পাহাঙপাপাহাঙপা বিষ্ণুপ্রিয়া মণিপুরীর লোকধর্মর ডাঙর জাগাআহান কালকরিয়া থসে। মৈতৈ ‘পাখাঙবা’ শব্দএগো বিবর্তিত ইয়া ‘পাহাঙপা’ অলসে বুলিয়া মাতানি য়াকরের। মৈতৈ ঠারে ইকরা মণিপুরী ধর্মর লেইরিক লেইসুত পাখাঙবার যে বিবরন পেয়ার ঔতার লগে বিষ্ণুপ্রিয়া মণিপুরীর পাহাঙপার মিল বিসারিয়া পানা অকরের। পাখাংবা মণিপুরর মিথলজিত ধ্বংসকর্তা দৌ’গ বুলিয়া নাঙপালয়া আসে। বিষ্ণুপ্রিয়া মণিপুরীয়েউ পাহাংপা গিরকরে জবর ডরপেইতারা। তানুর বিশ্বাস পাহাংপা গিরকরাঙ লা’লইলে, তারাঙ কুনো অপরাধ করলে বা তার প্রতি অশ্রদ্ধা দেহেইলে তা তিকশৌয়য়া নানান অপকার করের বারো হবানেই নুয়ারাপানি দেহুয়াদের। বিষ্ণুপ্রিয়া মণিপুরী ভাষাসাহিত্যর প্রাচীনতম নিদর্শন বরন ডাহানির এলা’ত পাহাঙপা গিরকর উল্লেখ পেয়ার [১০] -
চহা জুরা বাধো, সেনারেই পিদিয়া নাছো
চহা জুরা বাধো হো মইরাঙে লেইরির তলে হমেইল।
কালা কালা আঙারা দলা দলা লেঙৌলো হয়ো
দনতো চারি চিলালো পাহাঙপায় বারিয়া নাদিলো।
... ... ... ... ... ... ... ... ... ... ... ... ... ... ...
কচুরপাতে রাবাদের লিকলারো সেনা সেইচামরে
পাহাঙপায় বকর হেইনৌ মাগলো
বকর হেইনৌ কারিরিনা, পাহাঙপায় চনে হদাবেললো।
- বরন ডাহানির এলা (রচনাকাল লামসাম ১৫শ-১৬শ শতক)
পাহাঙপা কুনোসমেইত হরপগো, কুনোসমেইত হাঙককগো, কুনোসমেইত কুমীরগোর সাদানে তঙাল তঙাল রূপ দরিয়া থার। তার থানির জাগাউ দিন মাদান রাতিভেদে তঙাল- গরর ফুংকাহাত, বদাগৎ, চুরিতলে যেহাত বরনর পানি পড়ের, সুরুঙে বা নালাত যেতাত লিরিলিরি পানির হুত দাবদের ঔতাত। জাগা ঔতাত অপবিত্র ইয়া সকাপাকি করলে বা পানি করলে গিরকে তিকশৌয়র বারো উগরে নানান নুয়ারা বিশেষ করিয়া চর্মরোগ নিকালাদের। গরুবইচর নুয়ারাপানি বারো শৌসুমাররতা ইরৈ-খঙলেই (নুয়ারা আহান যেহাত গারিগো চাকা চাকা ইয়া ফুলের বারো খাজুরার) নিকুললে চাপাল দেনা লাগের। চাপাল দিতে লাগেরতা চউল, চউলর কুড়া, গবর, আন্দি, ধুপ, তিল, ফুল, সেলকম, ইলাংচাক, ফারা ইংচেলর টুকারা, রূপা পাচসিকি ইত্যাদি।
মণিপুরর মিথলজিত পাহাঙপা বা ইবুথৌ পাখাঙবা দৌরাজা সরালেলর পুতকগো, তার মালক ইমা লেইমারেন সিদাবি বারো বেয়কর নাঙহান সনামাহি। ‘পা’(=বাপক) বারো ‘খাঙবা’ (=চিনেসে বা হারপাসে) শব্দদ্বিয়হাত্ত ‘পাখাঙবা’ আহেসে যেহার অর্থহান বাপক বা পিতৃপুরুষর হাব্বি জ্ঞানলো পালসে অগো [১১]। যেতাউ অক, মণিপুরে বৈষ্ণবায়নর পিসেদে মণিপুরর পন্ডিত বারো বামুনে পাখাঙবা গিরকরে হিন্দু