদে বিস্তারিত আলোচনার খৌরাঙ থাইল।)
স্বাধীনতা-উত্তর বাংলাদেশর তঙালপা ঔপন্যাসিক আগ আখতারুজ্জামান ইলিয়াস; চাকমা জাতির ইতিহাস-রাজনীতি-সংগ্রাম বিবেচনা করিয়া গিরকে ইকরিছে চাকমা উপন্যাস চাই প্রবন্ধ অহানর প্রসঙ্গ ইসুলিয়া এমতা সেইত্য আমার ঠারে ইকরা প্রভাস কান্তি সিংহর উপন্যাস অহানর আলোচনাৎ যিতাঙাইগা। ইলিয়াসর প্রবন্ধৎত হারপারাং, উপন্যাস অনার কাজে জাতি বা সমাজ আহানরতা আবকচা কাঠামোগত শর্ত বার ঐতিহাসিকতা সৃষ্টি অনা লাগের। গিরকর মতে চাকমারতা অহান সৃষ্টি ইয়াই আছে। দরকার লেখানি। আমার সমাজে উপন্যাসর পরিস্থিতি সৃষ্টি ইছেতা না কিতাÑবিতর্কর বিষয়হান। কবি ব্রজেন্দ্রই আলাপপ্রসঙ্গে আকদিন মাতিছিল, মাঝি আগ নেই, ভিখারি আগ নেই, চর-বদমাইশ নেই; কিতানো উপন্যাস। মনোস্তাত্ত্বিক উপন্যাস ইলে ইয়া পারের। বিভিন্ন কাস বা শ্রেণী, বৃত্তি, নিজস্ব উৎপাদনপদ্ধতি না থাইলে উপন্যাসতে কিসারে? চাকমারতা শর্তএতার অনেকতাই আছিল।
কার-বিদা হৃদির লেখক প্রভাস কান্তি সিংহরে পয়লাকাই থাকাত, হুদ্দা আমার ঠারনো উপন্যাস ইকরানির ঠৌরাঙর কাজে নাবে, মনোস্তাত্ত্বিক বিষয়শর্তর পরুয়া নাকরিয়া ঐতিহাসিক ঘটনা আহানরে উপন্যাসর বিষয়হান করিছে বুলিয়া। জনপ্রিয় অনার কাজে প্রেমপিরিতিরেউ মৌতুপ করিয়া না দরিছে গিরকে। বাংলাদেশর মুক্তিযুদ্ধ বার এহানরে বুকগৎ থয়া ইন্ডিয়া-বাংলাদেশর আমার মানুর সম্পর্ক, পাংলাক, বিচ্ছেদ যুদ্ধকালীন বরাক উপত্যকার হাবিৎত ডাঙর সোনাখিরা ক্যাম্পগরে কেন্দ্র করিয়া উপন্যাস এহাৎ ফাম পাছে। দেশভাগর প্রসঙ্গ আহিছে, আহিছে একাত্তরর রাজনৈতিক পটভূমিকা, রিফিউজি মানুর লাকলার কথা। আহিছে প্রেম-বিরহর কথা, আমার আদিশিার নমুনা, দেশভাগর ভ্যেগলিক সমস্যা, ইন্ডিয়ার হাতহানর কাঙর হুরু নৃতাত্ত্বিক ভাষ্য আহান, মিলিটারির ক্যাম্প আক্রমণর কতগ চিত্র ইত্যাদি। তবে আগেই যেহান মাতলাং, ভঙ্গি বা রূপহান জুত নাইলে সাহিত্যৎ জবরে মুশকিল, কী আঙ্গিকর সাহিত্য কিসারে ইকরানিÑচিনানির চর্চা জরুরী। উপন্যাস জবরে জটিল ফর্ম আহান; ধ্যান, জ্ঞান, বুদ্ধি এক নাইলে নার। প্রভাসর লেখাহান পাকরলে হারপানি হিনÑকথা অতা কুংগই মাতেরতা। ঘটনা-চরিত্র-পরিবেশ-প্রতিবেশর লগে নিজর খংচেলগ তিলকরেদেনার যে চরা বা কুপপা খেলাহান চলের, অহাৎ প্রভাস ব্যর্থ। উরাউরি করিয়া নিজর মনর কথা বার ঘটনাহানি মাতেদে বেলানির খিয়াল অহানে অনেক হবা দিক থায়াউ লেখক উপন্যাস এহানরে উপন্যাস অনার পথে বাধা দিয়াছে শৈনেই।