মিথলজির অনন্তনাগ’র লগে আকগ করিয়া দেহানির হৎনা করেসিলা। কিন্তু বিংশ শতকে মণিপুরর ধর্মীয় বারো সাং¯কৃতিক পুনর্জাগরনর হৎগত উতা বাহিয়া গেলগা। আমার বিষ্ণুপ্রিয়া মণিপুরী মাঝেউ ‘পাহাঙপা’র অরিজিন নিয়া বিভিন্ন মতবাদ পেয়ার। ভাষাবিদ শ্রীমঙ্গলবাবু সিংহ গিরকে আই. ইবহাল সিংহর উদ্ধৃতি আসুলিয়া পাহাঙপা বা পাখাঙবারে ১ম শতকর আর্য্য রাজাগো বুলিয়া মাতেসে [১২]। প্রকৃতপে ১ম শতকর রাজা নোঙদা লাইরেন পাখাঙবা বা যবিষ্ঠ পাখাঙবা ( ৩৩-১৫৩ খ্রী:) বারো ইবুথৌ পাহাঙপা আকগো নাগই। মিথলজির দৌ পাহাঙপার লগে মাত্র দ্বিলিশিং বসর আগর রাজপুরুষ পাখাঙবার মিল বিসারানির কুনো সুযোগ নেই। দিল্স দেবজ্যোতি সিংহ গিরকর মতে পাখাঙবা স্বয়ং বিষ্ণু, পাখাআলা দৌ বুলিয়া পাখাঙবা, পাখা সালকরে গরুরর গজে বয়া থার বুলিয়া [১৩]। গিরকর যুক্তিহান য়াকরতে গেলেগা গরুরররেই পাখাঙবা বুলানি লাগের, কিয়াবুল্লে পাখা সালকরেসেতাই গরুর, বিষ্ণু নাগই।
পাহাঙপা-বিশ্বাসর নুয়ারাপানি-চাপালর স্থুল রূপঅহান সেচেইলে গভীর ফিলসফিক্যাল বারো মেটাফিজিক্যাল দিকআহান পেয়ার। গরর চারিয়বেদে পাহাঙপা গিরক অকান্ত প্রহরীগর সাদে বুলে বুলে থার, অপবিত্র হবানেই বায়ুত্ত গর-দুয়ার রা করিয়া থর। উহানে পাহাঙপা যেসাদে ধ্বংসকর্তাগো উসাদে রাকর্তাগৌ। লেইশাঙ হঙকরিয়া পাহাঙপা উপাসনার চল দেহিয়ারতা মণিপুরী রাজবংশর মানুরাং। পাহাঙপার মূর্ত্তিঅগো ড্রাগনমুখী হরপগর সাদে; লেজঅগো জ্যামিতিকভাবে আক্কুড়িগো গাথি খেয়া থতাহাত বারো হমাসেগা। বিসারিয়া চেইলে আমার কীর্ত্তনর মন্ডলীগোত, ডাকুলার চোলমে, চাকসাবি-ইনাফির পাড়ে পাহাঙপার জ্যামিতিক অবয়বএগো পেয়ার। পাখাঙবা উপাসনার রীতিহান ‘পাখাঙবা লেইনিঙ’; গভীর ধ্যানে বহিয়া মনহান এক করিয়া পাখাঙবারে সলকরানি লাগের, নিজর বিতরর আধ্যাত্তিক স্তরে হমিয়া নিজর ‘মি’ অগোর লগে উনাউনি অনা পারলে পরমজ্ঞানহান পেইতারা [১৪]। উহানে রাজবংশর মানু, মেইপা বারো জ্ঞানীমানু বাদে যেগসেগউ পাখাঙবা উপাসনা করানি নারতারা।
সরালেলসরাহাল, সরালেল বা সরারেন নাঙে বিষ্ণুপ্রিয়া মণিপুরীয়ে চিনতারা গিরকঅগো দৌর রাজাগো। মণিপুরর পুরাণউতাত সরালেল গিরকরে লাইনিঙথৌ সরালেল (লাই=দৌ, নিঙথৌ=রাজা) বুলিয়া উল্লেথ করেসি। আমার ‘বরন ডাহানির এলা’ বারো ‘মাদই সরালেল এলা’ত সরালেলর বিবরন পেয়ার। বরন ডাহানির এলাত সরালেল গিরকরে দৌরাজা বুলিয়া সম্বোধন করেসি-
সরালেলতে রাজারো লেইপাক কুমৌ কইল
লেইপাকে মাড়ায় মাখঙে খইমুরে জাঙাল দিলো
খুমলর মাটি হুকেইলো বরন দিয়াদে দৌরাজা
লুকোঙ মাহেই লুকুলিল বরন দিয়াদে দৌরাজা।
পন্ডিত আতম্বাপু শর্মার মতে সরারেন আহেসেতো ‘সুরেন্দ্র’ শব্দত্ত, সুরেন্দ্র হিন্দু পুরাণর দেবরাজ ইন্দ্রর নাঙআহান। মঙ্গলবাবু সিংহ গিরকেউ ‘সুরেন্দ্র’ শব্দত্ত সরালেলর উৎপত্তি দেহুয়াসে। কিন্তু মণিপুরে হিন্দুধর্ম হমানির বহু আগেত্ত সরারেনর অস্তিত্ত পেয়ার, অষ্টাদশ শতকে মণিপুরর যে যে জনগোষ্ঠি হিন্দুধর্ম গ্রহন নাকরেসি (যেমন লোই, তাঙখুল ইত্যাদি) তানুয়ৌ সরারেনর নাঙহান সলকরতারা। সরালেল গিরকএগোর আরাক জনপ্রিয় নাঙআহান আসে- আতিয়াকুরু সিদাবা (মতান্তরে আতিয়াগুরু সিদাবা) [১৫]। মণিপুরর পুরাতউতাত আতিয়াকুরু সিদাবারে পরমপুরুষগর মর্যাদা দেসি। ‘সরা’ অর্থ দৌ, ‘রেন’ অর্থ হাবিত্ত জিঙ, অর্থ্যাৎ সরারেন ইলতা হাবিত্ত ডাঙর দৌগ। কিন্তু হিন্দুপুরাণে ইন্দ্র হাবিত্ত ডাঙর দৌগ নানিয়ে সরালেলর লগে ইন্দ্রর পান্তাম নাচলের। সরালেলর পান্তাম দেনা য়াকরেরতা গ্রীকপুরাণর জিউসর লগে। ড. কালিপ্রসাদ সিংহ গিরকে বৈষ্ণবধর্মত দীক্ষা নেনার আগে সরালেল গিরক দৌর মাঝে হাবিরগজে ফাম পাসিল বুলিয়া স্বীকার করেসে [১৬]।
সরালেলরে নিয়া মানুর থতাৎতো থতাৎ নানান এলা, য়ারিপরি প্রচলিত আসে। মাদই সরালেলর এলা এতার মাঝে হাবিত্ত প্রসিদ্ধ। সরালেলর জিপুতর য়ারি আকতাউ আমার লোকসাহিত্যর উল্লেখযোগ্য ফাম আহান কালকরিয়া আসে। মণিপুরী তন্ত্রবিদ্যার বিভিন্ন তন্ত্রমন্ত্রত বিশেষ করিয়া বরন খামকরানি, গোলা খামকরানি, চর ধরানি, গরেৎতো কুরাঙৌ সালৈতে বারো বন্তুচালানর মন্ত্রউতাত সরালেল বারো আতিয়াকুরু সিদাবা নাঙদ্বিয়হানি বুলন দিয়া আহেসে। কীর্ত্তনর মালঠেপগর ‘যোগপীঠ’ জাগা উহানাৎ সরালেল গিরকরে পুজা কাৎকরানি লাগের।
সরালেলর গরগিথানকর নাঙহান ইমা লেইমারেল সিদাবী। পাহাঙপা বারো সনামাহি সরালেলর পুতকগি। ‘লৈথক লৈখরল’ পুরাণে উল্লেখ আসে সৃস্টির সমেইত সরালেল গিরকে তার নিজর বারো ইমা লেইমারেলর ছেয়াগিলো মুনি বারো জেলেই হঙকরিসে। সৃস্টিকর্তাগই নিজর প্রতিকৃতিগলো মানু হঙকরেসে, অর্থ্যাৎ হাবি মানুুই সৃস্টিকর্তার ছেয়া আকেইগো - এসাদে সর্ব্বজনীন মতবাদ প্রাচীন মনিপুরর ধর্মদর্শনরে লু’পা ফামে নিয়া বহাদেসেগা।