লেখক নিজেই চরিত্রগ মাল’পরেরগা, যেগর কথাহানি হুনানির কাজে আমি ঠকাখেয়া বাবুল-সমর-প্রফুল্ল-হেমবাবু-চিত্রসেন-শ্যামল-অনিতা-কণিকা চরিত্র এতারে পারাংতা। উপন্যাসর যে ডিটেইল, ডেঙপাতাসালকরা অনুপুঙ্খ আখ্যানভাগ, ঘটনা বা চরিত্রর দ্বান্দ্বিক পরিস্থিতি, কাইমেক্স বার এন্টিকাইমেক্সর খেলা, তেরা বার সাইকিক যে চলন আহান থার, কার-বিদা হৃদিৎ গুণঅতা নাপারাং। উপন্যাস নাবে, লেখকর চিনাজ গত, ঘটনা বা চরিত্রর উপন্যাসিয় শিল্পসিদ্ধিহীন তুমা তুমা বিবরণ, হাদিৎ বার গাঠি দেনার ইমে চেষ্টা আহান। আরম্ভউ থার, লমানিয়ৌ থার, কিনতু থুঙানির হৎনা আহান নাথার, নাথার পথআটানির তঙাল তঙাল চিন বা ছাপ। হাদিৎ শ্যামল-কণিকার প্রেমর কাহিনী বার অনিতা-বাবুল প্রসঙ্গএতা উপস্থাপনর টেকনিক দুর্বল। বার- লালফাম হাবিসময় মানবতাবিরোধীÑ মন্তব্য এহান কারহান ? ইমালাম মণিপুর বেলেয়া আয়া সিতারেয়া পড়লাংহা বুলতেউ হাবি আকতা অয়া থানার লেইপাক আমারতা নেয়ইলÑকারতা নেয়ইলতা ? লেখকর নিজর করিয়া মাতানির ভঙ্গি এহান উপন্যাসরে দুর্বল করের। লেখক নিজরে চরিত্রগ করিয়া উত্তম পুরুষে লিখল অইস সমস্যাএতা খানি ইলেউ কমিল অইস।
এতা দোষর কথা। গুণর কথাউ আছে। আমার জাত এহানর আবেগ, অনুভূতি, আগর প্রতি আগর টান-মায়ার বাধন, জাতিগত মিহুলঠুম্পা বানা-নুংশির স্বভাব জবর কঙানা ইয়া শাতুইছে লেখা এহাৎ। মানুরূপবর্ণনার চমৎকার তুমাআহান, যেমন অকরতেইÑডিগলহান চারিআত বিত্তা অইতৈ, গারিগর বাট্হান হবা অইলেউ হুকানা আরসপার গজে মাউ খানিমানি থানা লাগের আর আসে। মুণ্ডমালার পহুরিগর মিথ অহান বার নানান কুমেই-পর্বপার্বণর স্মৃতিময় উল্লেখঅতা খানিকরে ইলেউ উপন্যাস এহানরে নৃতাত্ত্বিক হাজেলনো ঙালকরে দিয়াছে।
বার আছে দেশপ্রেম বা ইমালামর কাজে গভীর আবেগ আহান। বিশেষত বাবুলরে কুইকরিয়া। ইমালামর টান এহান বাবুলরাং অমাটিক মিয়াম অছেতা...যে সিলেটর মাটিহানাৎ খেলেয়া ডাঙর অসে...তারে মুক্সি দিয়া কাদাৎ ডাহের... উতারৌ গজে যেপেইর বৌহানাত তার ঠৈগত্তউ জিঙেসিলি অনিতার নিংশাহান মিশিয়া আসে ঔ ফাম উহানাত্ত দুরেই অয়া বাবুল কিসাদে থানা পারতৈতা ?

কুংগইতে পারতারাতা !



লেখকঃ শুভাশিস সমীর