গর-দুয়ারর নমুনা বারো ফুংগা লাইরুগর-দুয়ারর নমুনা কিসাদে ইতয় উহানৌ আমার আপাবপায় আগেত্ত লেপকরেদিয়া গেসিকা। বিষ্ণুপ্রিয়া মণিপুরীর ট্রাডিশনাল গরউগোরে ইনচাউ বুলতারা। মুঙবারা অহানদে চারিচালি দিগালি করে গরগো হঙকরতারা। মুঙেদে মাঙকলহান, থাঙনাৎ ডাঙর গরগো। গরর খাবারাঅহানদে হাবির আগে বুজনগর ফামেলকা হান, অহান পিসে বারনগো। অওয়াঙেদে মুঙে অতিথর ফামহান, থাঙনাৎ বেড়হান নাপকরিয়া গিথানিপুঙগো। অহার পিসে নিঙলর কা-হান বারো পিসেদে চাকুমহান।
গরর বুকঅগৎ গোলগো করিয়া মাটিহান খুলিয়া ফুংগাহান হঙকরাতারা। ফুংগাহাত চুষলো জ্বিগো লাগিয়া থনি অর। ফুংগাহান নানান দৈনন্দিন কামেউ ব্যবহার অর যেমন চাকুমহাত জ্বিগো নেনা, তিকি জ্বালানি, হুকানা মরকসি, মাছ, হিদোমাছ, উড়–খই ইত্যাদি পুরানির কামে। ফুংগার ছালিঅতা দাত দারানির কামে ব্যবহার করতারা।
ফুংগাঅহান দৌ থাইতারা জাগাহান বুলিয়া মর্যাদা দিতারা বারো ফুংগালাইরু বুলিয়া মাততারা। অনেকে ফুংগাহানরে লীগিথানক বুলিয়া নিংকরতারা। এল. ইবুঙোহাল সিংহ গিরকেউ এসাদে মতআহান দেসে [১৭]। হুত্তুমে ফুংগাহান কোন দৌগো নাগই, নানান দৌ আয়া থাইতারা লেইফামহান। পাহাঙপা গিরকসহ গরর কোণা কোণসেলর অন্যান্য দৌদুক সময়বিশেষে ফুংগাহাত আয়া থাইতারাগা। উহানলো ফুংগাহাত জাঙর পারা দেনা নাকরের, পারা কিতা পড়লে আলয়া হমাদেনা লাগের। আগেকার দিনে বপাবপেয়ে যেতাউ খানার আগে ফুংগাহান খানিচুয়া কাৎকরিয়া পিসে খেইলা। নুয়া গরে অঙানির আগে গরর ফুংগাহান বিরাম নাদিয়া পাচদিন জ্বালিয়া থনা লাগের। গররদৌ হমাদেনার সমেইতৌ ফুংগাহাত (গরে ফুংগাহান নেইলে ফুংগাহার মাপাঅহাত) এইরুক আহান দেনা লাগের।
গিথানীপুঙপ্রত্যেক মাদইগাঙর গরে গিথানীপুঙ আকেইগো থার। গিথানীপুঙগৎ থাইরী দৌজেলাউগোর নাঙহান ইমাগিথানী। গিথানীপুঙগরে কততাই মাটির গিথানকৌ বুলতারা।
ইমা গিথানী এগোরে ইমা লেইমারেল সিদাবীর রূপহান বুলিয়া মাতানি য়াকরের। মৈতৈয়ে লেইমারেল গিথানককর কাজে গরর বিতরে ‘লেইমারেন কাচিন’ বুলিয়া ফামআহান থইতারা। ‘লেইমারেন কাচিন’র বৈশিষ্ঠাবলীর লগে গিথানীপুঙগর হুবহু মিল বিসারিয়া পেয়ার। গরর বিতরে অওয়াঙেদের কাদাঅগৎ বা কোন কোন ত্রেৎ পিসেদে বারনগর কাদাহাৎ মাটিহান চন্দকগো করিয়া উচকরিয়া উগর গজে পিতল বা কাচর হুরুকাং গেলেসআগো ঘটগো করিয়া গিথানক এগরে থইতারা। হুরুকাং গেলেসউগোর বিতরে পানি, তুলসীপাতাআহান বারো তামার পয়সাআহান থার। বিতরর পানি উতা নিঙথৌকাপা বা সাকলসেনর দিনে সিলকরানি লাগের।
আজিকালি বিষ্ণুপ্রিয়া মণিপুরীর গরে গরে গিথানীপুঙগৎ কৃষ্ণ, দুর্গা, মহাদেব, গনেশর ফটো তাঙানির প্রচলন অসে যদিয়ৌ ইমা গিথানীর লগে শৈব বা হিন্দুধর্মর সম্পর্ক বিসারিয়া পানা হিন। মণিপুরে শৈবধর্ম হমানির হাকতাকে শৈবধর্ম প্রচারক বারো তান্ত্রিক ঔতাই ইমা লেইমারেল গিথানকরে দুর্গার রূপহান বুলিয়া লেপকরেসিলা। গিথানীপুঙর ইমা গিথানীরেউ অনেকে দুর্গার রূপহান বুলিয়া নিংকরতারা। পয়লাকাই মনে থানা লাগতই, ভারতবর্ষর আর কোন জাতর বা কোন লয়াত এসাদে গিথানীপুঙ কালচার নেই। দ্বিতীয়ত: ইমা গিথানী এগো দুর্গার সাদে কোন শক্তিগো নাগই, গরর বিতরর দৌগ (Family Goddess)। তৃতীয়ত: গিথানীপুঙর ধারনা, প্রকৃতি, পুজা কাৎকরানির রীতি ইত্যাদি শৈব-শাক্ত কোনতার লগে না’মিলের, মান্নাপাহান হুদ্দা লৈঙ্গিক দিকঅহাত।
রাজারগাঙে গিথানীপুঙর চল নেই, কিন্তু গরর গিথানক দৌজেলা আগো আসে বুলিয়া মাততারা [১৮]। মাদইগাঙে গিথানীপুঙর গিথানক উগোরে নিয়াম গুরুত্ব দিতারা। গরর যেকোন ধর্মকর্মত বারো পুজা পার্ব্বনে তেইরাঙ আগে চাঙলুক আহান দেনা লাগের। সেন্ধ্যাহাত মেঙকুরুক দেনার পিসে মেঙকুরুকর জাতা অহান গিথানীপুঙগর মুঙে আনিয়া থইতারা। যেকোন শুভকার্মত যাত্রার আগে গিথানীপুঙগৎ হাবির আগে হমাদেনা অহান নিয়মহান। মানুয়ে নিঙকরতারা ইমা গিথানী এগো হারৌ ইলে গরউগোর হাবিয়ৌ হারৌ ইয়া হবাবালা ইয়া থাইতাই। রাতি গিথানক এগো গরর বিতরে আটে আটে থাইরী। উহানলো ঘুমজানির আগো গরগো ঙকখি করিয়া হুরিয়া, ফুতিফানি পাজালিয়া, পানি সিকদিয়া পবিত্র করিয়া থনা লাগের। থাইকালেত্ত আমার মানু মাঙবা-সেঙবা পরিস্কার-পরিচ্ছন্নতার বারে সচেতন আসিলা উহার প্রমাণহান গিথানীপুঙগো বারো গিথানীপুঙগোর লগে ইলৈসে লোকাচার উতা।
থাংনার পর্ব:
বিষ্ণুপ্রিয়া মণিপুরীর লৌকিক বিশ্বাস বারো মণিপুরর লোকধর্ম - ৩
তথ্যনির্দেশ:১০. Dr. K.P. Sinha, The Bishnupriya Manipuris, Silchar, 1984, page-32
১১. Saroj Nalini Parratt, The Religion of Manipur, Calcutta 1980, page- 21
১২. শ্রী মঙ্গলবাবু সিংহ, বিষ্ণুপ্রিয়া মণিপুরী ভাষাতত্ত্বও সমীা ২য় খন্ড, কাছাড়, ২০০৫, পৃষ্ঠা ৩৪
১৩. সরালেল, ৩য় বারো ৪র্থ বর্ষ সংখ্যা, শিলচর, ২০০৩, পৃষ্ঠা ২৫
১৪. P. Lalit, The Early Periods
১৫. .B. Singh, Traces of Pre-Hinduism in meitei soceity, (folklore-v5), 1964, page-203
১৬. ড. কালীপ্রসাদ সিংহ, প্রবন্ধমালা (১ম খন্ড: সাহিত্য বারো ভাষা) শিলচর, ১৯৮৩, পৃষ্ঠা ৩৬
১৭. L. Ibungohal Singh, Introduction to Manipur, 1963, page-27
১৮. ড. কালীপ্রসাদ সিংহ, প্রবন্ধমালা (৩য় খন্ড: মহৎ প্রশস্তি বারো সংস্কৃতি) শিলচর, ১৯৮৪, পৃষ্ঠা ১৪
লেখক: অসীম কুমার সিংহ
